ഒരു മാറ്റവുമില്ല, ഒളിമ്പിക്സ് നടത്തും; രാജ്യം പൂർണ സജ്ജമെന്ന് ജപ്പാൻ പ്രധാനമന്ത്രി

ടോക്യോ: ഒളിമ്പിക്സ് നടത്താൻ രാജ്യം പൂർണ സജ്ജമാണെന്നും ജൂലൈയിൽ തന്നെ നടത്തുമെന്നും ജപ്പാന്‍ പ്രധാനമന്ത്രി ഷിന്‍സോ ആബെ. ഗെയിംസ് മാറ്റില്ലെന്ന് ആബേ വ്യക്തമാക്കി. ഒളിമ്പിക്സ് മുന്‍ നിശ്ചയ പ്രകാരം വിജയകരമായി നടത്തുന്നതിനായി അന്താരാഷ്ട്ര ഒളിംപിക് കമ്മിറ്റിയുമായും ലോകാരോഗ്യ സംഘടനയുമായും സംഘാടക സമിതി ആശയ വിനിമയം നടത്തിവരികയാണെന്നും ആബെ പറഞ്ഞു. 

ഒളിമ്പിക്സ് വിജയകരമായി നടത്തുന്നതിന് ആവശ്യമായ എല്ലാ നടപടികളും സ്വീകരിക്കുന്നുണ്ട്. ജപ്പാന്‍ സ്വീകരിച്ച നടപടികളില്‍ അമേരിക്കന്‍ പ്രസിഡന്റ് ‍ഡൊണാള്‍ഡ് ട്രംപ് അടക്കം സംതൃപ്തി രേഖപ്പെടുത്തിയിട്ടുണ്ടെന്നും ആബെ പറഞ്ഞു.

കൊറോണ വൈറസ് പടരുന്നതിന്റെ ആശങ്കകൾ നിലനിൽക്കുന്ന പശ്ചാത്തലത്തില്‍ ടോക്യോ ഒളിമ്പിക്സ് നടക്കുമോ എന്ന കാര്യത്തിൽ സംശയം ഉയർന്നിരുന്നു. ​ഗെയിംസ് ഒരു വര്‍ഷത്തേക്ക് നീട്ടിവെക്കുന്നതിനെക്കുറിച്ച് ആലോചിക്കണമെന്ന് ഡൊണാള്‍ഡ് ട്രംപ് നേരത്തെ ആവശ്യപ്പെട്ടിരുന്നു. ഒഴിഞ്ഞ സ്റ്റേഡ‍ിയത്തില്‍ മത്സരങ്ങള്‍ നടത്തുന്നതിനേക്കാള്‍ ഒളിമ്പിക്സ് മാറ്റിവെക്കുന്നതാണ് ഉചിതമെന്നും ട്രംപ് വ്യക്തമാക്കിയിരുന്നു.