സ്കിന്‍ കെയര്‍ ഉല്‍പ്പന്നങ്ങള്‍ ചുമ്മാ വാരി പുരട്ടരുത്, അതിനൊരു ക്രമം ഉണ്ട്; ചര്‍മസംരക്ഷണ ദിനചര്യ ഇങ്ങനെ...

തിളക്കവും ആരോ​ഗ്യവുമുള്ള ചർമത്തിന് വിവിധ ഉല്‍പ്പന്നങ്ങള്‍ പുരട്ടിയാല്‍ മാത്രം പോര, അത് പ്രയോ​ഗിക്കുന്ന ക്രമത്തിലും കാര്യമുണ്ട്. ശരിയായ ക്രമത്തിൽ ചർമസംരക്ഷണ ദിനചര്യ പിന്തുടരുന്നത് ഓരോ സ്കിൻ കെയർ ഉൽപ്പന്നങ്ങളുടെയും പ്രയോജനങ്ങൾ പരമാവധി ഉപയോഗപ്പെടുത്താന്‍ സഹായിക്കും. ഇത് ചർമത്തിന്റെ ആരോ​ഗ്യം മെച്ചപ്പെടുത്താനും കൂടുതൽ തിളങ്ങാനും സഹായിക്കും.

ആ ക്രമം എങ്ങനെയെന്ന് നോക്കിയാലോ

ക്ലെൻസർ

മുഖത്തെ അഴുക്കും എണ്ണയും മേക്കപ്പും നീക്കം ചെയ്യുന്നതിന് ഒരു ക്ലെൻസർ ഉപയോഗിച്ച് വേണം ദിനചര്യ തുടങ്ങാൻ. ഇത് ചർമം വൃത്തിയാക്കുകയും പ്രയോ​ഗിക്കാനിരിക്കുന്ന ഉൽപ്പന്നങ്ങളുടെ ആ​ഗിരണം ഫലപ്രദമാക്കുകയും ചെയ്യും. എണ്ണമയമുള്ള ചർമം, മുഖക്കുരു എന്നിവ ഉണ്ടെങ്കിൽ ജെൽ ക്ലെൻസറുകൾ ഉപയോ​ഗിക്കുക. വർണ്ട ചർമമുള്ളവരാണെങ്കിൽ ക്രീം ക്ലെൻസറുകൾ ഉപയോ​ഗിക്കുക.

ടോണർ

ടോണർ ചർമത്തിന്റെ പിഎച്ച് സന്തുലിതമാക്കാനും ക്ലെൻസിങ്ങിന് ശേഷവും അവശേഷിക്കുന്ന സൂഷ്മ മാലിന്യങ്ങൾ നീക്കം ചെയ്യാനും സഹായിക്കും. വരണ്ട ചർമം ഉള്ളവർ ഹൈഡ്രേറ്റിങ് ടോണറുകൾ ഉപയോ​ഗിക്കുന്നതാണ് നല്ലത്. മുഖക്കുരു ഉള്ളവർ സാലിസിക് ആസിഡ് അടങ്ങിയതും ഉപയോ​ഗിക്കാവുന്നതാണ്. ഒരു കോട്ടൺ ഉപയോ​ഗിച്ച് ടോണർ മുഖത്ത് പുരട്ടിയ ശേഷം കൈകൾ കൊണ്ട് നന്നായി പാറ്റ് ചെയ്യാം.

സെറം

ചർമത്തിലെ പി​ഗ്മെന്റേഷൻ, മന്ദത, ചുളവുകൾ തുടങ്ങിയ ചർമത്തിലെ പ്രശ്നങ്ങൾ പരിഹരിക്കുന്നതിന് ആവശ്യമായ ചേരുവകൾ സെറത്തിൽ അടങ്ങിയിട്ടുണ്ട്. ചർമത്തിന്റെ ആവശ്യകത അനുസരിച്ച് സെറം തെരഞ്ഞെടുക്കാവുന്നതാണ്. ചർമം തെളിച്ചമുള്ളതും തിളങ്ങുന്നതിനും രാവിലെ വിറ്റാമിൻ സി പോലുള്ള ആന്റി-ഓക്സിഡന്റുകൾ അടങ്ങിയ സെറം ഉപയോ​ഗിക്കാം. അല്ലെങ്കിൽ ജലാംശം നിലനിർത്താൻ സഹായിക്കുന്ന ഹൈലൂറോണിക് ആസിഡ് അടങ്ങിയ സെറം ഉപയോ​ഗിക്കാം. രാത്രിയിൽ കൊളാജൻ ഉൽപ്പാദനം വർധിപ്പിക്കുന്നതിന് റെറ്റിനോൾ സെറം ഉപയോ​​ഗിക്കാവുന്നതാണ്.

ഐ ക്രീം

ചർമസംരക്ഷണ ദിനചര്യയിൽ പലപ്പോഴും വിട്ടുകളയുന്ന ഒരു പ്രദേശമാണ് കണ്ണിന് ചുറ്റും. എന്നാൽ അധിക പരിചരണം ആവശ്യമായ പ്രദേശമാണിത്. ഐ ക്രീം പുരട്ടുന്നത് കണ്ണിന് ചുറ്റും ഡാർക്ക് സർക്കിൾ, വീർക്കൽ എന്നിവ കുറയ്ക്കും.

World Pneumonia Day| ആശങ്കയായി ന്യുമോണിയ; പ്രതിവര്‍ഷം മരിക്കുന്നത് 16 ലക്ഷം, അഞ്ച് വയസിന് താഴെയുള്ള കുട്ടികളിൽ അപകട സാധ്യത കൂടുതൽ

മോയ്സ്ചറൈസർ

എല്ലാ തരത്തിലുള്ള ചർമത്തിനും മോയ്ചറൈസിങ് പ്രധാനമാണ്. ഇത് ചർമത്തിലെ ജലാംശം ലോക്ക് ചെയ്ത് വരൾച്ചയിൽ നിന്ന് സംരക്ഷിക്കുന്നു. എണ്ണമയമുള്ള ചർമത്തിന് ഓയിൽ ഫ്രീ ആയ ലൈറ്റ് മോയ്സ്ചറൈസർ ഉപയോ​ഗിക്കാവുന്നതാണ്. വരണ്ട ചർമമുള്ളവർക്ക് കട്ടിയുള്ളതും കൂടുതൽ എമോലിയൻ്റ് അടങ്ങിയതുമായ മോയ്സ്ചറൈസർ ഉപയോ​ഗിക്കാം.

സൺസ്ക്രീൻ (പകൽ)

പകൽ സമയങ്ങളിൽ സൺസ്ക്രീൻ വളരെ പ്രധാനമാണ്. ചർമം പ്രായമാകുന്ന പ്രക്രിയ വേ​ഗത്തിലാക്കുകയും പി​ഗ്മെന്റേഷൻ ഉണ്ടാക്കുകയും ചെയ്യുന്ന അൾട്രാവയലറ്റ് വികിരണങ്ങളിൽ നിന്ന് ചർമത്തെ സംരക്ഷിക്കാൻ SPF 30 ഉള്ള സൺസ്ക്രീൻ ഉപയോഗിക്കുക.

നൈറ്റ് ക്രീം (രാത്രി)

രാത്രി നൈറ്റ് ക്രീം അല്ലെങ്കിൽ സ്ലീപ്പിങ് മാസ്ക് ഉപയോ​ഗിക്കുന്നത് ഉറങ്ങുമ്പോൾ ചർമം സ്വയം നന്നാകുന്ന പ്രക്രിയ ത്വരിതപ്പെടുത്തും.