ആരങ്ങേറ്റത്തിൽ തന്നെ ​ഗോൾഡൻ ഡക്ക്! ഇന്നിങ്സിലെ ആദ്യ പന്തിൽ പൃഥ്വി ഷാ പുറത്ത്

കൊളംബോ: രാജ്യാന്തര ടി20യിൽ അരങ്ങേറ്റത്തിന് ഇറങ്ങിയ ഇന്ത്യയുടെ യുവ ഓപ്പണർ പൃഥ്വി ഷാ നിരാശ. ശ്രീലങ്കക്കെതിരായ ഒന്നാം ടി20 പോരാട്ടത്തിൽ ഇന്നിങ്സിലെ ആദ്യ പന്തിൽ തന്നെ പൃഥ്വി ​ഗോൾഡൻ ഡക്കായി കൂടാരം കയറി. ഇന്നിങ്സിലെ ആദ്യ പന്തിൽത്തന്നെ ദുഷ്മന്ത ചമീരയാണ് ഷായെ വീഴ്ത്തിയത്. വിക്കറ്റ് കീപ്പർ മിനോദ് ഭാനുക ക്യാച്ചെടുത്തു. 

ടോസ് നേടിയ ശ്രീലങ്കൻ നായകൻ ദസുൻ സനക ബൗളിങ് തിരഞ്ഞെടുക്കുകയായിരുന്നു. ഇന്ത്യൻ നിരയിൽ പൃഥ്വി ഷായ്ക്കു പുറമെ മിസ്റ്ററി സ്പിന്നർ വരുൺ ചക്രവർത്തിയും ഇന്ന് അരങ്ങേറ്റം കുറിച്ചു. സഞ്ജു സാംസണാണ് വിക്കറ്റ് കീപ്പർ. ഇഷാൻ കിഷനും ടീമുലുണ്ട്. 

ഏകദിന പരമ്പര വിജയത്തിന്റെ ആത്മവിശ്വാസത്തിലാണ്  ശിഖർ ധവാനും സംഘവും ഇന്ന് ടി20 പോരിന് ഇറങ്ങിയത്. മൂന്ന് മത്സരങ്ങൾ ഉൾപ്പെടുന്ന ടി20 പരമ്പരയിലെ ആദ്യ മത്സരം കൊളംബോയിലെ ആർ പ്രേമദാസ സ്റ്റേഡിയത്തിലാണ് പോരാട്ടം. 

ഈ വർഷം അവസാനം നടക്കുന്ന ലോകകപ്പിനുള്ള ഇന്ത്യൻ ടീം തിരഞ്ഞെടുപ്പിൽ അവകാശ വാദം ഉന്നയിക്കാനുള്ള അവസരമാണ് ഇന്ത്യൻ യുവ നിരയ്ക്ക് ഈ പരമ്പര. ക്യാപ്റ്റൻ ശിഖർ ധവാൻ ഉൾപ്പെടെയുള്ളവർ ലോകകപ്പ് ടീമിൽ സ്ഥാനമുറപ്പിക്കാൻ ലക്ഷ്യമിട്ടാണ് കളത്തിലിറങ്ങുന്നത്.