ഇന്ത്യന്‍ ക്യാപ്റ്റന്‍ വിരാട് കോഹ്‌ലി ബാറ്റെടുത്താല്‍ റെക്കോര്‍ഡാണ്. ഓരോ മത്സരം കഴിയുമ്പോഴും ഇത്തരത്തില്‍ പുതിയ പുതിയ നാഴികക്കല്ലുകള്‍ പിന്നിടുന്നത് കോഹ്‌ലി പതിവാണ്. ഇംഗ്ലണ്ടിനെതിരെ നാലാം ടെസ്റ്റില്‍ തോല്‍വി വഴങ്ങി ഇന്ത്യ പരമ്പര അടിയറവ് വച്ചെങ്കിലും സതാംപ്ടണ്‍ ടെസ്റ്റിലെ രണ്ടാം ഇന്നിങ്‌സില്‍ അര്‍ധ സെഞ്ച്വറി നേടിയതോടെ ഇന്ത്യന്‍ നായകന്‍ അപൂര്‍വമായ ഒരുപിടി നേട്ടങ്ങള്‍ തന്റെ പേരിലാക്കി.
രണ്ടാം ഇന്നിങ്‌സില്‍ നേടിയ അര്‍ധ സെഞ്ച്വറിയോടെ പരമ്പരയില്‍ 500 റണ്‍സ് കടന്ന വിരാട് കോഹ്‌ലി ഒരു വിദേശ ടെസ്റ്റ് സീരീസില്‍ 500 റണ്‍സ് നേടുന്ന ആദ്യ ഇന്ത്യന്‍ നായകനായി മാറി. ഇംഗ്ലണ്ടില്‍ ഒരു ടെസ്റ്റ് പരമ്പരയില്‍ 500 റണ്‍സ് നേടുന്ന ആദ്യ ഏഷ്യന്‍ ക്യാപ്റ്റനും കോഹ്‌ലി തന്നെ.
ഇംഗ്ലണ്ടിലെ ടെസ്റ്റ് പരമ്പരയില്‍ 500 റണ്‍സ് നേടുന്ന മൂന്നാമത്തെ ഇന്ത്യന്‍ ബാറ്റ്‌സ്മാനാണ് കോഹ്‌ലി. നായകനായി ടെസ്റ്റില്‍ 4000 റണ്‍സ് തികയ്ക്കുന്ന ആദ്യ ഇന്ത്യന്‍ താരമെന്ന പെരുമയ്‌ക്കൊപ്പം ഏറ്റവും വേഗത്തില്‍ 4000 അടിച്ചെടുക്കുന്ന താരമായും കോഹ്‌ലി മാറി. 38 മത്സരങ്ങളില്‍ നിന്ന് 63 ഇന്നിങ്‌സുകള്‍ ബാറ്റ് ചെയ്താണ് ഇന്ത്യന്‍ നായകന്റെ നേട്ടം. വെസ്റ്റിന്‍ഡീസ് ഇതിഹാസം ബ്രയാന്‍ ലാറയുടെ 40 ടെസ്റ്റുകളും 71 ഇന്നിങ്‌സുകളുമെന്ന റെക്കോര്‍ഡാണ് കോഹ്‌ലി തിരുത്തിയത്. 4000 റണ്‍സിന്റെ എലൈറ്റ് പട്ടികയില്‍ ഒന്‍പതാമനാണ് കോഹ്‌ലി.
രണ്ട് സെഞ്ച്വറികളും മൂന്ന് അര്‍ധ സെഞ്ച്വറികളുമായി ഇംഗ്ലണ്ടില്‍ കത്തുന്ന ഫോമിലാണ് കോഹ്‌ലി. നാല് ടെസ്റ്റുകളില്‍ നിന്നായി നായകന്‍ അടിച്ചെടുത്തത് 544 റണ്‍സ്. രണ്ടാം സ്ഥാനത്തുള്ള ഇംഗ്ലീഷ് താരം ജോസ് ബട്‌ലര്‍ 260 റണ്‍സാണ് നേടിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
