വേദനസംഹാരികളെ മറന്നേക്കൂ, ശസ്ത്രക്രിയയ്ക്ക് ശേഷം അല്‍പ്പം സംഗീതമാവാം

ശസ്ത്രക്രിയയിലൂടെ കടന്നു പോകുന്നതു പോലെ തന്നെ വേദനാജനകമാണ് അതിന് ശേഷമുള്ള വീണ്ടെടുപ്പ് ദിനങ്ങൾ. കഠിനമായ വേദനയും ഉത്കണ്ഠയും മുറിവുണങ്ങാനുള്ള കാല താമസവുമൊക്കെ ആളുകളെ മടുപ്പിക്കുന്നതാണ്. എന്നാൽ സം​ഗീതം ആസ്വദിക്കുന്നത് ശസ്ത്രക്രിയയ്ക്ക് ശേഷം ഉണ്ടാകുന്ന വേദനയും ഉതക്ണ്ഠയും കുറയ്ക്കാൻ സഹായിക്കുമെന്ന് എസിഎസ് ക്ലിനിക്കൽ കോൺഗ്രസ് 2024 ൽ അവതരിപ്പിച്ച റിവ്യൂ പഠനത്തിൽ ​വ്യക്തമാക്കുന്നു.

സം​ഗീതത്തിന് ശരീരം വേ​ഗത്തിൽ സുഖപ്പെടുത്താനുള്ള കഴിവുണ്ട്. ഇത് ​ഹൃ​ദയമിടിപ്പ് ക്രമീകരിച്ചുകൊണ്ട് വേദനയും ഉത്കണ്ഠയും കുറയ്ക്കാൻ സഹായിക്കും. രോഗിയുടെ ഹൃദയമിടിപ്പ് ആരോഗ്യകരമായ പരിധിക്കുള്ളിൽ നിലനിർത്തുന്നത് ശരീരത്തിലുടനീളം ഓക്സിജനും പോഷകങ്ങളും നല്ല രീതിയിൽ വിതരണം ചെയ്യുന്നതിലൂടെ വീണ്ടെടുക്കൽ മെച്ചപ്പെടുത്താൻ സഹായിക്കുമെന്ന് ​ഗവേഷകർ പറയുന്നു. ഇത് ശസ്ത്രക്രിയ രോ​ഗികളിൽ രോ​ഗശാന്തി വേ​ഗത്തിലാക്കുമെന്ന് ​ഗവേഷകർ വിലയിരുത്തി. കൂടാതെ സംഗീതം കേൾക്കുമ്പോൾ കോർട്ടിസോളിൻ്റെ അളവ് കുറയുന്നത് രോഗികളുടെ വേദന ലഘൂകരിക്കുന്നതിൽ നിർണായക പങ്കു വഹിക്കുന്നു.

സം​ഗീതത്തിന്റെ സുഖപ്പെടുത്താനുള്ള ​ഗുണങ്ങളെ അടിസ്ഥാനപ്പെടുത്തി നടത്തിയ 3736 പഠനങ്ങള്‍ വിലയിരുത്തിയ ശേഷം അതിൽ നിന്ന് 35 പഠനങ്ങൾ തെരഞ്ഞെടുത്താണ് റിവ്യൂ പഠനം ​ഗവേഷർ തയ്യാറാക്കിയത്. സ്പീക്കറോ ഹെഡ്സെറ്റോ ഉപയോ​ഗിച്ച് സം​ഗീതം ആസ്വദിക്കാം. ശസ്ത്രക്രിയയ്ക്ക് ശേഷം ചെയ്യാവുന്ന ലളിതമായ ഈ പ്രവർത്തനത്തിലൂടെ ശസ്ത്രക്രിയ രോ​ഗികളിൽ അവരുടെ വീണ്ടെടുപ്പ് കാലയളവിൽ ശ്രദ്ധേയമായ നല്ല മാറ്റങ്ങൾ ഉണ്ടായതായി ​കണ്ടെത്തിയെന്നും ​ഗവേഷർ പറയുന്നു.

ഒരു ദിവസം എത്ര കപ്പ് വരെ കാപ്പി ആവാം? അളവിൽ കൂടിയാൽ സ്ട്രോക്കിന് സാധ്യത

ശസ്ത്രക്രിയയുടെ അടുത്ത ദിവസം മുതൽ സംഗീതം ആസ്വദിച്ചവരിൽ വേദനയിലും ഉത്കണ്ഠയിലും ഗണ്യമായ കുറവുണ്ടായതായി രോ​ഗികൾ സ്വയം റിപ്പോർട്ട് ചെയ്തു. സംഗീതം കേൾക്കാത്തവരെ അപേക്ഷിച്ച് അവർ മോർഫിൻ അളവിൻ്റെ പകുതിയിൽ താഴെയാണ് ഉപയോഗിച്ചതെന്നും ​ഗവേഷകർ പറയുന്നു. ശസ്ത്രക്രിയക്ക് ശേഷം രോ​ഗികൾ സാധാരണ ​ഗതിയിലേക്കെത്തുന്നത് സമ്മർദ രഹിതമാക്കാൻ സം​ഗീതം സഹായിക്കുമെന്നും ഗവേഷകര്‍ വ്യക്തമാക്കി.