വഡോദര: വനിതാ പ്രീമിയര്‍ ലീഗില്‍ അവസാന പന്ത് വരെ നീണ്ട ത്രില്ലര്‍ പോര്. നാടകീയ ജയം പിടിച്ച് ഡല്‍ഹി ക്യാപിറ്റല്‍സ് പുതിയ സീസണ് ഗംഭീര തുടക്കമിട്ടു. വീഴ്ത്തിയത് മുംബൈ ഇന്ത്യന്‍സിനെ. രണ്ട് വിക്കറ്റിന്റെ ത്രില്ലര്‍ ജയമാണ് ഡല്‍ഹി സ്വന്തമാക്കിയത്.
ആദ്യം ബാറ്റ് ചെയ്ത മുംബൈ 19.1 ഓവറില്‍ 164 റണ്‍സിന് ഓള്‍ ഔട്ടായി. ഡല്‍ഹി 8 വിക്കറ്റ് നഷ്ടത്തില്‍ 165 റണ്‍സ് ചേര്‍ത്താണ് ജയം പിടിച്ചത്. അണ്ടര്‍ 19 വനിതാ ടി20 ലോകകപ്പില്‍ ഇന്ത്യയെ കിരീടത്തിലേക്ക് നയിച്ച നികി പ്രസാദ് ഡല്‍ഹിക്കായുള്ള അരങ്ങേറ്റം ഗംഭീരമാക്കി. താരം 33 പന്തില്‍ 35 റണ്‍സെടുത്തു ടീം ജയത്തില്‍ നിര്‍ണായകമായി. കളിയിലെ താരവും നികി തന്നെ.
അവസാന ഓവറില്‍ ഡല്‍ഹിക്ക് 6 പന്തില്‍ 10 റണ്‍സായിരുന്നു വേണ്ടിയിരുന്നത്. മുംബൈക്കായി അവസാന ഓവര്‍ എറിഞ്ഞത് മലയാളി താരം സജന സജീവന്‍. താരത്തിന്റെ ആദ്യ പന്ത് നികി പ്രസാദ് ഫോറാക്കി മാറ്റി. ഇതോടെ 5 പന്തില്‍ 6 റണ്‍സായി ലക്ഷ്യം. രണ്ടാം പന്തില്‍ നികി 2 റണ്‍സ് കണ്ടെത്തി. ലക്ഷ്യം 4 പന്തില്‍ 4. മൂന്ന്, നാല് പന്തുകളില്‍ സിംഗിള്‍. ലക്ഷ്യം ഇതോടെ 2 പന്തില്‍ 2 എന്നായി. എന്നാല്‍ അഞ്ചാം പന്തില്‍ സജന ഡല്‍ഹിയെ ഞെട്ടിച്ച് നികി പ്രസാദിനെ മടക്കി. ഇതോടെ അവസാന പന്തില്‍ 2 റണ്‍സ് ലക്ഷ്യം. ബാറ്റിങ് ക്രീസില്‍ അരുന്ധതി റെഡ്ഡി. നേരിട്ട ആദ്യ പന്തില്‍ തന്നെ താരം 2 റണ്‍സെടുത്തു ടീമിനെ ജയത്തിലുമെത്തിച്ചു.
നികി പ്രസാദിനു പുറമെ ഓപ്പണര്‍ ഷെഫാലി വര്‍മ കൂറ്റനടികളുമായി കളം വാണ് ടോപ് സ്‌കോററായി. താരം 18 പന്തില്‍ 2 സിക്‌സും 7 ഫോറും സഹിതം 43 റണ്‍സ് കണ്ടെത്തി. 10 പന്തില്‍ രണ്ട് ഫോറും ഒരു സിക്‌സും സഹിതം 21 റണ്‍സ് വാരി സാറ ബ്രയ്‌സും ഡല്‍ഹിക്കായി നിര്‍ണായക സംഭാവന നല്‍കി. ക്യാപ്റ്റന്‍ മെഗ് ലാന്നിങ് 15 റണ്‍സ് കണ്ടെത്തി.
നേരത്തെ നാറ്റ് സിവര്‍ ബ്രാന്‍ഡിന്റെ കിടിലന്‍ അര്‍ധ സെഞ്ച്വറിയാണ് മുംബൈക്ക് പൊരുതാവുന്ന സ്‌കോര്‍ സമ്മാനിച്ചത്. മൂന്നാമതായി ക്രീസിലെത്തിയ നാറ്റ് സിവര്‍ പിന്നീട് ഒരറ്റം കാത്തെങ്കിലും മറുഭാഗത്ത് താരങ്ങളുടെ ഘോഷയാത്രയായിരുന്നു.
നാറ്റ് സിവര്‍ 59 പന്തില്‍ 13 ഫോറുകള്‍ സഹിതം 80 റണ്‍സുമായി പുറത്താകാതെ നിന്നു. ക്യാപ്റ്റന്‍ ഹര്‍മന്‍പ്രീത് കൗര്‍ 22 പന്തില്‍ 3 സിക്‌സും 4 ഫോറും സഹിതം 42 റണ്‍സ് എടുത്തു. ഇരുവരും ചേര്‍ന്നുള്ള കൂട്ടുകെട്ടാണ് നിര്‍ണായകമായത്. 11 റണ്‍സെടുത്ത യസ്തിക ഭാട്ടിയയാണ് രണ്ടക്കം കടന്ന മറ്റൊരാള്‍.
ഡല്‍ഹിക്കായി ശിഖ പാണ്ഡെ മികച്ച ബൗളിങ് പുറത്തെടുത്തു. 4 ഓവറില്‍ 14 റണ്‍സ് മാത്രം വഴങ്ങി താരം 2 വിക്കറ്റെടുത്തു. അന്നബെല്‍ സതര്‍ലാന്‍ഡ് മൂന്നും മിന്നു മണി, അലിസ് കാപ്‌സി എന്നിവര്‍ ഓരോ വിക്കറ്റും സ്വന്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
