നോട്ടിംഗാം: ഒരു ഏകദിന മത്സരത്തില്‍ ഏറ്റവുമധികം വിക്കറ്റ് നേടുന്ന ഇടകൈയ്യന്‍ സ്പിന്നര്‍ എന്ന റെക്കോര്‍ഡ് ഇനി ഇന്ത്യന്‍ താരം കുല്‍ദീപ് യാദവിന് സ്വന്തം. ഇന്ത്യ-ഇംഗ്ലണ്ട് ഏകദിന പരമ്പരയില്‍ ഇന്നുനടന്ന ആദ്യ മത്സരത്തിലാണ് കുല്‍ദീപിന്റെ റെക്കോര്‍ഡ് നേട്ടം. മത്സരത്തില്‍ ആറ് വിക്കറ്റുകള്‍ സ്വന്തമാക്കിയാണ് കുല്‍ദീപ് റെക്കോര്‍ഡ് സ്വന്തമാക്കിയത്.
ഓസ്‌ട്രേലിയന്‍ താരം ബ്രാഡ് ഹോഗിന്റെ അഞ്ചു വിക്കറ്റ് എന്ന നേട്ടമാണ് നോട്ടിംഗാം ഏകദിനത്തില്‍ ഇന്ത്യന്‍ താരം പഴങ്കഥയാക്കിയത്. 2005ല്‍ വെസ്റ്റിന്‍ഡീസിനെതിരെ 32റണ്‍ വഴങ്ങി ബ്രാഡ് ഹോഗ് നേടിയ അഞ്ച് വിക്കറ്റായിരുന്നു ഇതുവരെ ഇടകൈയ്യന്‍ സ്പിന്നര്‍മാരിലെ ഏറ്റവും ഉയര്‍ന്ന വിക്കറ്റ് വേട്ട. എന്നാല്‍ 25റണ്‍ വഴങ്ങി 6വിക്കറ്റുകള്‍ നേടിയ കുല്‍ദീപ് ബ്രാഡ് ഹോഗിനെ പിന്നിലാക്കി.
ഇംഗ്ലണ്ടില്‍ നടന്ന ഏകദിനങ്ങളില്‍ ഒരു സ്പിന്നറുടെ ഏറ്റവും മികച്ച പ്രകടനം എന്ന നേട്ടവും ഇന്നത്തെ മത്സരത്തോടെ കുല്‍ദീപ് സ്വന്തമാക്കി. പാക്ക് താരം ഷാഹിദ് അഫ്രീദി 2004ല്‍ കെനിയക്കെതിരെ 11റണ്ണിന് അഞ്ച് വിക്കറ്റ് നേടിയതും 2005ല്‍ ഓസ്‌ട്രേലിയന്‍ താരം ആന്‍ഡ്രൂ സൈമണ്ട്‌സ് ബംഗ്ലാദേശിനെതിരെ 18 റണ്‍ വഴങ്ങി നേടിയ 5വിക്കറ്റുമായിരുന്നു ഇതുവരെ സ്പിന്നര്‍മാരുടെ മികച്ച പ്രകടനങ്ങളായി വിലയിരുത്തപ്പെട്ടിരുന്നത്. എന്നാല്‍ ഇന്ന് കുല്‍ദീപ് നേടിയ ആറ് വിക്കറ്റ് ഇംഗ്ലണ്ടില്‍ ഒരു സ്പിന്നറുടെ ഏറ്റവും മികച്ച പ്രകടനമായി മാറി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
