എറിഞ്ഞിട്ട് ഹൈദരാബാദ്, തകർന്നടിഞ്ഞ് പഞ്ചാബ് നിര; വിജയലക്ഷ്യം 121 

ചെന്നൈ:  ഐപിഎല്ലിൽ ഇന്ന് നടക്കുന്ന ആദ്യ പോരാട്ടത്തിൽ  സൺറൈസേഴ്സ് ഹൈദരാബാദിന് 121 റൺസ് വിജയലക്ഷ്യം. ടോസ് നേടി ബാറ്റിങ്ങിനിറങ്ങിയ പഞ്ചാബ് കിങ്സിന് 120 റൺസിന് ഓൾഔട്ടായി.

പഞ്ചാബ് നിരയിൽ 22 റൺസ് നേടിയ ഷാറൂഖ് ഖാൻ ആണ് ടോപ് സ്‌കോറർ. 25 പന്തിൽ ഓപണർ മായങ്ക് അഗർവാളും 22 റൺസ് നേടി. ക്രിസ് ഗെയിൽ (15), ദീപക് ഹുഡ(13), മൊയിസസ്(14) എന്നിവർ മാത്രമാണ് രണ്ടക്കം കടന്നത്. ക്യാപ്റ്റൻ കെ എൽ രാഹുൽ നാല് റൺസ് മാത്രം നേടി പുറത്താകുകയായിരുന്നു. 

ഹൈദരാബാദിനായി ഖലീൽ അഹമ്മദ് മൂന്ന് വിക്കറ്റ് വീഴ്ത്തി. അഭിഷേക് ശർമ്മ രണ്ട് വിക്കറ്റും ഭുവനേശ്വർ കുമാർ, സിദ്ദാർത്ഥ് കൗൾ, റാഷിദ് ഖാൻ എന്നിവർ ഓരോ വിക്കറ്റ് വീതവും നേടി.

രണ്ടു മാറ്റങ്ങളോടെയാണ് പഞ്ചാബ് ഇന്ന് കളത്തിലിറങ്ങിയത്. ജൈ റിച്ചാർഡ്‌സണും റിലി മെറിഡിത്തിനും പകരം ഫാബിയാൻ അലനും മോയ്‌സസ് ഹെന്റിക്വസുമാണ് ഇന്ന് ടീമിലിടം നേടിയത്. ഹൈദരാബാദ് ടീമിൽ മുജീബ്, അബ്ദുൾ സമദ്, മനീഷ് പാണ്ഡെ എന്നിവർക്ക് പകരം കെയ്ൻ വില്യംസൺ, കേദാർ ജാദവ്, സിദ്ധാർഥ് കൗൾ എന്നിവർ ഇടംനേടി.