'ഇന്ത്യൻ താരങ്ങൾ പണക്കാർ, പാവപ്പെട്ട രാജ്യങ്ങളിൽ കളിക്കില്ല!'

മുംബൈ: ഇന്ത്യൻ താരങ്ങൾ എന്തുകൊണ്ടാണ് വിദേശ ക്രിക്കറ്റ് ലീ​ഗുകളിൽ കളിക്കാത്തതെന്ന ഓസ്ട്രേലിയൻ ഇതിഹാസം ആദം ​ഗിൽക്രിസ്റ്റിന്റെ ചോദ്യത്തിന് രസകരമായ മറുപടിയുമായി ഇന്ത്യൻ ഇതിഹാസം വീരേന്ദർ സെവാ​ഗ്. ഇരുവരും ഒരു യുട്യൂബ് വീഡിയോയിൽ സംസാരിക്കവെ രസകരമായ മറുപടികളാണ് സെവാ​ഗ് നൽകുന്നത്.

ഇന്ത്യൻ താരങ്ങൾ പണക്കാരാണ്. അതുകൊണ്ടു തന്നെ അവർക്ക് വിദേശ ലീ​ഗുകളിൽ കളിക്കാൻ പോകേണ്ട കാര്യമില്ല എന്നായിരുന്നു സെവാ​ഗിന്റെ മറുപടി.

'ഇന്ത്യൻ താരങ്ങൾ ഭാവിയിൽ വിദേശ ലീ​ഗുകളുടെ ഭാ​ഗമാകുമോ എന്നായിരുന്നു ​ഗിൽക്രിസ്റ്റിന്റെ ചോദ്യം. ഞങ്ങൾ ഇന്ത്യക്കാർ പണക്കാരാണ്. അതുകൊണ്ടു വിദേശ ലീ​ഗുകൾ ആവശ്യമില്ല. പാവപ്പെട്ട രാജ്യങ്ങളിലേക്ക് ഞങ്ങൾ പോകില്ല- സെവാ​ഗ് വ്യക്തമാക്കി.'

വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍

തനിക്ക് ബി​ഗ് ബാഷ് ലീ​ഗിൽ നിന്നു ഓഫർ വന്നതായും സെവാ​ഗ് പറഞ്ഞു.

'ഇന്ത്യൻ ടീമിൽ നിന്നു പുറത്തായപ്പോൾ ഞാൻ ഐപിഎല്ലിൽ കളിക്കുന്നുണ്ടായിരുന്നു. ആ സമയത്ത് എനിക്കു ബി​ഗ് ബാഷ് ലീ​ഗിൽ നിന്നു ഓഫറും ലഭിച്ചു. ഒരു ലക്ഷം ഡോളർ വരെ പ്രതിഫലമായി തരാമെന്നായിരുന്നു ഓഫർ. അവധിക്കാലത്തെ ചെലവിനു മാത്രമേ ആ പണം തികയു എന്നായിരുന്നു ഞാൻ മറുപടി പറഞ്ഞത്. കഴിഞ്ഞ ദിവസം രാത്രിയിലെ ബിൽ മാത്രം ഒരു ലക്ഷം ഡോളറിൽ കൂടുതൽ ഉണ്ടെന്നു അവരോടു പറഞ്ഞു'- സെവാ​ഗ് വെളിപ്പെടുത്തി.

നിലവിൽ ഇന്ത്യൻ താരങ്ങൾക്ക് വിദേശ ലീ​ഗുകളിൽ കളിക്കാൻ ബിസിസിഐ അനുമതിയില്ല. അന്താരാഷ്ട്ര ക്രിക്കറ്റിൽ നിന്നു വിരമിച്ചാൽ താരങ്ങൾക്ക് വിദേശ ലീ​ഗിൽ കളിക്കുന്നതിനു തടസമില്ല.