ഷൂട്ടിങിൽ നിരാശ തന്നെ; ഫൈനൽ യോ​ഗ്യത ഇല്ല; മെഡൽ പ്രതീക്ഷയായിരുന്ന മനു ഭക്കർ- സൗരഭ് ചൗധരി സഖ്യം രണ്ടാം റൗണ്ടിൽ പുറത്ത്

ടോക്യോ: ഒളിംപിക്സ് ഷൂട്ടിങിൽ ഇന്ത്യൻ പ്രതീക്ഷകൾക്ക് ഇന്നും തിരിച്ചടി. 10 മീറ്റർ എയർ പിസ്റ്റൾ മിക്‌സഡ് ടീം ഇനത്തിൽ മനു ഭക്കർ- സൗരഭ് ചൗധരി സഖ്യം രണ്ടാം റൗണ്ടിൽ പുറത്തായി. 

രണ്ടാം റൗണ്ടിലേക്ക് മുന്നേറി ഇന്ത്യൻ പ്രതീക്ഷകൾക്ക് ചിറക് നൽകിയ ഇരുവർക്കും പക്ഷേ ഫൈനൽ യോ​ഗ്യത നേടാൻ സാധിക്കാതെ പോയി. രണ്ടാം റൗണ്ടിൽ ഇരുവരും ഏഴാം സ്ഥാനത്താണ് ഫിനിഷ് ചെയ്തത്. 

ഇന്ത്യൻ മെഡൽ പ്രതീക്ഷയായ സൗരഭ്- മനു സഖ്യം 582 പോയിന്റ് നേടിയാണ് സൗരഭ്- മനു ഭക്കർ സഖ്യം യോഗ്യതാ റൗണ്ടിന്റെ രണ്ടാം ഘട്ടത്തിലേക്ക് മുന്നേറിയത്‌. എന്നാൽ മനു ഭക്കറിന്റെ മോശം ഫോം ഇന്ത്യൻ മുന്നേറ്റത്തെ സാരമായി ബാധിച്ചു.

ഇതേ ഇനത്തിൽ തന്നെ മത്സരിച്ച മറ്റൊരു സഖ്യമായ അഭിഷേക് വർമ- യശസ്വിനി ദേശ്വാൾ സഖ്യം ആ​ദ്യ റൗണ്ടിൽ തന്നെ പുറത്തായിരുന്നു.