2025 സെപ്റ്റംബര്‍ 22 മുതല്‍ നവരാത്രി വ്രതം ആരംഭിക്കുകയാണ്. ആശ്വിനമാസത്തിലെ ശുക്ലനവമി മധ്യാഹ്നത്തില്‍ വരുന്ന ദിവസമാണ് മഹാനവമി. രണ്ട് ദിവസം മധ്യാഹ്നത്തില്‍ നവമി വന്നാല്‍ രണ്ടു ദിവസവും മഹാനവമിയായി എടുക്കണമെന്നാണ് പ്രമാണം. ഈ വര്‍ഷം ഒക്ടോബര്‍ 1-നാണ് മഹാനവമി വരുക. സൂര്യോദയത്തിനുശേഷം 6 നാഴികയ്ക്കുമേല്‍ ദശമിയുള്ള ദിവസമാണ് വിജയദശമി. അതുകൊണ്ട് വിജയദശമി ഒക്ടോബര്‍ 2-നാണ്. അഷ്ടമി പകല്‍സമയത്ത് കിട്ടുന്ന നേരത്തേ ഗ്രന്ഥംവെയ്ക്കാന്‍ പാടുള്ളൂവെന്നും പറയുന്നുണ്ട്. ഈ വര്‍ഷം സെപ്റ്റംബര്‍ 29 തിങ്കളാഴ്ച വൈകീട്ട് 4.30-ന് അഷ്ടമി തുടങ്ങും എന്നതിനാല്‍ അന്ന് ഗ്രന്ഥംവെയ്ക്കണം. പിറ്റേന്നും ദുര്‍ഗ്ഗാഷ്ടമി തന്നെ. സെപ്റ്റംബര്‍ 23-നാണ് ആശ്വിനമാസാരംഭം. ശരത്ഋതു തുടങ്ങുന്നതും അന്നാണ്. സെപ്റ്റംബര്‍ 27 ശനിയാഴ്ച രാവിലെ 7.07-ന് അത്തം ഞാറ്റുവേല ആരംഭിക്കും. കൂര്‍ക്ക നടാന്‍ പറ്റിയ സമയമാണിത്. എള്ള്, ഉഴുന്ന്, ചെറുപയര്‍, മുതിര തുടങ്ങിയവ കൃഷി ചെയ്യാനും പറ്റിയ കാലമാണ്. നേന്ത്രവാഴ നടുന്നതിനും ഇക്കാലം നല്ലതത്രെ. തെങ്ങിനും കവുങ്ങിനും ജൈവവളമിട്ട് കിളച്ച് മറിച്ചിടാവുന്ന കാലം കൂടിയാണിത്. ബുധനും ശുക്രനും രണ്ട് രാശികളിലായി നില്‍ക്കുന്നത് മഴയുടെ കുറവിനെ സൂചിപ്പിക്കുന്നതാണ്. ശനിയുടെ വക്രാവസ്ഥ ഇപ്പോഴും മാറിയിട്ടില്ലാത്തതിനാല്‍ ചെറിയ ഭൂകമ്പസാധ്യതകള്‍ നിലനില്‍ക്കുന്നുണ്ട്.

അശ്വതി, ഭരണി, കാര്‍ത്തിക 1-ാം പാദം

ഈ നക്ഷത്രങ്ങളില്‍ ജനിച്ചവര്‍ക്ക് വിജയം, ധനലാഭം, സുഹൃദ്ഗണങ്ങളുടെ സഹായം, സന്താനലബ്ധി, ക്രയവിക്രയങ്ങളില്‍ ലാഭം എന്നിവയ്‌ക്കെല്ലാം യോഗമുണ്ട്. നൂതനഗൃഹനിര്‍മ്മാണം, വാഹനലാഭം എന്നിവയ്ക്കും സാധ്യതയുണ്ട്. അനാവശ്യചെലവുകള്‍ കുറയ്ക്കാന്‍ കഴിഞ്ഞാല്‍ വന്‍മാറ്റങ്ങള്‍ക്ക് സാധ്യതയുണ്ട്. അലര്‍ജിമൂലമുള്ള അസുഖങ്ങള്‍ക്കും ഉഷ്ണരോഗങ്ങള്‍ക്കും സാധ്യതയുണ്ട്.

