അംപയറുടെ മുന്നറിയിപ്പ് അവഗണിച്ചു; ടിം ഡേവിഡിന് കനത്ത ശിക്ഷ - വിഡിയോ

മുംബൈ: ഐപിഎല്ലിൽ പെരുമാറ്റച്ചട്ടം ലംഘിച്ചതിന് ടിം ഡേവിഡിനെതിരെ നടപടി. മുംബൈ ഇന്ത്യൻസിനെതിരായ മത്സരത്തിൽ അംപയരുടെ നിർദ്ദേശം അവഗണിച്ചതിനാണ് താരത്തിനെതിരെ നടപടി സ്വീകരിച്ചത്. ഇന്ത്യൻ പ്രീമിയർ ലീഗ് പെരുമാറ്റച്ചട്ടത്തിന്റെ ലെവൽ 1 ലംഘിച്ചതിന് ടിം ഡേവിഡിന് മാച്ച് ഫീയുടെ 25 ശതമാനം പിഴയും ഒരു ഡീമെറിറ്റ് പോയിന്റുമാണ് ശിക്ഷ.

വാംഖഡെ സ്റ്റേഡിയത്തിൽ കഴിഞ്ഞ ദിവസം നടന്ന മത്സരത്തിനിടെയാണ് സംഭവം. മത്സരത്തിനിടെ പന്ത് മാറ്റേണ്ട സാഹചര്യം വന്നിരുന്നു. അംപയർമാർ തെരഞ്ഞെടുത്ത പുതിയ പന്ത് ടിം ഡേവിഡ് കയ്യിലെടുക്കുകയും നിരവധി തവണ മുകളിലേക്ക് എറിഞ്ഞ് പരിശോധിക്കുകയും ചെയ്തു.

പല തവണ അംപയർമാർ പന്ത് തിരിച്ചു നൽകണമെന്ന് ആവശ്യപ്പെട്ടെങ്കിലും ഇതിന് വഴങ്ങാൻ ഡേവിഡ് തയ്യാറായില്ല. ഇത് കാരണം മത്സരം കുറച്ച് സമയം തടസപ്പെട്ടിരുന്നു.

പിന്നീട്, അംപയർമാരുടെ മുന്നറിയിപ്പിനെ തുടർന്ന് ടിം ഡേവിഡ് പന്ത് തിരികെ നൽകിയെങ്കിലും സംഭവം മാച്ച് റഫറി റിപ്പോർട്ട് ചെയ്തിരുന്നു. ഇതോടെയാണ് താരത്തിന്റെ ഈ പ്രവർത്തി അച്ചടക്ക ലംഘനമായി കണക്കാക്കി ശിക്ഷ വിധിച്ചത്.