ലണ്ടന്‍: വനിതാ ആഷസില്‍ ഇരട്ട സെഞ്ച്വറി നേടി ചരിത്രമെഴുതിയതിനു പിന്നാലെ വനിത ദി ഹണ്ട്രഡില്‍ ആദ്യ സെഞ്ച്വറി കുറിച്ച് മറ്റൊരു ചരിത്ര നേട്ടത്തിലേക്ക് നടന്നു കയറി ഇംഗ്ലണ്ട് വനിതാ ക്രിക്കറ്റ് താരം ടാമ്മി ബ്യുമോണ്ട്. വനിതാ ഹണ്ട്രഡില്‍ വെല്‍ഷ് ഫയറിന്റെ താരമാണ് ടാമ്മി. ടൂര്‍ണമെന്റിലെ ആദ്യ ശതകമാണ് താരം സ്വന്തം പേരില്‍ കുറിച്ചത്. ട്രെന്റ് റോക്കറ്റ്‌സിനെതിരായ പോരാട്ടത്തിലാണ് ചരിത്ര സെഞ്ച്വറിയുടെ പിറവി.
ടെസ്റ്റ് മത്സരത്തില്‍ ഇംഗ്ലണ്ടിനായി ഇരട്ട സെഞ്ച്വറി നേടുന്ന ആദ്യ വനിതാ
താരമെന്ന ചരിത്രമാണ് ഈയടുത്ത് താരം ആഷസ് പോരാട്ടത്തില്‍ സ്വന്തമാക്കിയത്. പിന്നാലെയാണ് സമാനമായ മറ്റൊരു നേട്ടം.
വനിതാ ടൂര്‍ണമെന്റില്‍ ഒരു താരം നേടുന്ന ആദ്യ ശതകമെന്ന അപൂര്‍വ നേട്ടമാണ് വെല്‍ഷ് ക്യാപ്റ്റന്‍ കൂടിയായ ടാമ്മി സ്വന്തം പേരില്‍ കുറിച്ചത്. 61 പന്തില്‍ 20 ഫോറും രണ്ട് സിക്‌സും സഹിതം താരം 118 റണ്‍സ് അടിച്ചെടുത്തു. മത്സരത്തില്‍ താരം നേടിയ സെഞ്ച്വറിയുടെ കരുത്തില്‍ ടീം മൂന്ന് വിക്കറ്റ് നഷ്ടത്തില്‍ 100 പന്തില്‍ 181 റണ്‍സ് സ്വന്തമാക്കി.
മറുപടി പറയാന്‍ ഇറങ്ങിയ ട്രെന്റ് റോക്കറ്റ്‌സിന്റെ പോരാട്ടം അഞ്ച് വിക്കറ്റ് നഷ്ടത്തില്‍ 140 റണ്‍സില്‍ അവസാനിച്ചു. 41 റണ്‍സിന്റെ വിജയമാണ് വെല്‍ഷ് നേടിയത്.
100 പന്തുകളാണ് ഓരോ ടീമും കളിക്കുക. ബൗളര്‍മാര്‍ക്ക് ഓവര്‍ കണക്കല്ല. പന്താണ് കണക്കാക്കുന്നത്. ഒരു ബൗളര്‍ക്ക് പരമാവധി 20 പന്തുകള്‍ എറിയാം.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
