ലണ്ടന്: ശ്രീലങ്കയില് പര്യടനത്തിന് എത്തുന്ന ഇംഗ്ലണ്ട് ക്രിക്കറ്റ് ടീം അംഗങ്ങള് പരസ്പരവും എതിര് ടീം അംഗങ്ങളുമായും ഹസ്തദാനം ചെയ്യില്ല. കൊറോണ വൈറസ് ലോക വ്യാപകമായി പടരുന്ന പശ്ചാത്തലത്തിലാണ് ഇത്തരമൊരു മുന്കരുതലെടുക്കാന് ഇംഗ്ലണ്ട് തീരുമാനിച്ചത്.
ശ്രീലങ്കന് പര്യടനത്തിനായി ടീം യാത്ര പുറപ്പെടും മുന്പ് ക്യാപ്റ്റന് ജോ റൂട്ടാണ് ഇക്കാര്യം വെളിപ്പെടുത്തിയത്. താരങ്ങള് തമ്മില് തമ്മില് കൈ കൊടുക്കില്ല. പകരം ടീം അംഗങ്ങള് തമ്മില് മുഷ്ടി ചുരുട്ടി അഭിവാദ്യം പ്രകടിപ്പിക്കുക മാത്രം ചെയ്യും. ഈയടുത്ത് കഴിഞ്ഞ ഇംഗ്ലണ്ടിന്റെ ദക്ഷിണാഫ്രിക്കന് പര്യടനത്തിനിടെ ടീം അംഗങ്ങളില് പലര്ക്കും ആരോഗ്യ പ്രശ്നങ്ങള് നേരിടേണ്ടി വന്നിരുന്നു. ഈയൊരു പശ്ചാത്തലവും തീരുമാനത്തിന് പിന്നിലുണ്ട്.
'ദക്ഷിണാഫ്രിക്കന് പര്യടനത്തിനിടെ ആരോഗ്യ പ്രശ്നങ്ങള് ടീമിന്റെ പ്രകടനത്തെ സാരമായി തന്നെ ബാധിച്ചിരുന്നു. അതിനാല് തന്നെ സമ്പര്ക്കത്തിലെ നിയന്ത്രണങ്ങള് സംബന്ധിച്ച് ടീമിലെ മെഡിക്കല് സംഘത്തിന്റെ നിര്ദേശങ്ങള് കൃത്യമായി പാലിക്കാന് ഞങ്ങള് ബാധ്യസ്ഥരാണ്. അണുക്കളും ബാക്ടീരിയയും പകരുന്നത് തടയാന് മെഡിക്കല് സംഘം വലിയ സഹായമാണ് ചെയ്യുന്നത്. എല്ലായ്പ്പോഴും ഹാന്ഡ് വാഷ് ഉപയോഗിച്ച് കൈകള് വൃത്തിയായി കഴുകും. ആന്റി ബാക്ടീരിയല് ജെല്ലുകളടക്കമുള്ളവ കൈയില് വച്ചിട്ടുണ്ട്'- റൂട്ട് പറഞ്ഞു.
കര്ശന നിര്ദേശങ്ങളൊന്നും ഇതുമായി ബന്ധപ്പെട്ട് വന്നിട്ടില്ലെന്നും റൂട്ട് വ്യക്തമാക്കി. നിലവിലെ സാഹചര്യം അത്തരത്തിലാണെന്ന ബോധ്യത്തിന്റെ അടിസ്ഥാനത്തിലാണ് മുന്കരുതലുകളെന്നും ഇംഗ്ലീഷ് നായകന് കൂട്ടിച്ചേര്ത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
