ലോക ദഹനാരോ​ഗ്യ ദിനം: വയറു ശരിയല്ലെങ്കിൽ മനസിനു സുഖമുണ്ടാകില്ല, കുടലിന്റെ ആരോഗ്യം മെച്ചപ്പെടുത്താൻ അഞ്ച് ശീലങ്ങൾ

നമ്മുടെ ശരീരത്തിന്റെ റിം​ഗ് മാസ്റ്ററായാണ് ആരോ​ഗ്യവിദ​ഗ്ധർ ​ദഹനവ്യവസ്ഥയെ കണക്കാക്കുന്നത്. ദഹനം, മലവിസർജ്ജനം, പ്രതിരോധശേഷി, ആരോഗ്യം, സന്തോഷം എന്നിവയെല്ലാം നിയന്ത്രിക്കുന്നത് ദഹനവ്യവസ്ഥയാണ്. എന്നാൽ പലപ്പോഴും ശരീരത്തിലെ മറ്റ് അവയവങ്ങൾക്ക് നൽകുന്ന പ്രധാന്യം ദഹനവ്യവസ്ഥയ്ക്ക് കൊടുക്കാറില്ല.

ദഹനസംബന്ധമായ രോഗങ്ങളുമായി ബന്ധപ്പെട്ട പ്രശ്നങ്ങളെയും അവസ്ഥകളെയും കുറിച്ച് ആളുകൾക്കിടയിൽ ബോധവൽക്കരണം നടത്തുക എന്ന ഉദ്ദേശ്യത്തോടെ ഗ്യാസ്ട്രോഎന്ററോളജി ഓർഗനൈസേഷന്റെ നേതൃത്വത്തിൽ എല്ലാ വർഷവും മെയ്‌ 29ന് ലോക ദഹനാരോഗ്യ (World Digestive Health Day) ദിനമായി ആചരിക്കുന്നു.

ദഹനവ്യവസ്ഥ ശരീരത്തെ എങ്ങനെ പിന്തുണയ്ക്കുന്നുവെന്ന് മനസിലാക്കുന്നതിലൂടെയും പോഷകസമൃദ്ധമായ ഭക്ഷണക്രമങ്ങൾ കഴിക്കുന്നതിലൂടെയും ഉന്മേഷവും ജീവിത നിലവാരവും വർധിപ്പിക്കാൻ കഴിയുമെന്ന് ഗ്യാസ്ട്രോഎന്ററോളജി ഓർഗനൈസേഷൻ പറയുന്നു. ദഹനാരോ​ഗ്യം നമ്മുടെ മൊത്തത്തിലുള്ള ക്ഷേമത്തിന്റെയും ആരോ​ഗ്യത്തിന്റെ അടിസ്ഥാനമാണെന്ന് പറയാം.

കുടലിന്റെയും ദഹനത്തിന്റെയും ആരോ​ഗ്യം മെച്ചപ്പെടുത്താൻ സഹായിക്കുന്ന ചില ശീലങ്ങൾ:

മെച്ചപ്പെട്ട ദഹനത്തിന് നാരുകൾ അടങ്ങിയ ഭക്ഷണം കഴിക്കേണ്ടത് പ്രധാനമാണ്. പഴങ്ങൾ, പച്ചക്കറികൾ, പയർവർഗ്ഗങ്ങൾ, ധാന്യങ്ങൾ തുടങ്ങിയ ഭക്ഷണങ്ങളിൽ ലയിക്കുന്നതും ലയിക്കാത്തതുമായ ധാരാളം നാരുകൾ അടങ്ങിയിട്ടുണ്ട്. ഇത് മലവിസർജ്ജനം സാധാരണമാക്കുന്നതിനും, ആരോഗ്യകരമായ കുടൽ ബാക്ടീരിയകളെ പോഷിപ്പിക്കുന്നതിനും, മലബന്ധവും വയറു വീർക്കുന്നതും തടയാൻ സഹായിക്കുകയും ചെയ്യുന്നു.

തൈര്, കെഫീർ പോലെ പുളിപ്പിച്ച ഭക്ഷണങ്ങളിൽ അടങ്ങിയ പ്രോബയോട്ടിക്സ് കുടലിലെ നല്ല ബാക്ടീരിയകളെ പോഷിപ്പിക്കാൻ സഹായിക്കുന്നു. പുളിപ്പിച്ച മാവ് കൊണ്ടുണ്ടാക്കുന്ന ദോശയും ഇഡലിയുമൊക്കെ രാവിലെ ബ്രേക്ക്ഫാസ്റ്റിൽ ഉൾപ്പെടുത്താവുന്നതാണ്. ഈ പ്രോബയോട്ടിക്കുകൾ ഒരു സന്തുലിതമായ ഗട്ട് മൈക്രോബയോമിനെ പിന്തുണയ്ക്കുകയും ദഹനവും പ്രതിരോധശേഷിയും മെച്ചപ്പെടുത്തുകയും ചെയ്യുന്നു.

