ക്രൈസ്റ്റ് ചര്‍ച്ച് : ന്യൂസീലന്‍ഡ് എ ടീമിനെതിരായ ചതുര്‍ദിന ടെസ്റ്റ് മത്സരത്തില്‍ ഇന്ത്യ എയ്ക്ക് സമനില. ഇന്ത്യയുടെ ഭാവിതാരം ശുഭ്മാന്‍ ഗില്ലിന്റെ തകര്‍പ്പന്‍ ഇരട്ട സെഞ്ച്വറിയും, പ്രിയങ്ക് പഞ്ചല്‍, ക്യാപ്റ്റന്‍ ഹനുമ വിഹാരി എന്നിവരുടെ സെഞ്ച്വറികളുമാണ് ഇന്ത്യയെ മല്‍സരത്തിലേക്ക് തിരികെ കൊണ്ടുവന്നത്. ഇരട്ട ശതകത്തോടെ ഇന്ത്യന്‍ ടീമിലേക്കുള്ള അവകാശവാദം ഗില്‍ സജീവമാക്കി.
ഒന്നാം ഇന്നിങ്‌സില്‍ വെറും 216 റണ്‍സിന് ഓള്‍ഔട്ടായി 346 റണ്‍സിന്റെ കൂറ്റന്‍ ഒന്നാം ഇന്നിങ്‌സ് ലീഡ് വഴങ്ങിയ ഇന്ത്യ എ, രണ്ടാം ഇന്നിങ്‌സില്‍ അവിശ്വസനീയ തിരിച്ചുവരവോടെയാണ് സമനില പിടിച്ചെടുത്തത്. രണ്ടാം ഇന്നിങ്‌സില്‍ ഇന്ത്യ എ 101.1 ഓവറില്‍ മൂന്നു വിക്കറ്റ് നഷ്ടത്തില്‍ 448 റണ്‍സെടുത്തു നില്‍ക്കെ ഇരു ടീമുകളുടെയും ക്യാപ്റ്റന്‍മാര്‍ സമനിലയ്ക്ക് സമ്മതിക്കുകയായിരുന്നു. സ്‌കോര്‍: ഇന്ത്യ എ 216 & 448/3, ന്യൂസീലന്‍ഡ് എ- 562/7 ഡിക്ലയേര്‍ഡ്.
279 പന്ത് നേരിട്ട ഗില്‍ 22 ഫോറും നാലു സിക്‌സും സഹിതം 204 റണ്‍സുമായി പുറത്തകാതെ നിന്നു. പ്രിയങ്ക് പഞ്ചല്‍ 164 പന്തില്‍ ഏഴു ഫോറും ആറു സിക്‌സും സഹിതം 115 റണ്‍സെടുത്ത് പുറത്തായപ്പോള്‍, ഹനുമ വിഹാരി 113 പന്തില്‍ 11 ഫോറും മൂന്നു സിക്‌സും സഹിതം 100 റണ്‍സുമായി പുറത്താകാതെ നിന്നു. ഓപ്പണര്‍മാരായ അഭിമന്യു ഈശ്വരന്‍ (50 പന്തില്‍ 26), മായങ്ക് അഗര്‍വാള്‍ (0) എന്നിവരാണ് ഇന്ത്യന്‍ നിരയില്‍ പുറത്തായ മറ്റു താരങ്ങള്‍.
ഒന്നാം ഇന്നിങ്‌സിലും അര്‍ധസെഞ്ചുറി നേടിയ ശുഭ്മാന്‍ ഗില്ലായിരുന്നു ഇന്ത്യ എയുടെ ടോപ് സ്‌കോറര്‍. നേടിയത് 83 പന്തില്‍ ഒന്‍പതു ഫോറും രണ്ടു സിക്‌സും സഹിതം 83 റണ്‍സെടുത്തു. ക്യാപ്റ്റന്‍ ഹനുമ വിഹാരിയും അര്‍ധസെഞ്ചുറി നേടി. 79 പന്തില്‍ എട്ടു ഫോറുകള്‍ സഹിതം 51 റണ്‍സെടുത്തു. മറുപടി ബാറ്റിങ്ങില്‍ ന്യൂസീലന്‍ഡ് അഞ്ചു വിക്കറ്റ് നഷ്ടത്തില്‍ 176 റണ്‍സെന്ന നിലയിലായെങ്കിലും ആറാം വിക്കറ്റില്‍ ഇരട്ടസെഞ്ചുറി കൂട്ടുകെട്ട് തീര്‍ത്ത് മാര്‍ക് ചാപ്മാന്‍ - ഡെയ്ന്‍ ക്ലീവര്‍ സഖ്യമാണ് കരകയറ്റിയത്. ചാപ്മാന്‍ 114 റണ്‍സെടുത്തപ്പോള്‍, ക്ലീവറിന് നാലു റണ്‍സിനാണ് ഇരട്ടസെഞ്ചുറി നഷ്ടമായത്. ഇന്ത്യ എയ്ക്കായി മലയാളി താരം സന്ദീപ് വാരിയരും ഇഷാന്‍ പോറെലും രണ്ടു വിക്കറ്റ് വീതം വീഴ്ത്തി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
