ആറ് വർഷത്തിന് ശേഷം തിരിച്ചു വരവ്, ​ഗ്രീസ്മാനും എംബാപ്പെയും തിളങ്ങിയപ്പോൾ പെനാൽറ്റിയും കളഞ്ഞുകുളിച്ച് ബെൻസിമ

ആറ് വർഷത്തിന് ശേഷം ഫ്രഞ്ച് ടീമിലേക്ക് മടങ്ങിയെത്തിയ ബെൻസിമയ്ക്ക് പക്ഷേ തുടക്കം നിരാശ നിറഞ്ഞതായി. ​ഗ്രീസ്മാനും എംബാപ്പെയ്ക്കും ഒപ്പമിറങ്ങിയെങ്കിലും ആദ്യ പകുതിയിൽ റയൽ മുന്നേറ്റ നിര താരമെടുത്ത സ്പോട്ട് കിക്ക് ലക്ഷ്യം കണാതെ പോയി. ​

​വെയിൽസിനെ എതിരില്ലാത്ത മൂന്ന് ​ഗോളിന് തകർത്ത് വിട്ടപ്പോൾ ​ഗ്രീസ്മാനും എംബാപ്പെയും സബ്സ്റ്റ്യൂട്ട് ആയെത്തിയ ഡെംബെലെയും വല കുലുക്കി. ആദ്യ പകുതിയിൽ വെയിൽസ് ഡിഫന്ററിന്റെ ബോക്സിനുള്ളിലെ ഹാൻഡ് ബോളാണ് ഫ്രാൻസിന് പെനാൽറ്റി കിക്ക് ലഭ്യമാക്കിയത്. തന്റെ ഇടത്തേക്ക് അടിച്ച ബെൻസിമയ്ക്ക് പിഴച്ചപ്പോൾ മികച്ച ഡൈവിങ്ങിലൂടെ ഡാനി വാർഡ് ​പന്ത് ​ഗോൾവലയ്ക്കപ്പുറം നിർത്തി. 

ഫ്രാൻസിന് വേണ്ടി ഇതോടെ താനെടുത്ത അവസാന മൂന്ന് പെനാൽറ്റികളും ബെൻസെമ നഷ്ടപ്പെടുത്തി. 81 കളികളിലാണ് ബെൻസിമ ഫ്രഞ്ച് കുപ്പായത്തിൽ ഇറങ്ങിയത്. 27 ​ഗോളുകൾ താരത്തിന്റെ പേരിലുണ്ട്. 2015 ഒക്ടോബറിൽ അർമെനിയക്കെതിരെ കളിച്ചതായിരുന്നു അവസാന മത്സരം. സെക്സ് ടേപ്പ് സ്കാൻഡലിന് ശേഷം ടീമിലെ സ്ഥാനം നഷ്ടമായെങ്കിലും റയലിന് വേണ്ടി പുറത്തെടുത്ത മികവ് വീണ്ടും ബെൻസെമയെ ദേശിയ ടീമിലേക്ക് എത്തിച്ചു.