കോഹ്‌ലിയുമായുള്ള വാക്കു തർക്കങ്ങൾ ഏറെയിഷ്ടം, ആസ്വദിക്കുന്നു; ഇന്ത്യൻ ക്യാപ്റ്റനോട് ആരാധന- ഓസീസ് നായകൻ

മെല്‍ബണ്‍: പെർത്തിൽ നടന്ന ഇന്ത്യ- ഓസ്ട്രേലിയ രണ്ടാം ടെസ്റ്റിനിടെ ഓസീസ് നായകൻ ടിം പെയ്നും ഇന്ത്യൻ ക്യാപ്റ്റൻ വിരാട് കോഹ്‌ലിയും തമ്മിൽ വാക്ക് തർക്കത്തിലേർപ്പെട്ടത് ഏറെ ശ്രദ്ധേയമായിരുന്നു. അമ്പയർ ഇടപെട്ടാണ് അന്ന് പ്രശ്നങ്ങൾക്ക് താത്കാലിക പരിഹാരം ഉണ്ടാക്കിയത്. ഓസ്‌ട്രേലിയ വിജയിച്ച ശേഷം ടിം പെയ്‌നിനോട് ബഹുമാനമില്ലാത്ത രീതിയിലാണ് പെരുമാറിയ കോഹ്‌ലി വളരെ അലസമായ രീതിയിലാണ് ഓസീ‌സ് നായകന് ഹസ്തദാനം നൽകിയത്. 

എന്നാൽ കളിക്കളത്തില്‍ വിരാട് കോഹ്‌ലിയുമായുള്ള അത്തരത്തിലുള്ള വാക്കുതര്‍ക്കം താന്‍ ഏറെ ഇഷ്ടപ്പെടുന്നുണ്ടെന്നും ആസ്വദിക്കുന്നുവെന്നും ടിം പെയ്ന്‍ വ്യക്തമാക്കി. കുറച്ചുകാലം ക്രിക്കറ്റില്‍ നിന്ന് വിട്ടുനിന്ന സമയത്ത് കോലിയുടെ മത്സരങ്ങള്‍ കാണാനായിരുന്നു തനിക്ക് താത്പര്യം. എല്ലാ പ്രൊഫഷണല്‍ താരങ്ങളെപ്പോലെയും തോല്‍വി വെറുക്കുന്നവനാണ്‌ കോഹ്‌ലി. അദ്ദേഹം കളിക്കുന്ന രീതി എനിക്ക് ഏറെ ഇഷ്ടമാണ്. എനിക്ക് അദ്ദേഹത്തെ വ്യക്തിപരമായി അറിയില്ല. പക്ഷേ എപ്പോഴും ആരാധന തോന്നിയിട്ടുണ്ട്. അത് കളിയുടെ സ്‌റ്റൈല്‍ മാത്രമല്ല, കളിക്കളത്തിലെ സമീപനം കൊണ്ട് കൂടിയാണ്. മെല്‍ബണില്‍ നടക്കുന്ന മൂന്നാം ടെസ്റ്റിന് മുന്നോടിയായി മാധ്യമങ്ങളോട് സംസാരിക്കവേയാണ് പെയ്ൻ ഇന്ത്യൻ ക്യാപ്റ്റനുമായുണ്ടായ ഉരസലിനെ കുറിച്ച് പറഞ്ഞത്.