ഷാര്‍ജ: അണ്ടര്‍ 19 ഏഷ്യാ കപ്പ് ക്രിക്കറ്റില്‍ ഇന്ത്യക്ക് തകര്‍പ്പന്‍ ജയം. ആദ്യ മത്സരത്തില്‍ പാകിസ്ഥാനോട് പരാജയപ്പെട്ട ഇന്ത്യ രണ്ടാം പോരാട്ടത്തില്‍ ജപ്പാനെ തകര്‍ത്തെറിഞ്ഞു. 211 റണ്‍സിന്റെ കൂറ്റന്‍ ജയമാണ് ഇന്ത്യന്‍ കൗമാരപ്പട സ്വന്തമാക്കിയത്.
ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറില്‍ 6 വിക്കറ്റ് നഷ്ടത്തില്‍ 339 റണ്‍സെന്ന കൂറ്റന്‍ സ്‌കോറാണ് സ്വന്തമാക്കിയത്. വമ്പന്‍ ലക്ഷ്യത്തിലേക്ക് ബാറ്റേന്തിയ ജപ്പാന്‍ 8 വിക്കറ്റ് നഷ്ടത്തില്‍ 128 റണ്‍സെടത്ത് പോരാട്ടം അവസാനിപ്പിച്ചു.
111 പന്തുകള്‍ നേരിട്ട് 50 റണ്‍സെടുത്ത ഓപ്പണര്‍ ഹ്യുഗോ കെല്ലിയാണ് ജപ്പാന്റെ ടോപ്പ് സ്‌കോറര്‍. പുറത്താകാതെ നിന്ന് 68 പന്തുകള്‍ പ്രതിരോധിച്ച് 35 റണ്‍സെടുത്ത ചാള്‍സ് ഹിന്‍സാണ് മികവ് കാട്ടിയ മറ്റൊരാള്‍. സഹ ഓപ്പണര്‍ നിഹാര്‍ പാര്‍മറാണ് രണ്ടക്കം കടന്ന മൂന്നാമന്‍. താരം 14 റണ്‍സെടുത്തു.
ഇന്ത്യക്കായി ചേതന്‍ ശര്‍മ, ഹര്‍ദിക് രാജ്, കാര്‍ത്തികേയ എന്നിവര്‍ രണ്ട് വീതം വിക്കറ്റുകള്‍ സ്വന്തമാക്കി. യുധജിത് സിങ് ഒരു വിക്കറ്റെടുത്തു.
നേരത്തെ ക്യാപ്റ്റന്‍ മുഹമ്മദ് അമാന്‍ പുറത്താകാതെ നിന്നു നേടിയ ഉജ്ജ്വല സെഞ്ച്വറിയുടെ മികവിലാണ് ഇന്ത്യ കൂറ്റന്‍ സ്‌കോറിലെത്തിയത്. നായകന്‍ 118 പന്തുകള്‍ നേരിട്ട് 7 ഫോറുകള്‍ സഹിതം 122 റണ്‍സെടുത്തു.
ഓപ്പണര്‍ ആയുഷ് മാത്രെ (54), കാര്‍ത്തികേയ (57) എന്നിവര്‍ അര്‍ധ സെഞ്ച്വറികള്‍ സ്വന്തമാക്കി. ആയുഷ് 29 പന്തുകള്‍ നേരിട്ട് 6 ഫോറും 4 സിക്‌സും സഹിതമാണ് 54ല്‍ എത്തിയത്. കാര്‍ത്തികേയ 5 ഫോറും ഒരു സിക്‌സും പറത്തി. ഐപിഎല്‍ ലേലത്തില്‍ രാജസ്ഥാന്‍ കോടികള്‍ മുടക്കി സ്വന്തമാക്കിയ 13കാരന്‍ വൈഭവ് സൂര്യവംശി 23 പന്തില്‍ 23 റണ്‍സെടുത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
