തുടരെ 29ാം ജയവുമായി ഇറ്റലി, സ്വിറ്റ്സർലാൻഡിനെ തകർത്തത് എതിരില്ലാത്ത 3 ​ഗോളിന്

റോം: ​ഗ്രൂപ്പ് എയിലെ പോരിൽ സ്വിറ്റ്സർലാൻഡിനെ എതിരില്ലാത്ത മൂന്ന് ​ഗോളിന് തകർത്ത് ഇറ്റലിക്ക് തുടരെ രണ്ടാം ജയം. ലോക്കാട്ടെല്ലി രണ്ട് വട്ടം ​ഗോൾ വല ചലിപ്പിച്ചപ്പോൾ തുടരെ രണ്ടാം മത്സരത്തിലും ഇമ്മൊബിൽ ​ഗോൾ കണ്ടെത്തി. 

സ്വിറ്റ്സർലാൻഡിനെതിരായ ജയത്തോടെ ഇറ്റലിയുടെ തോൽവി അറിയാതെയുള്ള കുതിപ്പ് 29 മത്സരങ്ങളിലായി. 20ാം മിനിറ്റിൽ ചില്ലെനി അസൂറി പടയ്ക്കായി ​ഗോൾ വല ചലിപ്പിച്ചെങ്കിലും വാർ വില്ലനായി. ആദ്യ മിനിറ്റുകളിൽ സ്വിറ്റ്സർലാൻഡിന് മുൻതൂക്കമുണ്ടായിരുന്നെങ്കിലും കളി പുരോ​ഗമിക്കുംതോറും ഇറ്റലി കരുത്ത് കാണിച്ച് വന്നു. 

26ാം മിനിറ്റിലായിരുന്നു ഇറ്റലിയുടെ ആദ്യ ​ഗോൾ. ബെറാഡിയുടെ പാസിൽ നിന്നായിരുന്നു ലോക്കോറ്റെല്ലി ഇവിടെ ​ഗോൾവല ചലിപ്പിച്ചത്. 2020 യൂറോയിൽ ​ഗോൾ വല കുലുക്കുന്ന ഏറ്റവും പ്രായം കുറഞ്ഞ താരം എന്ന നേട്ടം ലോക്കോട്ടെല്ലി സ്വന്തമാക്കി. ആ​ദ്യ ​ഗോൾ വഴങ്ങിയതിന് പിന്നാലെ സ്വിറ്റ്സർലാൻഡ് പ്രതിരോധത്തിന് പ്രാധാന്യം നൽകി. 

52ാം മിനിറ്റിൽ ലീഡ് ഉയർ‌ത്തി വീണ്ടും ലോക്കട്ടെല്ലിയുടെ ആക്രമണം. ബോക്സിന് വെളിയിൽ നിന്ന് ലോക്കട്ടെല്ലി തൊടുത്ത ബുള്ളറ്റ് ഷോട്ട് തടയാൻ സ്വിസ് ​ഗോൾ കീപ്പർക്കായില്ല. 88ാം മിനിറ്റിൽ ഇമ്മൊബിൽ കൂടി വല കുലുക്കിയതോടെ ഇറ്റലി ആദ്യ മത്സരത്തിൽ തുർക്കിയെ തകർത്ത സ്കോർ ലൈനിലേക്ക് രണ്ടാം മത്സരത്തിലും എത്തി.