​വിരസം, ​ഗോൾരഹിതം; നാലാം പോരിലും വിജയമില്ലാതെ ഡൽഹിയും ചെന്നൈയിനും

‍ന്യൂഡൽഹി: ഇന്ത്യൻ സൂപ്പർ ലീ​ഗ് അഞ്ചാം സീസണിൽ വിജയമില്ലാതെ നിലവിലെ ചാംപ്യൻമാരായ ചെന്നൈയിൻ എഫ്സിയും ഡൽഹി ഡൈനാമോസും തുടരുന്നു. നാലാം പോരാട്ടത്തിൽ ഇരുവരും നേർക്കുനേർ വന്നപ്പോൾ മത്സരം ​ഗോൾരഹിത സമനിയിൽ പിരിഞ്ഞു. സീസണിലെ ആദ്യ ജയം തേടി മാറ്റങ്ങളുമായാണ് ഇരു ടീമുകളും ഇറങ്ങിയത്. എന്നാൽ ആ മാറ്റങ്ങൾ ഒന്നും ഗുണം ചെയ്തില്ല. 

കളിയിൽ ചെന്നൈയിനാണ് ഭേദപ്പെട്ട പ്രകടനം കാഴ്ചവെച്ചത്. കളിയുടെ രണ്ടാം പകുതിയിൽ നിരവധി അവസരങ്ങൾ ചെന്നൈയിൻ സൃഷ്ടിച്ചു. പക്ഷെ ഒന്നും ലക്ഷ്യത്തിൽ എത്തിക്കാൻ ചെന്നൈയിൻ മുന്നേറ്റ നിരയ്ക്കായില്ല. ഡൽഹിയുടെ ഗോൾകീപ്പർ ഡോരൻസോറോയുടെ പ്രകടനവും ചെന്നൈയിന് വിനയായി. ഗോളെന്നുറച്ച അവസരങ്ങൾ ഉൾപ്പെടെ നിരവധി മികച്ച സേവുകൾ ഡോരൻസോറോ ഇന്ന് നടത്തി.

ആദ്യ മൂന്ന് മത്സരങ്ങളും പരാജയപ്പെട്ടിരുന്ന ചെന്നൈയിന് ഇത് സീസണിലെ ആദ്യ പോയിന്റാണ്. ചെന്നൈയിന്റെ എെഎസ്എൽ ചരിത്രത്തിലെ ഏറ്റവും മോശം തുടക്കമാണിത്. ഡൽഹിക്ക് ഇത് നാല് മത്സരങ്ങൾക്ക് ഇടയിലെ മൂന്നാം സമനിലയാണ്.