ഞാന്‍ നാട്ടിലേക്ക് മടങ്ങിയതിന് ശേഷം ബ്ലാസ്റ്റേഴ്‌സ് മാനേജ്‌മെന്റിന്റെ വിധം മാറി; മഞ്ഞപ്പട വിടാനുണ്ടായ കാരണം വെളിപ്പെടുത്തി ഹ്യൂം

കൊച്ചി: കേരള ബ്ലാസ്‌റ്റേഴ്‌സ് മാനേജ്‌മെന്റിന്റെ താത്പര്യം ഇല്ലായ്മയെ തുടര്‍ന്നാണ് ബ്ലാസ്റ്റേഴ്‌സ് വിട്ട് പുനെ സിറ്റിയില്‍ ചേര്‍ന്നതെന്ന് ഇയാന്‍ ഹ്യൂം. ഐഎസ്എല്‍ അഞ്ചാം സീസണ്‍ തുടങ്ങാനിരിക്കെയാണ് ബ്ലാസ്റ്റേഴ്‌സ് മാനേജ്‌മെന്റിനെതിരായ ഇയാന്‍ ഹ്യൂമിന്റെ തുറന്നു പറച്ചില്‍. 

നാലാം സീസണിനിടെ പരിക്ക് പറ്റിയതിന് പിന്നാലെ ടീം മാനേജ്‌മെന്റുമായും ടീമിന്റെ മെഡിക്കല്‍ സംഘവുമായും ഞാന്‍ ചര്‍ച്ച നടത്തിയിരുന്നു. അന്ന് പോസിറ്റീവായ പ്രതികരണമാണ് അവരുടെ വാക്കുകളില്‍ ഉണ്ടായത്. എന്നാല്‍ ഞാന്‍ നാട്ടിലേക്ക് മടങ്ങിയതിന് ശേഷമുള്ള മാനേജ്‌മെന്റിന്റെ പ്രതികരണം നിരാശപ്പെടുത്തുന്നതായിരുന്നു എന്ന് ഹ്യും പറയുന്നു. 

അന്ന് നാട്ടിലേക്ക് മടങ്ങിയതിന് ശേഷം ടീം മാനേജ്‌മെന്റ് എന്നെ ബന്ധപ്പെട്ടിട്ടില്ല. ഇത് ഫുട്‌ബോളാണ് എന്ന് അറിയാം. രണ്ട് തവണ ബ്ലാസ്‌റ്റേഴ്‌സില്‍ നിന്നും ഇത്തരം സമീപനം നേരിടേണ്ടി വന്നത് വേദനിപ്പിച്ചു. എന്നാല്‍ കേരളത്തെ എനിക്ക് വളരെയേറെ ഇഷ്ടമാണ്. ഈ പ്രശ്‌നത്തിന്റെ പേരില്‍ കേരളത്തോടുള്ള ഇഷ്ടം ഇല്ലാതാവില്ല. ഇതിനെ ഓര്‍ത്ത് കരയാനും പോകുന്നില്ലെന്ന് ഹ്യൂം പറഞ്ഞു.