യഥാർഥത്തിൽ ദഹനം ആരംഭിക്കുന്ന കുടലിൽ നിന്നല്ല, വായിൽ നിന്നാണ്. ഭക്ഷണം ചവയ്ക്കുമ്പോൾ ഉമിനീരിലെ ദഹന എൻസൈമുകൾ ഇതിനൊപ്പം കലരുകയും ദഹനത്തിന് തുടക്കം കുറിക്കുകയും ചെയ്യുന്നു. അതുകൊണ്ട് തന്നെ ഭക്ഷണം നന്നായി ചവയ്ക്കുന്നത് ദഹനത്തെ എളുപ്പമാക്കും. മാത്രമല്ല, സാവധാനം കഴിക്കുന്നത് അമിതമായി ഭക്ഷണം കഴിക്കൽ, ഗ്യാസ്, വയറു വീർക്കൽ എന്നിവ കുറയ്ക്കാൻ സഹായിക്കുന്നു.

ആവശ്യത്തിന് വെള്ളം കുടിക്കുന്നത് ഭക്ഷണം ദഹിപ്പിക്കാനും, പോഷകങ്ങൾ ആഗിരണം ചെയ്യാനും, ദഹനവ്യവസ്ഥയെ ആരോഗ്യകരമായി നിലനിർത്താനും സഹായിക്കുന്നു. ഒരു ദിവസം കുറഞ്ഞത് എട്ട് ഗ്ലാസ് വെള്ളമെങ്കിലും കുടിക്കാൻ ശ്രദ്ധിക്കണം. പ്രത്യേകിച്ച്, നിങ്ങൾ ഉയർന്ന നാരുകൾ അടങ്ങിയ ഭക്ഷണം കഴിക്കുമ്പോൾ.

മാനസിക സമ്മർദം ദഹനാരോ​ഗ്യത്തെ പ്രതികൂലമായി ബാധിക്കാം. വിട്ടുമാറാത്ത സമ്മർദം കുടൽ-തലച്ചോർ ബന്ധത്തെ അസ്വസ്ഥതപ്പെടുത്തുകയും ദഹനക്കേട്, ഐബിഎസ് അല്ലെങ്കിൽ ആസിഡ് റിഫ്ലക്സ് പോലുള്ള പ്രശ്നങ്ങൾക്ക് കാരണമാകുകയും ചെയ്യുന്നു. വിട്ടുമാറാത്ത സമ്മർദ്ദം കുടൽ-തലച്ചോറിന്റെ അച്ചുതണ്ടിനെ പ്രതികൂലമായി ബാധിക്കും, ഇത് ദഹനക്കേട്, ഐബിഎസ് അല്ലെങ്കിൽ ആസിഡ് റിഫ്ലക്സ് പോലുള്ള പ്രശ്നങ്ങൾക്ക് കാരണമാകും. ഉദര സംബന്ധമായ രോഗലക്ഷണങ്ങൾ ഉള്ളവരിൽ 50-60 ശതമാനം ആളുകൾക്കും ഉത്കണ്ഠ, വിഷാദം പോലുള്ള മാനസിക പ്രശ്നങ്ങൾ ഉണ്ടെന്ന് പഠനങ്ങൾ കണ്ടെത്തിയിട്ടുണ്ട്.

ഇറിറ്റബിൾ ബവൽ സിൻഡ്രോം, ഇൻഫ്ലമേറ്ററി ബവൽ ഡിസീസ് (IBD) അല്ലെങ്കിൽ സിറോസിസ് തുടങ്ങിയ രോഗങ്ങൾ ഉത്കണ്ഠ നിറഞ്ഞ മനസിന്റെ പ്രതിഫലനം ആയേക്കാമെന്ന് പഠനങ്ങൾ സൂചിപ്പിക്കുന്നു. ധ്യാനം, ശ്വസന വ്യായാമം അല്ലെങ്കിൽ യോഗ പോലുള്ള ടെക്നിക്കുകൾ പരീക്ഷിക്കാവുന്നതാണ്.