കേരള ക്രിക്കറ്റ് ലീ​ഗ് ലേലം; എംഎസ് അഖിൽ വില പിടിച്ച താരം

തിരുവനന്തപുരം: പ്രഥമ കേരള ക്രിക്കറ്റ് ലീ​ഗിനുള്ള താര ലേലത്തിൽ എംഎസ് അഖിൽ വിലപിടിപ്പുള്ള താരം. 7.4 ലക്ഷം രൂപയ്ക്ക് ട്രിവാൻഡ്രം റോയൽസ് അഖിലിനെ സ്വന്തമാക്കി. അഖിലടക്കം നാല് താരങ്ങൾക്ക് 7 ലക്ഷം ലഭിച്ചു. വിക്കറ്റ് കീപ്പർ വരുൺ നായനാർ 7.2 ലക്ഷത്തിനു തൃശൂർ ടൈറ്റൻസിൽ. ഓൾ റൗണ്ടർ മനു കൃഷ്ണനെ കൊച്ചി ബ്ലൂ ടൈ​ഗേഴ്സും സൽമാൻ നിസാറിനെ കാലിക്കറ്റ് ​ഗ്ലോബ് സ്റ്റാർസും 7 ലക്ഷത്തിനു ടീമിലെത്തിച്ചു.

4.6 ലക്ഷത്തിനു എം നിഖിലിനെ കാലിക്കറ്റ് ​ഗ്ലോബ് സ്റ്റാർസ് സ്വന്തമാക്കി. താരത്തിന്റെ അടിസ്ഥാന വില 50,000 രൂപയായിരുന്നു.

168 കളിക്കാരെയാണ് ടീമുകൾക്കായി ലേലത്തിൽ എത്തിയത്. 108 പേരെ ടീമുകൾ സ്വന്തമാക്കി. തിരുവനന്തപുരം ​ഹയാത്ത് റിജൻസിയിലാണ് താര ലേലം നടന്നത്. ചാരു ശർമയാണ് ലേലം നിയന്ത്രിച്ചത്.

ഐപിഎൽ, രഞ്ജി ട്രോഫി കളിച്ച താരങ്ങൾ എ വിഭാ​ഗത്തിലായിരുന്നു. ഇവർക്ക് 2 ലക്ഷമായിരുന്നു അടിസ്ഥാന വില. സികെ നായിഡു, അണ്ടർ 23, അണ്ടർ 19 സ്റ്റേറ്റ്, അണ്ടർ 19 ചലഞ്ചേഴ്സ് മത്സരങ്ങൾ കളിച്ചവർ ബി വിഭാ​ഗത്തിലും. ഒരു ലക്ഷമാണ് ഇവരുടെ അടിസ്ഥാന വിലയുണ്ടായിരുന്നത്. അണ്ടർ 16 സ്റ്റേറ്റ്, യൂണിവേഴ്സിറ്റി, ക്ലബ് ക്രിക്കറ്റർമാരായിരുന്നു ​സി വിഭാ​ഗത്തിൽ 50,000 രൂപയാണ് ഇവരുടെ അടിസ്ഥാന വില.

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

ബി വിഭാ​ഗത്തിൽ 3.6 ലക്ഷത്തിനു ലേലത്തിൽ പോയ ഓൾ റൗണ്ടർ അക്ഷയ് മനോഹറാണ് ബിയിൽ ഏറ്റവും കൂടുതൽ തുക നേടിയ താരം. തൃശൂർ ടൈറ്റൻസാണ് താരത്തെ പാളയത്തിൽ എത്തിച്ചത്. എ വിഭാ​ഗത്തിലെ 31 താരങ്ങളേയും വിവിധ ടീമുകൾ സ്വന്തമാക്കി. ബിയിൽ നിന്നു 21 പേരും സിയിൽ നിന്നു 56 പേരും വിവിധ ടീമുകളിലെത്തി.

പിഎ അബു​ദുൽ ബാസിത് ട്രിവാൻഡ്രം റോയൽസ്, സച്ചിൻ ബേബി ഏരീസ് കൊല്ലം സെയ്ലേഴ്സ്, മുഹമ്മദ് അസ്ഹറുദ്ദീൻ ആലപ്പി റിപ്പിൾസ്, ബേസിൽ തമ്പി കൊച്ചി ബ്ലു ടൈ​ഗേഴ്സ്, വിഷ്ണു വിനോദ് തൃശൂർ ടൈറ്റൻസ്, രോഹൻ എസ് കുന്നുമ്മൽ കാലിക്കറ്റ് ​ഗ്ലോബ് സ്റ്റാർസ് എന്നിവരാണ് വിവിധ ടീമുകളുടെ ഐക്കൺ താരങ്ങൾ.

സെപ്റ്റംബർ രണ്ട് മുതൽ 19 വരെ തിരുവനന്തപുരം ​ഗ്രീൻഫീൽഡ് സ്റ്റേഡിയത്തിലാണ് പോരാട്ടം. ഒരോ ദിവസവും പകലും രാത്രിയുമായി രണ്ട് മത്സരങ്ങൾ വീതം നടക്കും. കേരള ക്രിക്കറ്റ് ലീ​ഗ് ഓഫീഷ്യൽ ലോഞ്ചിങ് ഈ മാസം 31ന് ഉച്ചയ്ക്ക് 12നു ഹയാത്ത് റീജൻസിയിൽ ബ്രാൻഡ് അംബാസിഡർ കൂടിയായ നടൻ മോഹൻലാൽ നിർവഹിക്കും.