ജഡേജയോ, കോഹ്‌ലിയോ അല്ല; ഇന്ത്യൻ ടീമിലെ ഏറ്റവും മികച്ച ഫീൽഡർ ഈ താരമെന്ന് റെയ്ന

ലഖ്നൗ: നിലവിലെ ഇന്ത്യന്‍ ക്രിക്കറ്റ് ടീമിലെ ഏറ്റവും മികച്ച ഫീല്‍ഡര്‍ ആരാണെന്ന ചോദ്യത്തിന് ലോക ക്രിക്കറ്റിലെ ഏറ്റവും മികച്ച ഫീൽഡറായ ഇതിഹാസ താരം ജോണ്ടി റോഡ്സ് പറഞ്ഞ ഉത്തരം രവീന്ദ്ര ജഡേജ എന്നാണ്. ലോകത്തിലെ ഏറ്റവും മികച്ച അഞ്ച് ഫീൽഡർമാരിൽ ഒരാളാണ് ജഡേജയെന്നും റോഡ്സ് പറഞ്ഞിരുന്നു. മുൻ ഇന്ത്യൻ താരം സുരേഷ് റെയ്നയും മികച്ച ഫീൽഡറാണെന്ന് ജോണ്ടി റോഡ്സ് പറഞ്ഞിരുന്നു.

ഇപ്പോഴിതാ ശ്രദ്ധേയമായൊരു അഭിപ്രായവുമായി രം​ഗത്തെത്തിയിരിക്കുകയാണ് സുരേഷ് റെയ്ന. ഇന്ത്യൻ ടീമിലെ ഇപ്പോഴുള്ള താരങ്ങളിൽ മികച്ച ഫീൽഡർ ആരാണെന്ന ചോദ്യത്തിനാണ് റെയ്ന വ്യത്യസ്തമായൊരു അഭിപ്രായം പറഞ്ഞിരിക്കുന്നത്. റെയ്നയുടെ അഭിപ്രായത്തില്‍ ഇന്ത്യന്‍ ടീമിലെ ഏറ്റവും മികച്ച ഫീല്‍ഡര്‍ ജഡേജയോ കോഹ്‌ലിയോ ഒന്നുമല്ല. അത് അജിൻക്യ രഹാനെയാണ്.

ക്യാച്ചുകളെടുക്കാനുള്ള രഹാനയുടെ കഴിവും ഫീല്‍ഡില്‍ നില്‍ക്കുമ്പോഴുള്ള പൊസിഷനിംഗും ഓടുമ്പോള്‍ പോലും ശരീരം വളക്കാനുള്ള കഴിവും മറ്റുള്ളവരില്‍ നിന്ന് രഹാനെയെ വ്യത്യസ്തനാക്കുന്നുവെന്ന് ഒരു മാധ്യമത്തിന് നല്‍കി അഭിമുഖത്തില്‍ റെയ്ന പറഞ്ഞു. സ്ലിപ്പിലും രഹാനെ മികവുറ്റ ഫീല്‍ഡറാണ്. സ്ലിപ്പില്‍ നില്‍ക്കുമ്പോള്‍ ബാറ്റ്സ്മാന്റെ ചലനങ്ങള്‍ക്ക് അനുസരിച്ച സ്വയം സ്ഥാനം ക്രമീകരിച്ച് നില്‍ക്കാനും അദ്ദേഹത്തിന് കഴിയും. ഇത്തരത്തില്‍ അദ്ദേഹം പരിശീലനം നടത്താറുമുണ്ട്. അത് മത്സരങ്ങളില്‍ അദ്ദേഹത്തിന് കാര്യങ്ങള്‍ എളുപ്പമാക്കുന്നു. റെയ്ന വ്യക്തമാക്കി.