കൊല്‍ക്കത്ത: ദക്ഷിണാഫ്രിക്കയ്‌ക്കെതിരായ ഒന്നാം ടെസ്റ്റിനിടെ ബാറ്റിങിനിറങ്ങി 3 പന്തുകള്‍ നേരിട്ട് പരിക്കേറ്റ് മടങ്ങിയ ക്യാപ്റ്റന്‍ ശുഭ്മാന്‍ ഗില്‍ ആശുപത്രി വിട്ടു. താരം നിലവില്‍ കൊല്‍ക്കത്തയിലെ ടീം ഹോട്ടലില്‍ വിശ്രമത്തിലാണ്. കഴുത്തു വേദനയെ അസഹ്യമായതോടെയാണ് താരം 3 പന്തുകള്‍ നേരിട്ട് 4 റണ്‍സുമായി റിട്ടയേര്‍ഡ് ഹര്‍ട്ടായത്.
ക്യാപ്റ്റന്‍ നിരീക്ഷണത്തില്‍ തന്നെയാണ് നിലവില്‍. സ്‌കാനിങ്, എംആര്‍ഐ, പതിവ് പരിശോധനകള്‍ എന്നിവയെല്ലാം തുടരും. ഇതോടെ ഗില്‍ രണ്ടാം ടെസ്റ്റ് കളിച്ചേക്കില്ലെന്ന നിലയിലുള്ള റിപ്പോര്‍ട്ടുകളും പുറത്തു വരുന്നുണ്ട്.
രണ്ടാം ടെസ്റ്റ് ഗുവാഹത്തിയിലാണ് നടക്കുന്നത്. കൊല്‍ക്കത്തയില്‍ നിന്നു ബുധനാഴ്ചയാണ് ഇന്ത്യന്‍ ടീം ഗുവാഹത്തിയിലേക്ക് പോകുന്നത്. ഇന്ത്യന്‍ സംഘത്തിനൊപ്പം ഗില്ലും യാത്ര ചെയ്യുമെന്നാണ് നിലവില്‍ വരുന്ന വിവരം. പരിക്കിന്റെ അസ്വസ്ഥതകള്‍ മാറിയില്ലെങ്കില്‍ യാത്ര വ്യാഴാഴ്ചയിലേക്കു മാറ്റിയേക്കും. എന്നാല്‍ കളിക്കുന്ന കാര്യത്തില്‍ വ്യക്തതയില്ല. ഡോക്ടര്‍മാര്‍ താരത്തിനു മതിയായ വിശ്രമം വേണമെന്ന അഭിപ്രായമാണ് പങ്കിടുന്നത്.
ഒന്നാം ടെസ്റ്റില്‍ ഗില്ലിനു ബാറ്റ് ചെയ്യാന്‍ സാധിക്കാതെ വന്നതോടെ ഇന്ത്യയ്ക്കാണ് വമ്പന്‍ നഷ്ടം സംഭവിച്ചത്. മത്സരത്തില്‍ ഇന്ത്യ 124 റണ്‍സെന്ന ചെറിയ ലക്ഷ്യത്തിലേക്ക് ബാറ്റേന്തിയിട്ടും വെറും 93 റണ്‍സില്‍ ഓള്‍ ഔട്ടായിരുന്നു. ഗില്ലിന്റെ അഭാവത്തില്‍ ഇന്ത്യയുടെ 9 വിക്കറ്റുകള്‍ വീഴ്ത്തിയപ്പോള്‍ തന്നെ പ്രോട്ടീസ് ജയം സ്വന്തമാക്കി.
ഈ മാസം 22 മുതല്‍ 26 വരെയാണ് ഗുവാഹത്തിയിലെ അവസാന പോരാട്ടം. രണ്ട് മത്സരങ്ങളടങ്ങിയ പരമ്പര കൈവിടാതിരിക്കാന്‍ ഇന്ത്യയ്ക്ക് ജയം അനിവാര്യമാണ്. ദക്ഷിണാഫ്രിക്കയ്ക്ക് മത്സരം സമനിലയില്‍ ആക്കിയാലും നേട്ടമാണ്. പരമ്പര നേടി ചരിത്രമെവുതാനുള്ള അവസരമാണ് അവര്‍ക്കു മുന്നിലുള്ളത്. ജയിച്ചാല്‍ പരമ്പര തൂത്തുവാരാം. സമനിലയാണെങ്കിലും പരമ്പര 1-0ത്തിനു ഉറപ്പിക്കാം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