കാര്‍ത്തിക 2, 3, 4 പാദങ്ങള്‍, രോഹിണി, മകയിരം 1, 2 പാദങ്ങള്‍

ഈ നക്ഷത്രക്കാര്‍ക്ക് ഈശ്വരാധീനമുള്ള കാലമാണ്. വിചാരിച്ച കാര്യങ്ങളെല്ലാം നിഷ്പ്രയാസം നടക്കേണ്ട സമയമാണ്. സാഹിത്യാദികലകളിലുള്ളവര്‍ക്ക് അഭിവൃദ്ധിയ്ക്കും നൂതനഗൃഹനിര്‍മ്മാണം, വാഗ്വൈഭവം, വാഹനലാഭം എന്നിവയ്‌ക്കെല്ലാം യോഗമുണ്ട്.

മകീരം 3, 4 പാദങ്ങള്‍, തിരുവാതിര, പുണര്‍തം 1, 2, 3 പാദങ്ങള്‍

ഈ നക്ഷത്രത്തില്‍ ജനിച്ചവര്‍ക്ക് പൊതുവെ നല്ല സമയമാണ്. അനാവശ്യ മനഃക്ലേശങ്ങള്‍, സ്വസ്ഥതക്കുറവ്, സ്ഥാനമാറ്റം എന്നിവയ്ക്ക് യോഗമുണ്ടെങ്കിലും അത് ഗുണകരമാക്കി മാറ്റാന്‍ പറ്റുന്ന കാലമാണ്. വിദ്യാര്‍ത്ഥികള്‍ക്കും ഗവേഷണപ്രവര്‍ത്തനങ്ങളിലേര്‍പ്പെട്ടിരിക്കുന്നവര്‍ക്കും വളരെ ഗുണകരമാണ്.

പുണര്‍തം 4-ാം പാദം, പൂയം, ആയില്യം നക്ഷത്രങ്ങള്‍

സല്‍ക്കര്‍മ്മങ്ങള്‍ക്കായി ധനവിനിയോഗത്തിന് യോഗമുണ്ട്. വിദ്വജ്ജനസമാഗമം, സ്ഥാനമാനങ്ങള്‍, അഭിവൃദ്ധി എന്നിവയ്‌ക്കെല്ലാം യോഗമുണ്ട്. ഉണര്‍ന്ന് പ്രവര്‍ത്തിക്കല്‍ സമൂഹത്തിനുതന്നെ മാറ്റം വരുത്താവുന്ന ഗ്രഹഘടനയ്ക്ക് സാധ്യത കൂടുതലുണ്ട്.

മകം, പൂരം, ഉത്രം 1-ാം പാദം

ഇവര്‍ക്ക് ഏറ്റവും നല്ല സമയമാണിത്. ഉദ്ദിഷ്ടകാര്യസിദ്ധി, കൃഷിയില്‍ ധനലാഭം, പ്രശസ്തി എന്നിവയ്ക്കും യോഗം കാണുന്നുണ്ട്. എന്‍ജിനീയറിങ്ങ് മേഖലയിലും വൈദ്യ-ശാസ്ത്രരംഗത്തുള്ളവര്‍ക്കും നല്ല സമയമാണ്. ഈശ്വരാധീനവും നല്ല ഫലം ചെയ്യും. വിവാഹാദിമംഗള കര്‍മ്മങ്ങള്‍ക്കും ഗൃഹാരംഭപ്രവര്‍ത്തനങ്ങള്‍ക്കും ആരംഭത്തിന് നല്ല സമയമാണ്. ശരീരത്തില്‍ മുറിവേല്‍ക്കാതിരിക്കാനും, നാല്‍ക്കാലികളില്‍നിന്ന് ഉപദ്രവം ഇല്ലാതിരിക്കാനും ശ്രദ്ധിക്കണം.

ഉത്രം 2, 3, 4 പാദങ്ങള്‍, അത്തം, ചിത്ര 1, 2, പാദങ്ങള്‍

ഈ നക്ഷത്രത്തില്‍ ജനിച്ചവര്‍ക്ക് പ്രായേണ നല്ല ഫലങ്ങളാണ്. വിദ്യകൊണ്ടും വിനയംകൊണ്ടും ഉന്നതസ്ഥാനമാനങ്ങള്‍ക്ക് യോഗമുണ്ട്. വിദ്യാര്‍ത്ഥികള്‍ക്കും ഗവേഷകര്‍ക്കും ഇത് വളരെ നല്ലതാണ്. ക്രയവിക്രയങ്ങള്‍ക്കും നാല്‍ക്കാലിവര്‍ദ്ധനവിനുംകൂടി യോഗമുണ്ട്.

