സുവാരസും ചരിത്ര നേട്ടം 'കാലൊപ്പിട്ട' ഗോളും

കാനഡയ്‌ക്കെതിരെ ഇഞ്ച്വറി സമയത്ത് ലൂയിസ് സുവാരസ് ഉറുഗ്വെയെ രക്ഷപ്പെടുത്തി. താരത്തിന്റെ സമനില ഗോളില്‍ ഉറുഗ്വെ മത്സരം പെനാല്‍റ്റി ഷൂട്ടൗട്ടിലേക്ക് നീട്ടി 3-4ന്റെ വിജയം പിടിച്ചു.

കോപ്പ അമേരിക്ക പോരാട്ടത്തില്‍ ഗോള്‍ നേടുന്ന ഏറ്റവും പ്രായമുള്ള താരമെന്ന അപൂര്‍വ നേട്ടം. സമനില ഗോള്‍ നേടുമ്പോള്‍ സുവാരസിനു പ്രായം 37 വയസ് 5 മാസം 21 ദിവസം.

അര്‍ജന്റീന താരം എയ്ഞ്ചല്‍ ലാബ്രുനയുടെ ദീര്‍ഘ കാലമായി തകരാതെ നിന്ന റെക്കോര്‍ഡാണ് ഒടുവില്‍ സുവാരസിലൂടെ തിരുത്തപ്പെടുന്നത്.

68 വര്‍ഷമായി തകരാതെ നിന്ന റെക്കോര്‍ഡാണ് സുവാരസ് പഴങ്കഥയാക്കിയത്. 1956 ജനുവരി 29നു ചിലിക്കെതിരായ അര്‍ജന്‍റീനയുടെ പോരാട്ടത്തിലാണ് ലാബ്രുനയുടെ ഗോള്‍. ഗോള്‍ നേടുമ്പോള്‍ ലാബ്രുനയ്ക്ക് വയസ് 37 വയസും 34 ദിവസവുമായിരുന്നു. 20 വര്‍ഷം റിവര്‍ പ്ലേറ്റിനായി കളിച്ച ലാബ്രുന അവരുടെ ഇതിഹാസ താരമാണ്. രണ്ട് വട്ടം ടീമിന്‍റെ പരിശീലകനുമായി.

ഉറുഗ്വെയ്ക്കായി ഏറ്റവും കൂടുതല്‍ ഗോള്‍ നേടിയ താരമാണ് സുവാരസ്. കാനഡയ്ക്കതിരായ നിര്‍ണായക ഗോളോടെ താരത്തിന്റെ ഉറുഗ്വെ ജേഴ്‌സിയിലെ ഗോളുകളുടെ എണ്ണം 69 ആയി. 142 മത്സരങ്ങളില്‍ നിന്നാണ് ഈ ഗോളുകള്‍.

കാനഡയ്‌ക്കെതിരായ താരത്തിന്റെ ഗോള്‍ രണ്ട് വര്‍ഷത്തെ ഇടവേളയ്ക്ക് ശേഷം ദേശീയ ടീമിനായുള്ള ആദ്യ നേട്ടമാണ്. 2022 മാര്‍ച്ച് 29നു ചിലിക്കെതിരായ ലോകകപ്പ് യോഗ്യതാ പോരാട്ടത്തിലാണ് സുവാരസ് അവസാനമായി വല ചലിപ്പിച്ചത്.