കേരളത്തില്‍ കര്‍ക്കടക മാസം ആരോഗ്യ സംരക്ഷണത്തിന്റെയും ആത്മീയ ചിന്തയുടെയും മാസമായാണ് കണക്കാക്കപ്പെടുന്നത്. മഴക്കാലത്തി ന്റെ തീവ്രത മൂലം ദഹനശക്തി കുറയുകയും വിവിധ രോഗങ്ങള്‍ പടരാനുള്ള സാധ്യത വര്‍ധിക്കുകയും ചെയ്യുന്ന സമയമാണിത്. അതിനാല്‍ ആ യുര്‍വേദത്തില്‍ കര്‍ക്കടക മാസത്തെ പുനരുജ്ജീവന കാലം എന്ന നിലയിലാണ് കാണുന്നത്. ഈ കാലഘട്ടത്തില്‍ ഔഷധക്കഞ്ഞി, ദശപുഷ്പങ്ങള്‍, ഔഷധസസ്യങ്ങള്‍, പത്തില തോരന്‍ തുടങ്ങിയ പോഷകസമൃദ്ധമായ വിഭവങ്ങള്‍ ഭക്ഷണത്തില്‍ ഉള്‍പ്പെടുത്തുന്ന പതിവ് കേരളീയര്‍ക്ക് പാരമ്പര്യമായി ലഭിച്ചതാണ്.

എന്താണ് പത്തില തോരന്‍?

പത്ത് വ്യത്യസ്ത ഇലവര്‍ഗങ്ങള്‍ ചേര്‍ത്ത് തയ്യാറാക്കുന്ന ഒരു പരമ്പരാഗത തോരനാണ് പത്തില തോരന്‍. ഔഷധക്കഞ്ഞിക്കൊപ്പം കഴിക്കുന്ന ഈ വിഭവം ശരീരത്തിന് ആവശ്യമായ വിവിധ ധാതുക്കളും വിറ്റാമിനുകളും നാരുകളും പ്രകൃതിദത്ത ആന്റി-ഓക്‌സിഡന്റുകളും നല്‍കുന്നു. മഴക്കാലത്ത് രോഗപ്രതിരോധശേഷി നിലനിര്‍ത്താന്‍ സഹായിക്കുന്ന ഒരു പാരമ്പര്യ ഭക്ഷണ രീതിയാണിത്.

പ്രദേശത്തിനനുസരിച്ച് ചെറിയ വ്യത്യാസങ്ങള്‍ ഉണ്ടായേക്കാമെങ്കിലും സാധാരണയായി ഉപയോഗിക്കുന്ന ഇലകള്‍:

ചുവന്ന ചീര

പച്ചച്ചീര

മുള്ളന്‍ചീര

സാമ്പാര്‍ ചീര

തഴുതാമയില

പയറില

കുമ്പളത്തില

മത്തന്റെ തളിരില

കോവലില

ചേമ്പില (അല്ലെങ്കില്‍ ചൊറിയണം/ആനക്കൊടിത്തൂവ)

തകരയില

പത്ത് ഇലകള്‍ ലഭ്യമല്ലെങ്കില്‍ ലഭ്യമായ ഔഷധ ഗുണമുള്ള ഇലകള്‍ ചേര്‍ത്തും പല കുടുംബങ്ങളും ഈ വിഭവം തയ്യാറാക്കാറുണ്ട്. കര്‍ക്കടക മാസത്തില്‍ ആയുര്‍വേദ പാരമ്പര്യമനുസരിച്ച് മുരിങ്ങയില സാധാരണയായി പത്തില തോരനില്‍ ഉള്‍പ്പെടുത്താറില്ല.

തയ്യാറാക്കുന്ന വിധം

എല്ലാ ഇലകളും നന്നായി കഴുകി ചെറുതായി അരിയുക. ചീനച്ചട്ടിയില്‍ വെളിച്ചെണ്ണ ചൂടാക്കി കടുക് പൊട്ടിക്കുക. അതിലേക്ക് ചെറിയുള്ളി, വെളുത്തുള്ളി, പച്ചമുളക്, അല്പം മഞ്ഞള്‍പ്പൊടി എന്നിവ ചേര്‍ത്ത് വഴറ്റുക. തുടര്‍ന്ന് അരിഞ്ഞ ഇലകളും ആവശ്യത്തിന് ഉപ്പും ചേര്‍ത്ത് മൂടിവെച്ച് വേവിക്കുക. വെള്ളം വറ്റി വരുമ്പോള്‍ ചിരകിയ തേങ്ങ ചേര്‍ത്ത് നന്നായി ഇളക്കി അടുപ്പില്‍ നിന്ന് പുറത്തേയ്ക്ക് എടുത്തുവെയ്ക്കാം. വേണമെങ്കില്‍ അല്പം ജീരകപ്പൊടിയോ കുരുമുളകുപൊടിയോ ചേര്‍ത്താല്‍ രുചിയും ദഹനശേഷിയും വര്‍ധിക്കും.