ചിത്ര 3, 4 പാദങ്ങള്‍, ചോതി, വിശാഖം 1, 2, 3 നക്ഷത്രപാദങ്ങള്‍

ഈ നക്ഷത്രക്കാര്‍ക്ക് പൊതുവെ ഈശ്വരാധീനക്കുറവുള്ള സമയമാണെന്നറിഞ്ഞ് പ്രവര്‍ത്തിക്കേണ്ട സമയമാണ്. അകാരണഭയം, നല്ലത് ചെയ്താലും ചീത്ത അനുഭവങ്ങള്‍, വീഴ്ച, മുറിവേല്‍ക്കാനിടവരുക, അലസത എന്നിവയ്ക്കും യോഗമുണ്ട്.

വിശാഖം 4-ാം പാദം, അനിഴം, തൃക്കേട്ട

ഈശ്വരാധീനക്കുറവുള്ളതിനാല്‍ ശ്രദ്ധിക്കേണ്ട സമയമാണ്. ചതിയേല്‍ക്കാനിടവരുക, നാശനഷ്ടങ്ങള്‍, അനാവശ്യയാത്രകളിലൂടെ ധനനഷ്ടം എന്നിവയ്ക്കും യോഗമുണ്ട്. ബിസിനസ്സ് രംഗത്തുള്ളവര്‍ ശ്രദ്ധിക്കേണ്ടതാണ്.

മൂലം, പൂരാടം, ഉത്രാടം 1-ാം പാദം

ഗുണദോഷമിശ്രസമയമാണെങ്കിലും വിദ്യാര്‍ത്ഥികള്‍, ഗവേഷകര്‍, അദ്ധ്യാപകര്‍, ഭരണരംഗത്തുള്ളവര്‍ ഇവര്‍ക്കെല്ലാം ഗുണകരമായ സമയമാണ്. ഉന്നതസ്ഥാനമാനങ്ങള്‍, സിനിമാമേഖലകളില്‍ ശോഭിക്കാന്‍ അവസരം, വൈദ്യം, വാസ്തുമേഖലകളിലുള്ളവര്‍ക്ക് ഗുണാനുഭവങ്ങള്‍ എന്നിവയ്‌ക്കെല്ലാം യോഗമുണ്ട്.

ഉത്രാടം 2, 3, 4 പാദങ്ങള്‍, തിരുവോണം, അവിട്ടം 1, 2 പാദങ്ങള്‍

ഇക്കൂട്ടര്‍ക്ക് പൊതുവെ ഗുണകരമല്ലെങ്കിലും, ജോല്ിസംബന്ധമായ കാര്യങ്ങള്‍ക്കും, വിവാഹം, സന്താനലബ്ധി എന്നിവയ്ക്കും ഗുണകരമാണ്. വീഴ്ച, മുറിവേല്‍ക്കാനിടവരുക, അകാരണഭയം, നല്ലത് ചെയ്താലും ദുരനുഭവങ്ങള്‍ എന്നിവയ്‌ക്കെല്ലാം യോഗമുണ്ട്.

അവിട്ടം 3, 4 പാദങ്ങള്‍, ചതയം, പൂരോരുട്ടാതി 1, 2, 3 പാദങ്ങള്‍

ഇക്കൂട്ടര്‍ക്ക് പൊതുവെ ഈശ്വരാനുഗ്രഹമുള്ള സമയമാണ്. ഉദ്ദിഷ്ടകാര്യസിദ്ധി, പ്രശസ്തി, സമൂഹത്തില്‍ മാന്യത എന്നിവയ്‌ക്കെല്ലാം സാധ്യത ഉണ്ട്. കണ്ണിന് അസുഖങ്ങള്‍, അകാരണഭയം എന്നിവയ്ക്കും യോഗമുണ്ട്. കാര്‍ഷികരംഗത്തുള്ളവര്‍ക്ക് വളരെ ഗുണകരമാണ്.

പൂരുരുട്ടാതി 4-ാം പാദം, ഉത്രട്ടാതി, രേവതി

ഈ നക്ഷത്രക്കാര്‍ക്ക് പൊതുവെ ഗുണകരമാണ്. ഉദ്ദിഷ്ടകാര്യങ്ങള്‍ക്ക് സാധ്യതയുണ്ട്. കൃഷിയില്‍ സമൂലമായ മാറ്റങ്ങള്‍ക്ക് യോഗമുണ്ട്. എന്നിരുന്നാലും ഏഴരശ്ശനി ദോഷങ്ങള്‍ അലസത വളര്‍ത്താന്‍ സാധ്യതയുണ്ട്. വളരെ ശ്രദ്ധയോടെ കാര്യങ്ങള്‍ ചെയ്താല്‍ ഉന്നതാധികാരപ്രാപ്തിക്ക് യോഗമുണ്ട്.