ന്യൂഡല്‍ഹി: ഐസിസിയുടെ ഏകദിന ബാറ്റര്‍മാരുടെ പുതുക്കിയ റാങ്കിങ് പട്ടികയില്‍ ഇന്ത്യന്‍ താരങ്ങളായ രോഹിത് ശര്‍മയുടെയും വിരാട് കോഹ്ലിയുടെയും പേരുകള്‍ അപ്രത്യക്ഷമായി. ബുധനാഴ്ച പുതുക്കിയ പുതിയ റാങ്കിങ് പട്ടികയിലാണ് ഇരുവരുടെയും പേരുകള്‍ അപ്രത്യക്ഷമായത്.
ഐസിസി നിയമങ്ങള്‍ അനുസരിച്ച്, വിരമിച്ചതിന് ശേഷമാകും ഒരു കളിക്കാരന്റെ പേര് ഐസിസി റാങ്കിങ്ങില്‍ നിന്ന് നീക്കുക. എന്നാല്‍ കോഹ്ലിയും രോഹിതും ടി20, ടെസ്റ്റ് ഫോര്‍മാറ്റുകളില്‍ നിന്ന് വിരമിച്ചു കഴിഞ്ഞ ഇരുവരും ഏകദിന ഫോര്‍മാറ്റില്‍ തുടരുന്നുണ്ട്. ഈ വര്‍ഷം ഇരുവരും ഏഴ് ഏകദിനങ്ങള്‍ (രോഹിത് - എട്ട്) കളിച്ചു.
രോഹിത് നിലവില്‍ ഏകദിന ടീമിന്റെ ക്യാപ്റ്റനാണ്. 2025 ഫെബ്രുവരിയില്‍ ഇംഗ്ലണ്ടിനെതിരായ ദ്വിരാഷ്ട്ര പരമ്പരയിലെ മൂന്ന് ഏകദിനങ്ങളിലും രോഹിത് ഇന്ത്യയെ നയിച്ചു, തുടര്‍ന്ന് 2025 ലെ ഐസിസി ചാംപ്യന്‍സ് ട്രോഫിയില്‍ ഇന്ത്യയ്ക്ക് തുടര്‍ച്ചയായി അഞ്ച് വിജയങ്ങളിലേക്ക് എത്തിച്ചിരുന്നു.
ഓഗസ്റ്റ് 13-ന് പുറത്തിറങ്ങിയ ഏകദിന റാങ്കിങ്ങില്‍ 756 പോയന്റുമായി രോഹിത് രണ്ടാം സ്ഥാനത്തും 736 പോയന്റുമായി കോഹ് ലി നാലാം സ്ഥാനത്തുമായിരുന്നു. ഈ റാങ്കിങ് പുറത്തിറങ്ങി ഒരാഴ്ച കഴിഞ്ഞപ്പോഴാണ് പട്ടികയില്‍ മാറ്റമുണ്ടായിരിക്കുന്നത്. വര്‍ഷങ്ങളായി റാങ്കിങ്ങില്‍ ആദ്യ പത്തില്‍ തുടരുന്ന ഇരുവരുടെയും പേര് അപ്രത്യക്ഷമായത് ആരാധകരെയും ഞെട്ടിച്ചു. സാങ്കേതിക തകരാറിനെ തുടര്‍ന്നാണ് ഇങ്ങനെ സംഭവിച്ചതെന്നാണ് റിപ്പോര്‍ട്ട്. പ്രശ്‌നം പരിഹരിച്ചെങ്കിലും ഇക്കാര്യത്തില്‍ ഐസിസിയുടെ പ്രതികരിച്ചിട്ടില്ല.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
