ഏകദിന ചരിത്രത്തിലെ 44ാം സമനില പോരാട്ടമാണ് കൊളംബോയില്‍ കണ്ടത്. ഇന്ത്യയുടെ ക്രിക്കറ്റ് ചരിത്രത്തിലെ 10ാം ടൈ കെട്ടിയ മത്സരവും ഇതുതന്നെ. ശ്രീലങ്ക ഉയര്‍ത്തിയ 231 റണ്‍സ് വിജയ ലക്ഷ്യത്തിലേക്ക് കരുതലോടെ നീങ്ങിയ ഇന്ത്യക്ക് പക്ഷേ 230 എന്ന അതേ സ്‌കോറില്‍ മത്സരം അവസാനിപ്പിക്കേണ്ടി വന്നു. 13 പന്തുകള്‍ അപ്പോഴും ശേഷിക്കുന്നുണ്ടായിരുന്നു. ലങ്കന്‍ സ്പിന്നര്‍മാരുടെ മികവാണ് ഇന്ത്യയുടെ ജയം തടഞ്ഞത്.
1991ലാണ് ഇന്ത്യ ഏകദിന ചരിത്രത്തില്‍ ആദ്യമായി ടൈ കെട്ടിയ പോരാട്ടം അരങ്ങേറിയത്. വെസ്റ്റ് ഇന്‍ഡീസായിരുന്നു എതിരാളികള്‍. ഇരു ടീമുകളുടേയും പോരാട്ടം 126 റണ്‍സില്‍ തീര്‍ന്നു.
1993ല്‍ ഇന്ത്യയുടെ ഏകദിനത്തിലെ രണ്ടാം ടൈ. ഇന്ത്യക്ക് മുന്നില്‍ 247 റണ്‍സാണ് സിംബാബ്‌വെ വച്ചത്. അനായാസ ജയത്തിലേക്ക് നീങ്ങിയ ഇന്ത്യക്ക് പക്ഷേ 246 റണ്‍സില്‍ തന്നെ പോരാട്ടം അവസാനിപ്പിക്കേണ്ടി വന്നു.
ഇന്ത്യയും സിംബാബ്‌വെയും വീണ്ടും സമനിലയില്‍ പിരിഞ്ഞു. ഇത്തവണ ഇരു ടീമുകളും കണ്ടെത്തിയ 236 റണ്‍സ്. 1997ലാണ് ഈ പോരാട്ടം നടന്നത്.
ക്രിക്കറ്റ് ലോകം കണ്ട അസാമാന്യ ത്രില്ലര്‍. 2011ലെ ഐസിസി ലോകകപ്പിലായിരുന്നു ഇംഗ്ലണ്ടുമായുള്ള ഇന്ത്യയുടെ ടൈ. സച്ചിന്റെ സെഞ്ച്വറി ബലത്തില്‍ ഇന്ത്യ 338 അടിച്ചു. ഇംഗ്ലണ്ട് ആന്‍ഡ്രു സ്‌ട്രോസിന്റെ മികവില്‍ 338ല്‍ എത്തി.
2011ല്‍ തന്നെ ഇന്ത്യയും ഇംഗ്ലണ്ടും വീണ്ടും ടൈ കെട്ടി. ഇരു ടീമുകളും 270 റണ്‍സാണ് എടുത്തത്. മഴ പെയ്ത് കളി തടസപ്പെട്ട ഘട്ടത്തില്‍ ഡെക്ക്‌വര്‍ത്ത് ലൂയീസ് നിയമമാണ് ടൈയില്‍ പിരിയാന്‍ അടിസ്ഥാനമാക്കിയത്.
2012ല്‍ ശ്രീലങ്കക്കെതിരായ പോരാട്ടം. കോമണ്‍വെല്‍ത്ത് ബാങ്ക് സീരീസിലാണ് ഈ പോരാട്ടാം. ഇരു ടീമുകളും 236 റണ്‍സില്‍ ഒതുങ്ങി.
മറ്റൊരു ത്രില്ലര്‍. 2014ല്‍ ഓക്ക്‌ലന്‍ഡിലെ ഈഡന്‍ പാര്‍ക്കില്‍ നടന്ന പോരാട്ടം. ഇരു ടീമുകളും 314 റണ്‍സില്‍ പിരിഞ്ഞു.
അഫ്ഗാനിസ്ഥാന്റെ അമ്പരപ്പിക്കുന്ന തിരിച്ചു വരവ് കണ്ട പോരാട്ടം. അന്ന് ഇരു ടീമുകളും 252 റണ്‍സുമായി കളം വിട്ടു. 2018ലെ ഏഷ്യാ കപ്പിലാണ് ഈ ത്രില്ലര്‍.
വിന്‍ഡീസിനെതിരെ മറ്റൊരു ടൈ. ഇരു ടീമുകളും 321 റണ്‍സ് കണ്ടെത്തി. ഷായ് ഹോപ് നേടിയ അവസാന പന്തിലെ 4 റണ്‍സ് ഇന്ത്യയുടെ ജയം തടഞ്ഞു. 2018ലാണ് ഈ മത്സരം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
