വീണ്ടും പാകിസ്ഥാനെ വീഴ്ത്തി ഇന്ത്യ; ജൂനിയര്‍ ഏഷ്യാ കപ്പ് ഹോക്കി കിരീടം നിലനിര്‍ത്തി

സലാഹ്: ജൂനിയര്‍ ഏഷ്യാ കപ്പ് ഹോക്കി കിരീടം ഇന്ത്യക്ക്. ഫൈനലില്‍ ബദ്ധവൈരികളായ പാകിസ്ഥാനെ വീഴ്ത്തിയാണ് ഇന്ത്യയുടെ കിരീട നേട്ടം. 

ഫൈനലില്‍ ഒന്നിനെതിരെ രണ്ട് ഗോളുകള്‍ക്കാണ് ഇന്ത്യ വിജയിച്ചത്. അപരാജിത മുന്നേറ്റമാണ് ടൂര്‍ണമെന്റില്‍ ഇന്ത്യ നടത്തിയത്. കിരീട നേട്ടത്തോടെ മലേഷ്യയില്‍ നടക്കുന്ന എഫ്‌ഐഎച് ജൂനിയര്‍ ലോകകപ്പ് പോരാട്ടത്തിലേക്ക് ഇന്ത്യ യോഗ്യതയും ഉറപ്പിച്ചു. 

മത്സരത്തിന്റെ 13ാം മിനിറ്റില്‍ അംഗദ് ബിര്‍ സിങിലൂടെ ഇന്ത്യ മുന്നിലെത്തി. 20ാം മിനിറ്റില്‍ അരൈജിത് സിങ് ഹുണ്ടല്‍ ഇന്ത്യക്ക് രണ്ടാം ഗോളും സമ്മാനിച്ചു. പാകിസ്ഥാന് വേണ്ടി അബ്ദുല്‍ ബാസിത് 37ാം മിനിറ്റില്‍ ആശ്വസ ഗോള്‍ കണ്ടെത്തി. 

കോവിഡിനെ തുടര്‍ന്ന് 2021ലെ മത്സരം ഉപേക്ഷിച്ചിരുന്നു. ഇതിന് മുന്‍പ് 2015ലാണ് അവസാനമായി ടൂര്‍ണമെന്റ് നടന്നത്. അന്നും ഫൈനലില്‍ പാകിസ്ഥാനെ വീഴ്ത്തിയാണ് ഇന്ത്യ കിരീടം നേടിയത്. ഇന്ത്യ ഇത്തവണ കിരീടം നിലനിര്‍ത്തുകയായിരുന്നു. 

ഇന്ത്യയുടെ നാലാം ജൂനിയര്‍ ഏഷ്യാ കപ്പ് കിരീടമാണിത്. 2004ലും 2008ലുമാണ് നേരത്തെ ഇന്ത്യ കിരീടം സ്വന്തമാക്കിയത്.

ഈ വാര്‍ത്ത കൂടി വായിക്കൂ 

മൂന്ന് വ്യത്യസ്ത ജേഴ്സികൾ; ഇന്ത്യൻ ക്രിക്കറ്റ് ടീമിന് പുതിയ കിറ്റ്

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