ബെര്‍ണാബ്യൂ: ഹസാര്‍ഡ്‌, ബെയ്ല്‍, ബെന്‍സെമ, കോര്‍ട്ടിയസ് എന്നിവരില്ലാതെ സ്റ്റാര്‍ട്ടിങ് ലൈനപ്പ്. ലാ ലീഗയില്‍ മറ്റൊരു നാണക്കേടിലേക്ക് വീഴാതിരിക്കുക എന്നതായിരുന്നു റയല്‍ മാഡ്രിഡിന് മുന്‍പിലുണ്ടായിരുന്ന വെല്ലുവിളി. സിദാന്റെ ബി ടീം എന്ന് വിശേഷിപ്പിക്കപ്പെട്ട സംഘം പക്ഷേ ജയിച്ചു കയറി ലാ ലിഗയിലെ ഒന്നാം സ്ഥാനവും എടുത്താണ് ബെര്‍ണാബ്യൂയില്‍ കളി അവസാനിപ്പിച്ചത്.
പതിനെട്ടും, പത്തൊന്‍പതും വയസ് പ്രായമുള്ള കളിക്കാരുടെ ഗോള്‍ ബലത്തിലാണ് റയലിന്റെ ജയം എന്ന പ്രത്യേകതയുമുണ്ട്. വിനിഷ്യസ് ജൂനിയറിന്റേയും, റോഡ്രിഗോയുടേയും ഗോളിലാണ് ഒസാസുനയെ റയല്‍ എതിരില്ലാത്ത രണ്ട് ഗോളിന് തകര്‍ത്തത്.
ആദ്യ പകുതിയില്‍ താളം കണ്ടെത്താനാവാതെ റയല്‍ കളിക്കുമ്പോഴാണ് 36ാം മിനിറ്റില്‍ വിനിഷ്യസ് ജൂനിയറിന്റെ ഗോള്‍ വന്നത്. തകര്‍പ്പന്‍ ഡ്രൈവില്‍ വല കുലുക്കിയതിന് പിന്നാലെയുള്ള ആഘോഷത്തില്‍ ബ്രസീല്‍ താരത്തിന്റെ കണ്ണ് നിറഞ്ഞു. റയലിന് വേണ്ടിയിറങ്ങിയ കഴിഞ്ഞ 16 മത്സരങ്ങളില്‍ വിനിഷ്യസിന് സ്‌കോര്‍ ചെയ്യാനായിരുന്നില്ല. ആ ഗോളിന് പിന്നാലെ വിനിഷ്യസിന്റെ ആത്മവിശ്വാസം ഉയരുന്നതും മൈതാനത്ത് കണ്ടു.
രണ്ടാം പകുതിയില്‍ ലീഡ് 2-0 ആക്കുന്നതിനുള്ള അവസരം ജോവിക് കളഞ്ഞു കുളിച്ചു. 72ാം മിനിറ്റില്‍ പക്ഷേ പകരക്കാരനായി ഇറങ്ങിയ റോഡ്രിഗോയ്ക്ക്‌
പിഴച്ചില്ല. കളത്തിലിറങ്ങി ഒരു മിനിറ്റ് തികയുന്നതിന് മുന്‍പായിരുന്നു കാസെമെറോയില്‍ നിന്ന് കിട്ടിയ പാസില്‍ പന്തില്‍ അസാമാന്യ കയ്യടക്കം പ്രകടിപ്പിച്ച് പവര്‍ഫുള്‍ ഫിനിഷിലൂടെ റോഡ്രിഗോ ലീഡ് ഉയര്‍ത്തിയത്. വല കുലുക്കിയ റോഡ്രിഗോയുടെ പ്രായം 18. വിനിഷ്യസ് ജൂനിയറിന്റേത് 19...
ആറ് കളിയില്‍ നിന്ന് നാല് ജയവും രണ്ട് തോല്‍വിയുമായാണ് റയല്‍ പോയിന്റ് ടേബിളില്‍ ഒന്നാമതെത്തിയത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
