സച്ചിനെ വെല്ലുവിളിച്ച് യുവി; വേറിട്ട ബോട്ടില്‍ ചലഞ്ചുമായി ക്രിക്കറ്റ് താരം (വീഡിയോ)

കൊച്ചി: സമൂഹമാധ്യമങ്ങളില്‍ തരംഗമായി മാറിയിരിക്കുകയാണ് കുപ്പിയുടെ അടപ്പ് തട്ടിതെറിപ്പിക്കുന്ന ബോട്ടില്‍ ക്യാപ് ചലഞ്ച്. ഇപ്പോള്‍ ഇതിന്റെ വേറിട്ട മുഖം അവതരിപ്പിച്ചിരിക്കുകയാണ് യുവരാജ് സിങ്. ഇതൊടൊപ്പം സച്ചിന്‍ ഉള്‍പ്പെടെ മൂന്ന് ക്രിക്കറ്റ് താരങ്ങളെ യുവരാജ് സിങ് വെല്ലുവിളിക്കുകയും ചെയ്തിരിക്കുകയാണ്. കയ്യിലെ ബാറ്റ് കൊണ്ട് കുപ്പി ലക്ഷ്യമാക്കി പന്ത് പായിക്കുന്ന വീഡിയോ യുവരാജ് തന്നെയാണ് സോഷ്യല്‍മീഡിയയില്‍ പങ്കുവെച്ചത്. 

യുവരാജ് ബാറ്റു കൊണ്ട് അടിച്ചുവിട്ട പന്ത് തട്ടി കുപ്പി മറിഞ്ഞുവീഴുന്നതാണ് വീഡിയോയുടെ ഉളളടക്കം. അടപ്പിന് പകരം കുപ്പി തട്ടിതെറിപ്പിക്കുന്ന വ്യത്യസ്ത ചലഞ്ചാണ് യുവരാജ് ഏറ്റെടുത്തത്. ഇതൊടൊപ്പം സച്ചിന് പുറമേ ശിഖര്‍ ധവാന്‍, ക്രിസ് ഗെയില്‍ എന്നിവരെയുമാണ് യുവരാജ് വെല്ലുവിളിച്ചത്. വിഡിയോ ഇതിനോടകം സമൂഹമാധ്യമങ്ങളില്‍ വൈറലാണ്.

 കുപ്പി താഴെ വീഴുകയോ പൊട്ടുകയോ ചെയ്യാതെ അടപ്പ് അടിച്ചു തെറിപ്പിക്കുക എന്നതാണ് ചലഞ്ച്. ഹോളിവുഡില്‍ ആരംഭിച്ച ചലഞ്ച് മലയാള സസിനിമയില്‍ വരെ എത്തിയിരുന്നു.കസാഖിസ്ഥാനില്‍ നിന്നുള്ള മിക്‌സല്‍ മാര്‍ഷല്‍ ആര്‍ട്‌സ് താരം ഖറോ പഷിയ്ക്കാനാണ് ബോട്ടില്‍ കാപ് തെറിപ്പിച്ച്  ലോകത്തെ ആദ്യം വെല്ലുവിളിച്ചത്. ഹോളിവുഡ് നടനും നിര്‍മാതാവുമായ ജേസന്‍ സ്റ്റാതമിന്റെ കണ്ണഞ്ചിപ്പിക്കുന്ന പ്രകടനത്തോടെ സംഗതി ക്ലിക്കായി. ഇന്ത്യയില്‍ ബോളിവുഡ് താരം അക്ഷയ് കുമാറാണ് ചലഞ്ച് ഏറ്റെടുത്ത് കുപ്പിയുടെ അടപ്പ് ആദ്യം അടിച്ചുതെറിപ്പിച്ചത്.