ആറാം പോരാട്ടത്തില്‍ മാഞ്ചസ്റ്റര്‍ യുനൈറ്റഡ് ടോട്ടനം ഹോട്‌സ്പറിനോടു ദയനീയമായി പരാജയപ്പെട്ടു. മറുപടിയില്ലാത്ത 3 ഗോളുകള്‍ക്കാണ് സ്‌പേര്‍സിന്റെ ജയം.
സ്വന്തം മൈതാനമായ ഓള്‍ഡ് ട്രഫോര്‍ഡിലാണ് മാഞ്ചസ്റ്റര്‍ പരാജയപ്പെട്ടത്. സീസണില്‍ അവരുടെ മൂന്നാം തോല്‍വിയാണിത്. രണ്ട് ജയങ്ങള്‍ മാത്രമാണ് നിലവില്‍. ഒരു പോരാട്ടം സമനില.
ബ്രെണ്ണന്‍ ജോണ്‍സന്‍, ഡിജെന്‍ കുലുസേവ്‌സ്‌കി, ഡൊമിനിക്ക് സോളങ്കെ എന്നിവരാണ് സ്‌പേര്‍സിനായി വല ചലിപ്പിച്ചത്. 3ാം മിനിറ്റില്‍ തന്നെ ബ്രെണ്ണന്‍ ലീഡ് സമ്മാനിച്ചു. ശേഷിച്ച ഗോളുകള്‍ 47, 77 മിനിറ്റുകളിലും പിറന്നു.
കളി ആദ്യ പകുതിയുടെ അവസാനത്തിലേക്ക് കടന്നപ്പോള്‍ മാഞ്ചസ്റ്റര്‍ യുനൈറ്റഡിന്റെ നിര്‍ണായക താരം ബ്രുണോ ഫെര്‍ണാണ്ടസ് ചുവപ്പ് കാര്‍ഡ് വാങ്ങി പുറത്തായി. ഇതോടെ 10 പോരായാണ് മാഞ്ചസ്റ്റര്‍ ശേഷിച്ച സമയം കളിച്ചത്. ഇതും അവരെ ബാധിച്ചു.
പ്രീമിയര്‍ ലീഗ് പോയിന്റ് പട്ടികയില്‍ മാഞ്ചസ്റ്റര്‍ യുനൈറ്റഡ് 12ാം സ്ഥാനത്ത്. 6 കളിയില്‍ നിന്നു അവര്‍ക്ക് 7 പോയിന്റുകള്‍.
ഉനായ് എംറിയുടെ ആസ്റ്റന്‍ വില്ലയെ ഇപ്‌സ്‌വിച് ടൗണ്‍ സ്വന്തം തട്ടകത്തില്‍ സമനിലയില്‍ കുരുക്കി. 2-2നാണ് പോരാട്ടം സമനിലയായത്. ഇപ്‌സ്‌വിചിനായി ലിയാം ഡെലാപ് ഇരട്ട ഗോളുകള്‍ നേടി. ആസ്റ്റന്‍ വില്ല നിലവില്‍ പോയിന്റ് പട്ടികയില്‍ അഞ്ചാം സ്ഥാനത്ത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
