മൂന്ന് സ്വര്‍ണവുമായി ഓസ്ട്രേലിയ ഒന്നാമത്. ചൈന 2 സ്വര്‍ണവുമായി രണ്ടാം സ്ഥാനത്ത്. എട്ട് ടീമുകള്‍ നിലവില്‍ 1 സ്വര്‍ണം നേടിയിട്ടുണ്ട്. ഫ്രാന്‍സ്, ദക്ഷിണ കൊറിയ, ബെല്‍ജിയം, ജപ്പാന്‍, കസാഖിസ്ഥാന്‍, ജര്‍മനി, ഹോങ്കോങ് ടീമുകളാണ് സുവര്‍ണ നേട്ടത്തിലെത്തിയ മറ്റുള്ളവര്‍.
ഓസ്ട്രേലിയ നേടിയ മൂന്നില്‍ രണ്ട് സ്വര്‍ണവും വന്നത് നീന്തല്‍ കുളത്തില്‍ നിന്ന്. ഒരു സ്വര്‍ണം റോഡ് സൈക്ലിങിലും. ഓസീസിന്റെ ആദ്യ സ്വര്‍ണം ഇത്തവണ റോഡ് സൈക്ലിങിലാണ്. വനിതാ ടൈം ട്രയലില്‍ ഗ്രെയ്‌സ് ബ്രൗണാണ് അവര്‍ക്ക് സ്വര്‍ണം സമ്മാനിച്ചത്. വനിതകളുടെ 400 മീറ്റര്‍ ഫ്രീസ്റ്റൈലില്‍ അരിയാന്‍ ടിറ്റ്മസാണ് സ്വര്‍ണം നേടിയത്. വനിതകളുടെ 4- 100 ഫ്രീസ്റ്റൈല്‍ റിലേയിലാണ് നീന്തല്‍ കുളത്തിലെ അവരുടെ മറ്റൊരു സ്വര്‍ണം.
നീന്തല്‍ കുളത്തില്‍ 23 കാരിയായ ഓസ്ട്രേലിയന് താരം അരിയാന്‍ ടിറ്റ്മസ് തന്റെ യാത്ര തുടങ്ങി. ടോക്യോയില്‍ നേടിയ 400 മീറ്റര്‍ ഫ്രീസ്റ്റൈല്‍ സ്വര്‍ണം അവര്‍ നിലനിര്‍ത്തി. 2020ല്‍ 200, 400 മീറ്റര്‍ ഫ്രീസ്റ്റൈല്‍ സ്വിമ്മിങില്‍ സ്വര്‍ണവും 800 മീറ്ററില്‍ വെള്ളിയും നേടിയിരുന്നു. ശേഷിക്കുന്ന ഇനങ്ങളില്‍ സ്വര്‍ണം നേടുമോ എന്നതാണ് ഇനി ആകാംക്ഷ.
പാരിസ് ഒളിംപിക്സിലെ ആദ്യ സ്വര്‍ണ മെഡല്‍ ചൈനയാണ് നേടിയത്. 10 മീറ്റര്‍ എയര്‍ റൈഫിള്‍ മിക്സഡ് ടീം പോരാട്ടത്തില്‍ ചൈനയുടെ ഹ്വാങ് യുടിങ്- ഷെങ് ലിയാവോ സഖ്യത്തിനാണ് സുവര്‍ണ നേട്ടം. 16-12 എന്ന സ്‌കോറിനാണ് ചൈനീസ് സഖ്യം വിജയവും സ്വര്‍ണവും പിടിച്ചെടുത്തത്.
ആദ്യ വെള്ളി മെഡല്‍ നേട്ടം ദക്ഷിണ കൊറിയയുടെ കിം ജിഹ്വോന്‍- പാര്‍ക് ഹജുന്‍ സഖ്യത്തിനാണ്. 10 മീറ്റര്‍ എയര്‍ റൈഫിള്‍ മിക്സഡ് ടീം ഫൈനലില്‍ ചൈനയുടെ ഹ്വാങ് യുടിങ്- ഷെങ് ലിയാവോ സഖ്യത്തിനോടു പരാജയപ്പെട്ടു.
പാരിസിലെ ആദ്യ മെഡല്‍ കസാഖിസ്ഥാന്റെ ഷൂട്ടിങ് താരങ്ങളായ അലക്‌സാന്‍ഡ്ര ലെ- ഇസ്ലാം സതപയേവ് സഖ്യമാണ് സ്വന്തമാക്കിയത്. 10 മീറ്റര്‍ എയര്‍ റൈഫിള്‍ മിക്സഡ് ടീം വെങ്കല പോരാട്ടത്തില്‍ ജര്‍മനിയുടെ മിക്‌സിമിലിയന്‍ ഉള്‍റെഹ്- അന്ന ജാന്‍സന്‍ സഖ്യത്തെയാണ് വീഴ്ത്തിയത്. 17-5നാണ് കസാഖ് സഖ്യം വിജയവും മെഡലും സ്വന്തമാക്കിയത്. 28 വര്‍ഷത്തെ ഇടവേളയ്ക്ക് ശേഷമാണ് കസാഖിസ്ഥാന്‍ ഒളിംപിക്‌സ് ഷൂട്ടിങില്‍ മെഡല്‍ നേടുന്നത്. 1996 അറ്റ്‌ലാന്റ ഒളിംപിക്‌സിലാണ് അവസാനമായി അവര്‍ ഷൂട്ടിങ് മെഡല്‍ നേടിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
