'ഞങ്ങള്‍ റെഡി, ഒന്നെടുത്താല്‍ ഒന്ന് ഫ്രീ!'- ഐപിഎല്‍ ടീമുകളോട് മുഹമ്മദ് കൈഫ്

മസ്‌കറ്റ്: ലെജന്‍ഡ്‌സ് ലീഗ് ക്രിക്കറ്റ് പോരാട്ടത്തില്‍ തകര്‍പ്പന്‍ ജയം സ്വന്തമാക്കിയതിന് പിന്നാലെ രസകരമായ ട്വീറ്റുമായി മുന്‍ ഇന്ത്യന്‍ താരം മുഹമ്മദ് കൈഫ്. ഏഷ്യന്‍ ലയണ്‍സിനെതിരായ പോരാട്ടത്തില്‍ ഇന്ത്യ മഹാരാജാസ് ആറ് വിക്കറ്റിന് വിജയം പിടിച്ചിരുന്നു. പിന്നാലെയാണ് മികച്ച ബാറ്റിങുമായി കളം നിറഞ്ഞ യൂസുഫ് പഠാനൊപ്പമുള്ള ചിത്രം പങ്കിട്ട് കൈഫ് ട്വീറ്റ് ചെയ്തത്. 

ഏഷ്യന്‍ ലയണ്‍സിനെതിരായ പോരാട്ടത്തില്‍ 40 പന്തില്‍ 80 റണ്‍സെടുത്താണ് യുസുഫ് തന്റെ പഴയ വീര്യം വീണ്ടും പുറത്തെടുത്തത്. കൈഫും മികച്ച ബാറ്റിങുമായി കളം നിറഞ്ഞു. 42 റണ്‍സുമായി താരം പുറത്താകാതെ നിന്ന് ഇന്ത്യ മഹാരാജാസിനെ വിജയ തീരത്തെത്തിച്ചു. 

പിന്നാലെയാണ് ഐപിഎല്‍ ടീമുകളുടെ ശ്രദ്ധ ക്ഷണിച്ചുള്ള ട്വീറ്റ്. 

'ഐപിഎല്‍ ടീമുകളെ ഞങ്ങള്‍ തയ്യാറായി കഴിഞ്ഞു. ഒന്നെടുത്താല്‍ ഒന്ന് ഫ്രീ'- എന്ന രസകരമായ കുറിപ്പോടെയാണ് കൈഫ് ചിത്രം പങ്കിട്ടത്. 

ഐപിഎല്ലില്‍ ഒട്ടേറെ ബാറ്റിങ് പ്രകടനങ്ങളുമായി കളം നിറഞ്ഞ താരമാണ് യുസുഫ്. പ്രഥമ ഐപിഎല്ലില്‍ രാജസ്ഥാന്‍ റോയല്‍സ് കിരീടം സ്വന്തമാക്കിയപ്പോള്‍ നിര്‍ണായക റോളില്‍ നിന്ന താരമാണ് യുസുഫ്. പിന്നാലെ താരത്തിന് ഇന്ത്യന്‍ ടീമിലേക്കും വഴി തുറന്നിരുന്നു. പിന്നീട് 2012, 2014 വര്‍ഷങ്ങളില്‍ കൊല്‍ക്കത്ത നൈറ്റ്‌റൈഡേഴ്‌സിനൊപ്പവും യുസുഫ് കിരീടം നേടിയിരുന്നു.