തിരുവനന്തപുരം: രഞ്ജി ട്രോഫിയില്‍ ഡല്‍ഹിയെ സമ്മര്‍ദ്ദത്തിലാക്കി കേരളം. 525 റണ്‍സ് എന്ന കൂറ്റന്‍ സ്‌കോര്‍ ഉയര്‍ത്തിയതിന് ശേഷം ഡിക്ലയര്‍ ചെയ്ത കേരളം രണ്ടാം ദിനം കളി അവസാനിക്കുമ്പോഴേക്കും ഡല്‍ഹിയുടെ രണ്ട് വിക്കറ്റുകള്‍ പിഴുതി.
രണ്ട് വിക്കറ്റ് നഷ്ടത്തില്‍ 23 റണ്‍സ് എന്ന നിലയിലാണ് ഡല്‍ഹി ഇപ്പോള്‍. 502 റണ്‍സിന്റെ ഒന്നാം ഇന്നിങ്‌സ് ലീഡ് ആണ് കേരളത്തിനിപ്പോഴുള്ളത്. ഡല്‍ഹി സ്‌കോര്‍ 14ല്‍ നില്‍ക്കെ നാലാം ഓവറില്‍ സന്ദീപ് വാര്യരാണ് ആദ്യ പ്രഹരവുമായി എത്തിയത്. ഒരു റണ്‍സ് മാത്രം എടുത്ത് നിന്ന ക്രുനാല്‍ ചന്ദേലയെ സന്ദീപ് മുഹമ്മദ് അസ്ഹറുദ്ധീന്റെ കൈകളിലെത്തിച്ചു.
പിന്നാലെ സക്‌സെനയുടെ ഊഴമായിരുന്നു. ഡല്‍ഹി ഓപ്പണര്‍ അനുജ് റവാട്ടിന്റെ കുറ്റി തെറിപ്പിച്ചായിരുന്നു സക്‌സേനയുടെ ആഘോഷം. 7.4 ഓവറില്‍ ഡല്‍ഹി സ്‌കോര്‍ 17 റണ്‍സില്‍ നില്‍ക്കെയാണ് രണ്ടാം വിക്കറ്റ് വീണത്. രണ്ട് റണ്‍സ് കൂട്ടിച്ചേര്‍ക്കുന്നതിന്റെ ഇടയിലാണ് ഡല്‍ഹി ഓപ്പണര്‍മാരെ കേരളം കൂടാരം കയറ്റിയത്.
റോബിന്‍ ഉത്തപ്പ, സച്ചിന്‍ ബേബി എന്നിവരുടെ സെഞ്ചുറിയും രാഹുല്‍ പി, സല്‍മാന്‍ നിസാര്‍ എന്നിവരുടെ അര്‍ധ ശതകവുമാണ് കേരളത്തിന് കൂറ്റന്‍ സ്‌കോര്‍ നല്‍കിയത്. ഉത്തപ്പ 221 പന്തില്‍ നിന്ന് 102 റണ്‍സ് നേടി. സച്ചിന്‍ ബേബി 274 പന്തില്‍ നിന്ന് 155 റണ്‍സ് എടുത്താണ് മടങ്ങിയത്. രാഹുല്‍ പി 97 റണ്‍സും, സല്‍മാന്‍ നിസാര്‍ 77 റണ്‍സുമെടുത്തു.
രാഹുലും ഉത്തപ്പയും ചേര്‍ന്ന് തീര്‍ത്ത 118 റണ്‍സിന്റെ കൂട്ടുകെട്ടും, സച്ചിന്‍ ബേബിയും റോബിന്‍ ഉത്തപ്പയും ചേര്‍ന്ന കൂട്ടിച്ചേര്‍ന്ന് 90 റണ്‍സിന്റെ കൂട്ടുകെട്ടുമാണ് കേരളത്തെ തുണച്ചത്. സല്‍മാന്‍ നിസാര്‍സച്ചിന്‍ ബേബി കൂട്ടുകെട്ടും 100 റണ്‍സ് പിന്നിട്ടു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
