പെര്‍ത്ത്: പ്രായം വെറും നമ്പറാണെന്നും ഫീൽഡിങ് മികവിനു അതൊന്നും ഒരു തടസമല്ലെന്നു തെളിയിച്ച് ഓസ്‌ട്രേലിയന്‍ പേസര്‍ 35കാരനായ മിച്ചല്‍ സ്റ്റാര്‍ക്ക്. ആഷസ് പരമ്പരയിലെ ഒന്നാം ടെസ്റ്റിന്റെ ആദ്യ ഇന്നിങ്‌സില്‍ 7 വിക്കറ്റുകള്‍ വീഴ്ത്തിയ സ്റ്റാര്‍ക്ക് രണ്ടാം ഇന്നിങ്‌സ് തുടങ്ങിയ ഇംഗ്ലണ്ടിനു തുടക്കത്തില്‍ തന്നെ പ്രഹരമേല്‍പ്പിച്ചു.
ഒന്നാം ഇന്നിങ്‌സില്‍ പൂജ്യത്തില്‍ ഇംഗ്ലീഷ് ഓപ്പണര്‍ സാക് ക്രൗളിയെ മടക്കിയ സ്റ്റാര്‍ക്ക് രണ്ടാം ഇന്നിങ്‌സിലും അക്കൗണ്ട് തുറക്കും മുന്‍പ് ക്രൗളിയെ പുറത്താക്കി. ആദ്യ ഇന്നിങ്‌സില്‍ സ്റ്റാര്‍ക്കിന്റെ പന്തില്‍ ഉസ്മാന്‍ ഖവാജയാണ് ക്രൗളിയെ ക്യാച്ചെടുത്ത് മടക്കിയത്. രണ്ടാം ഇന്നിങ്‌സില്‍ സ്റ്റാര്‍ക്ക് സ്വന്തം ബൗളിങില്‍ തന്നെ ക്രൗളിയെ ക്യാച്ചെടുത്തു മടക്കുകയായിരുന്നു.
ബൗള്‍ ചെയ്തതിനു പിന്നാലെ ക്രൗളി സ്റ്റാര്‍ക്കിനു സമീപത്തു കൂടിയാണ് ഷോട്ട് പായിക്കാന്‍ ശ്രമിച്ചത്. എന്നാല്‍ അതിവേഗം പ്രതികരിച്ച സ്റ്റാര്‍ക്ക് ഡൈവ് ചെയ്ത് പന്ത് ഒറ്റക്കൈയില്‍ ഒതുക്കി. വിസ്മയിപ്പിക്കുന്ന ക്യാച്ചാണ് സ്റ്റാര്‍ക്കിന്റേത്. പ്രത്യേകിച്ച് താരത്തിന്റെ പ്രായം കണക്കാക്കുമ്പോള്‍.
ഒന്നാം ടെസ്റ്റില്‍ നിലവില്‍ ഇംഗ്ലണ്ടിനാണ് ലീഡ്. രണ്ട് ടീമുകളുടേയും ടോട്ടല്‍ 180നു അപ്പുറം പോയില്ല. ഒന്നാം ഇന്നിങ്‌സില്‍ 172 റണ്‍സില്‍ ഓള്‍ ഔട്ടായ ഇംഗ്ലണ്ട് ഓസ്‌ട്രേലിയയുടെ ഒന്നാം ഇന്നിങ്‌സ് വെറും 132 റണ്‍സില്‍ അവസാനിപ്പിച്ചു. ഇംഗ്ലണ്ടിനു 40 റണ്‍സ് ലീഡ്. ഒന്നാം ദിനം കളി നിര്‍ത്തുമ്പോള്‍ ഓസ്‌ട്രേലിയ 9 വിക്കറ്റ് നഷ്ടത്തില്‍ 123 റണ്‍സെന്ന നിലയിലായിരുന്നു. രണ്ടാം ദിനമായ ഇന്ന് നതാന്‍ ലിയോണിനെ മടക്കി ബ്രയ്ഡന്‍ കര്‍സാണ് ഓസീസ് ഇന്നിങ്‌സിനു തിരശ്ശീലയിട്ടത്.
പിന്നാലെയാണ് ഇംഗ്ലണ്ട് രണ്ടാം ഇന്നിങ്‌സ് തുടങ്ങിയത്. ഇന്നിങ്‌സിലെ അഞ്ചാം പന്തിലാണ് സ്റ്റാര്‍ക്ക് ഡൈവിങ് ക്യച്ചെടുത്തു സ്വന്തം ബൗളിങില്‍ ക്രൗളിയെ കൂടാരം കയറ്റിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
