തിലക് വർമ തിരിച്ചെത്തുന്നു, സന്നാഹ മത്സരം കളിക്കും; ഇന്ത്യൻ ടീമിന് ആശ്വാസം

മുംബൈ: ഇന്ത്യയുടെ ലോകകപ്പ് ടീമിലേക്ക് തിലക് വർമ തിരിച്ചെത്തുന്നു. പരിക്കിനെത്തുടർന്ന് ശസ്ത്രക്രിയയ്ക്ക് വിധേയനായ താരം കായികക്ഷമത വീണ്ടെടുത്തതായി ബിസിസിഐയുടെ സെന്റർ ഓഫ് എക്സലൻസ് അറിയിച്ചു. ഇതോടെ ലോകകപ്പിന് മുന്നോടിയായുള്ള രണ്ട് സന്നാഹ മത്സരങ്ങളിൽ താരം കളിക്കുമെന്ന് ഉറപ്പായി.

ഫെബ്രുവരി 2-ന് മുംബൈയിലെ ഡി വൈ പാട്ടീൽ സ്റ്റേഡിയത്തിലാണ് ഇന്ത്യ എ – യുഎസ്എ ആദ്യ സന്നാഹ മത്സരം. ഫെബ്രുവരി 4-ന് ദക്ഷിണാഫ്രിക്കയ്‌ക്കെതിരായ ഇന്ത്യയുടെ ഔദ്യോഗിക സന്നാഹ മത്സരത്തിലും തിലക് കളിക്കും. ഇരു മത്സരങ്ങളിലും താരത്തിന്റെ പ്രകടനത്തിന്റെ അടിസ്ഥാനത്തിലാകും ഇന്ത്യൻ ടീമിന്റെ ആദ്യ ഇലവനിൽ അവസരം ലഭിക്കുക.

രഞ്ജി ട്രോഫി മത്സരത്തിനിടെയാണ് താരത്തിന് പരിക്കേറ്റത്. ഇതോടെ ന്യൂസിലൻഡിനെതിരായ ടി20 പരമ്പരയിൽ തിലകിനെ ഒഴിവാക്കിയിരുന്നു. ടി20 ഫോർമാറ്റിൽ മികച്ച പ്രകടനം കാഴ്ചവെച്ചിട്ടുള്ള തിലകിന്റെ വരവ് ഇന്ത്യൻ ടീമിന് ഗുണകരമാകും.