ന്യൂഡല്‍ഹി: സൗത്ത് ആഫ്രിക്കന്‍ പര്യടനത്തിനുള്ള ടെസ്റ്റ് ടീമില്‍ രോഹിത് ശര്‍മയ്ക്ക് പകരം പ്രിയങ്ക് പഞ്ചാലിനെ പകരക്കാരനായി ഉള്‍പ്പെടുത്തിയത് ചര്‍ച്ചയാവുന്നു. അഭിമന്യു ഈശ്വരനെ പരിഗണിക്കാതിരുന്നതാണ് ചോദ്യം ചെയ്യപ്പെടുന്നത്.
ഇന്ത്യയുടെ കഴിഞ്ഞ ഇംഗ്ലണ്ട് പര്യടനത്തില്‍ ടെസ്റ്റ് ടീമില്‍ അഭിമന്യൂ ഈശ്വരന്‍ ഉള്‍പ്പെട്ടിരുന്നു. എന്നാല്‍ ഇംഗ്ലണ്ടിന്റെ ക്വാളിറ്റി പേസര്‍മാര്‍ക്കെതിരെ അഭിമന്യൂ ഈശ്വരനെ കളിപ്പിക്കാന്‍ സാധിക്കില്ലെന്ന നിലപാടാണ് ഇന്ത്യന്‍ ടീം മാനേജ്‌മെന്റ് ആ സമയം സ്വീകരിച്ചത്.
ഇക്കഴിഞ്ഞ ഇന്ത്യ എയുടെ സൗത്ത് ആഫ്രിക്കന്‍ പര്യടനത്തില്‍ 41 എന്ന ശരാശരിയില്‍ 205 റണ്‍സ് ആണ് അഭിമന്യു നേടിയത്. എന്നിട്ടും രോഹിത്തിന് പരിക്കേറ്റപ്പോള്‍ പകരം താരമായി ഇന്ത്യന്‍ സംഘത്തില്‍ ഉള്‍പ്പെടുത്താന്‍ സെലക്ടര്‍മാര്‍ തയ്യാറായില്ല.
96,24,0,31 എന്നാണ് ഇന്ത്യ എയുടെ സൗത്ത് ആഫ്രിക്കന്‍ പര്യടനത്തിലെ ചതുര്‍ദിന ടെസ്റ്റ് പരമ്പരയിലെ പ്രിയങ്കിന്റെ സ്‌കോര്‍. 103,0,55,28,19 എന്നതാണ് അഭിമന്യുവിന്റെ സ്‌കോര്‍. ഇവിടെ അഭിമന്യുവിനെ തഴഞ്ഞ് പ്രിയങ്കിനെ ടീമിലേക്ക് എടുത്തതിന്റെ കാരണമാണ് വ്യക്തമാവാത്തത്.
ഫസ്റ്റ് ക്ലാസ് മത്സരങ്ങളില്‍ പരിചയസമ്പന്നനായ പ്രിയങ്ക്
100 ഫസ്റ്റ് ക്ലാസ് മത്സരങ്ങള്‍ കളിച്ച താരമാണ് പ്രിയങ്ക്. 7000 ഫസ്റ്റ് ക്ലാസ് റണ്‍സില്‍ 24 സെഞ്ചുറിയും 25 അര്‍ധ ശതകവും ഉള്‍പ്പെടുന്നു. 314 ആണ് ഉയര്‍ന്ന സ്‌കോര്‍. 2016-17 രഞ്ജി ട്രോഫി സീസണില്‍ 1300 റണ്‍സും പ്രിയങ്ക് നേടി. ബൗളിങ്ങില്‍ 22 വിക്കറ്റും പ്രിയങ്കിന്റെ അക്കൗണ്ടിലുണ്ട്. ടീം ആവശ്യപ്പെടുന്ന ഘട്ടങ്ങളില്‍ ബ്രേക്ക്ത്രൂ നല്‍കാന്‍ സാധിക്കുന്ന ബൗളറുമാണ് പ്രിയങ്ക്.
സൗത്ത് ആഫ്രിക്കയില്‍ കെഎല്‍ രാഹുലും മായങ്ക് അഗര്‍വാളും ആയിരിക്കും ഇന്ത്യക്കായി ഇന്നിങ്‌സ് ഓപ്പണ്‍ ചെയ്യുക. കെഎല്‍ രാഹുലിന് പരിക്കേറ്റിരുന്നു എങ്കിലും സൗത്ത് ആഫ്രിക്കയ്‌ക്കെതിരായ ടെസ്റ്റ് പരമ്പര എത്തുമ്പോഴേക്കും തിരിച്ചെത്തും എന്നാണ് കണക്കാക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
