നിറഞ്ഞു കളിച്ച് സദൂയി, ഓൺ ​ഗോളിൽ കുരുങ്ങി! കലിം​ഗ പോരിലും ബ്ലാസ്റ്റേഴ്സിന് സമനില

ഭുവനേശ്വർ: ഐഎസ്എല്ലിൽ കേരള ബ്ലാസ്റ്റേഴ്സിനു വീണ്ടും സമനില. ഒഡിഷ എഫ്സിക്കെതിരായ പോരാട്ടത്തിൽ 2-2നാണ് മത്സരം സമനിലയിൽ പിരിഞ്ഞത്. കലിം​ഗ സ്റ്റേഡിയത്തിൽ നടന്ന പോരാട്ടത്തിൽ രണ്ട് ​ഗോളിനു മുന്നിൽ നിന്ന ശേഷം ബ്ലാസ്റ്റേഴ്സ് ലീഡ് കളയുകയായിരുന്നു.

21 മിനിറ്റിനിടെ ബ്ലാസ്റ്റേഴ്സ് മുന്നിലെത്തി. 18ാം മിനിറ്റിൽ നോഹ് സദോയിയും 21ാം മിനിറ്റിൽ ജീസസ് ജിമനെസ് എന്നിവരാണ് ബ്ലാസ്റ്റേഴ്സിനായി ലീഡൊരുക്കിയത്. എന്നാൽ 29ാം മിനിറ്റിൽ അലക്സാണ്ടർ കോയെഫിന്റെ സെൽഫ് ​ഗോൾ ടീമിന്റെ ലീഡ് കുറച്ചു. പിന്നാലെ 36ാം മിനിറ്റിൽ ഡീ​ഗോ മൗറീസിയോ ഒ‍ഡിഷയ്ക്ക് സമനില ​ഗോളും സമ്മാനിച്ചു. പിന്നീട് ഇരു ടീമുകൾക്കും വല ചലിപ്പിക്കാൻ സാധിച്ചില്ല. ഇരു പക്ഷവും കടുത്ത ആക്രമണമാണ് കളത്തിൽ നടപ്പാക്കിയത്.

3 വിക്കറ്റുകള്‍ വീഴ്ത്തി ചമരി, സുഗന്ധിക, ഉദേശിക; പാകിസ്ഥാനെ 116ല്‍ ഒതുക്കി ലങ്കന്‍ വനിതകള്‍

18ാം മിനിറ്റിൽ സദൂയി ഇടതു വിങിൽ നിന്നു ബോക്സിലേക്ക് കുതിച്ചെത്തി താരം നടത്തിയ ഇടം കാൽ ആക്രമണമാണ് ആദ്യ ​ഗോളിൽ കലാശിച്ചത്. പന്ത് ബോക്സിന്റെ വലതു മൂലയിൽ പതിച്ചു. രണ്ടാം ​ഗോളിലേക്കും വഴി തുറന്നത് സദൂയി തന്നെ. ടീം അതിവേ​ഗ നീക്കത്തിലൂടെയാണ് ലീഡുയർത്തിയത്. സദൂയി നൽകിയ പാസിനെ ജിമെനസ് വലയുടെ മേൽക്കൂരയിലേക്ക് അടിച്ചു.

എന്നാൽ ഒഡിഷ അതിവേ​ഗം കളിയിലേക്ക് തിരിച്ചെത്തി. 29ാം മിനിറ്റിൽ കോർണർ തടുക്കാൻ ശ്രമിക്കുന്നതിനിടെ കൊയെഫിന്റെ ദേഹത്ത് തട്ടി ഓൺ ​ഗോളായി മാറി. പന്ത് കൊയെഫ് ബോക്സിൽ നിന്നു പുറത്തേക്ക് അടിച്ചു കളഞ്ഞെങ്കിലും റീപ്ലെയിൽ പന്ത് ​ഗോൾ ലൈൻ കടന്നതായി തെളിഞ്ഞു. 36ാം മിനിറ്റിൽ ബോക്സിനകത്തു നിന്നു അഹമ്മദ് ജഹു നൽകിയ പാസ് മൗറീഷ്യോ അനായാസം വലയിലാക്കി.