ആരോഗ്യഗുണങ്ങള്‍

പത്തില തോരനിലെ വിവിധ ഇലകള്‍ ശരീരത്തിന് നിരവധി ഗുണങ്ങള്‍ നല്‍കുന്നു. രോഗപ്രതിരോധ ശേഷി വര്‍ധിപ്പിക്കാന്‍ സഹായിക്കുന്നു. ദഹനപ്രവര്‍ത്തനം മെച്ചപ്പെടുത്തുന്നു. രക്തശുദ്ധിക്ക്‌ സഹായകരമാണ്. ഇരുമ്പ്, കാല്‍സ്യം, ഫോളേറ്റ്, വിറ്റാമിന്‍ എ, സി എന്നിവ ലഭ്യമാക്കുന്നു. ശരീരത്തിലെ ക്ഷീണം കുറയ്ക്കാന്‍ സഹായിക്കുന്നു. മലബന്ധം കുറയ്ക്കാന്‍ സഹായിക്കുന്ന നാരുകള്‍ ധാരാളം അടങ്ങിയിരിക്കുന്നു. മഴക്കാലത്ത് ശരീരത്തിന് ആവശ്യമായ പോഷകങ്ങള്‍ പ്രകൃതിദത്തമായി ലഭ്യമാക്കുന്നു.

കര്‍ക്കടക മാസവും ജ്യോതിഷപരമായ പ്രാധാന്യവും

ജ്യോതിഷപ്രകാരം സൂര്യന്‍ കര്‍ക്കടക രാശിയില്‍ സഞ്ചരിക്കുന്ന കാലമാണ് കര്‍ക്കടക മാസം. പഞ്ചഭൂതങ്ങളില്‍ ജലതത്ത്വത്തിന്റെ സ്വാധീനം കൂടുതലുള്ള ഈ സമയത്ത് ശരീരത്തില്‍ കഫവും വാതവും വര്‍ധിക്കുമെന്നാണ് ആയുര്‍വേദത്തിന്റെ നിരീക്ഷണം. അതിനാല്‍ ദഹിക്കാന്‍ എളുപ്പ മുള്ളതും ഔഷധഗുണമുള്ളതുമായ ഭക്ഷണം കഴിക്കാന്‍ പാരമ്പര്യം നിര്‍ദേശിക്കുന്നു. ഈ മാസത്തില്‍ വിഷ്ണു ആരാധന, രാമായണ പാരായണം, ഗണപതി ഹോമം, ഭഗവതി സേവ, എല്ലാം പതിവുള്ളതാണ്. അതോടൊപ്പം ഔഷധക്കഞ്ഞി, പത്തില തോരന്‍ തുടങ്ങിയവ ശരീരത്തിന്റെയും മനസ്സിന്റെയും സമതുലിതാവസ്ഥ നില നിര്‍ത്താന്‍ സഹായിക്കുന്ന ആചാരങ്ങളായി കണക്കാക്കപ്പെടുന്നു. ജ്യോതിഷത്തില്‍ ആരോഗ്യ സംരക്ഷണത്തിന് പ്രാധാന്യം നല്‍കുന്ന മാസമായതിനാല്‍ പ്രകൃതിയോട് ചേര്‍ന്നുള്ള ഭക്ഷണ രീതികള്‍ പിന്തുടരുന്നത് ശുഭകരമാണെന്ന് വിശ്വസിക്കപ്പെടുന്നു.

ഒരു പാരമ്പര്യം സംരക്ഷിക്കാം

പത്തില തോരന്‍ ഒരു സാധാരണ വിഭവമല്ല. കേരളത്തിന്റെ ഭക്ഷണപാരമ്പര്യത്തിന്റെയും ആയുര്‍വേദ ജ്ഞാനത്തിന്റെയും ഭാഗമാണ്. ഫാസ്റ്റ് ഫു ഡുകളുടെ കാലത്ത് നമ്മുടെ പൂര്‍വികര്‍ കൈമാറിയ ഈ ആരോഗ്യശീലങ്ങള്‍ പുതുതലമുറയ്ക്ക് പരിചയപ്പെടുത്തുകയും കുടുംബങ്ങളില്‍ വീണ്ടും പ്രചരിപ്പിക്കുകയും ചെയ്യേണ്ടത് കാലത്തിന്റെ ആവശ്യമാണ്. 'ഭക്ഷണം തന്നെയാണ് ഔഷധം' എന്ന ആയുര്‍വേദ സന്ദേശം ഏറ്റവും മനോഹരമായി ഓര്‍മ്മപ്പെടുത്തുന്ന വിഭവങ്ങളില്‍ ഒന്നാണ് കര്‍ക്കടക മാസത്തിലെ പത്തില തോരന്‍.