ലണ്ടന്‍: ലോക ഒന്നാം നമ്പര്‍ താരം ഇറ്റലിയുടെ യാന്നിക് സിന്നര്‍ വിംബിള്‍ഡണ്‍ ടെന്നീസ് പോരാട്ടത്തിന്റെ ക്വാര്‍ട്ടറിലേക്ക് രക്ഷപ്പെട്ടെത്തി! പ്രീ ക്വാര്‍ട്ടറില്‍ ആദ്യ രണ്ട് സെറ്റുകള്‍ നഷ്ടപ്പെട്ട് പുറത്താകുന്നതിന്റെ വക്കില്‍ നിന്നാണ് താരം ക്വാര്‍ട്ടറിലേക്ക് മുന്നേറിയത്.
എതിരാളിയായ ബള്‍ഗേറിയയുടെ ഗ്രിഗോര്‍ ദിമിത്രോവ് ആദ്യ രണ്ട് സെറ്റ് നേടി, മൂന്നാം സെറ്റില്‍ സമനില പിടിച്ച് നില്‍ക്കെ പരിക്കേറ്റ് പുറത്തായതോടെയാണ് സിന്നറുടെ കടന്നുകൂടല്‍. ആദ്യ സെറ്റില്‍ ദിമിത്രോവ് 6-3നും രണ്ടാം സെറ്റില്‍ 7-5നും വിജയിച്ചിരുന്നു. മൂന്നാം സെറ്റ് 2-2ല്‍ നില്‍ക്കെയാണ് താരത്തിനു പരിക്കേറ്റത്. പിന്നാലെയാണ് പിന്‍മാറ്റം.
ചരിത്ര നേട്ടത്തിലേക്ക് കണ്ണുംനട്ട്
24 ഗ്രാന്‍ഡ് സ്ലാമുകളുള്ള ഏക പുരുഷ താരമായ സെര്‍ബിയന്‍ ഇതിഹാസം നൊവാക് ജോക്കോവിചും ക്വാര്‍ട്ടറിലേക്ക് കടന്നു. താരം പ്രീ ക്വാര്‍ട്ടറില്‍ ഓസ്‌ട്രേലിയയുടെ യുവ താരം അലക്‌സ് ഡി മിനൗറിനെ നേരിട്ടുള്ള സെറ്റുകള്‍ക്ക് വീഴ്ത്തി.
ആദ്യ സെറ്റ് കൈവിട്ട ശേഷം ജോക്കോ ഉജ്ജ്വലമായി തിരിച്ചടിക്കുകയായിരുന്നു. സ്‌കോര്‍: 1-6, 6-4, 6-4, 6-4.
25 ഗ്രാന്‍ഡ് സ്ലാമുകള്‍ നേടുന്ന ടെന്നീസ് ചരിത്രത്തിലെ തന്നെ ആദ്യ താരമെന്ന അനുപമ ചരിത്രമെഴുതാനുള്ള കാത്തിരിപ്പിലാണ് ഏറെ നാളായി ജോക്കോവിച്. കരിയറിന്റെ സായാഹ്നത്തിലുള്ള താരം പ്രിയപ്പെട്ട ടൂര്‍ണമെന്റില്‍ ടെന്നീസ് ചരിത്രത്തെ മാറ്റിയെഴുതുമോ എന്നറിയാന്‍ ഇനി വേണ്ടത് 3 ജയങ്ങളാണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
