ന്യൂഡല്‍ഹി: പ്രമുഖ വാഹന നിര്‍മ്മാതാക്കളായ കൈനറ്റിക് തങ്ങളുടെ ഡിഎക്‌സ് ഇ- സ്‌കൂട്ടര്‍ നിര വിപുലീകരിച്ച് പുതിയ വേരിയന്റുകള്‍ പുറത്തിറക്കി. ഡിഎക്‌സ് 3 kwh, ഡിഎക്‌സ്+ 3.1 kwh എന്നി പേരുകളില്‍ വലിയ ബാറ്ററി പായ്ക്ക് ഉപയോഗിച്ച് അപ്‌ഗ്രേഡ് ചെയ്ത മോഡലുകളാണ് കമ്പനി അവതരിപ്പിച്ചത്. യഥാക്രമം 1,18,599 രൂപയും 1,27,650 രൂപയുമാണ് എക്‌സ് ഷോറൂം വില.

2.6 kwh വേരിയന്റിനേക്കാള്‍ 24 കിലോമീറ്റര്‍ അധികം റേഞ്ച് നല്‍കുന്ന 3.1 kwh എല്‍എഫ്പി ബാറ്ററിയാണ് കൈനറ്റിക് ഡിഎക്‌സ്+ ല്‍ സജ്ജീകരിച്ചിരിക്കുന്നത്. അതായത് ഒറ്റ ചാര്‍ജില്‍ 132 കിലോമീറ്റര്‍ യാത്ര ചെയ്യാന്‍ സാധിക്കും. അപ്‌ഗ്രേഡ് ചെയ്ത ഈ ബാറ്ററിയോടൊപ്പം 3.8 kw ഹബ് മൗണ്ടഡ് ബിഎല്‍ഡിസി മോട്ടോറുമായാണ് ഈ സ്‌കൂട്ടര്‍ വരുന്നത്.

വേഗത കുറയുമ്പോഴും ഊര്‍ജ്ജം വീണ്ടെടുക്കാന്‍ സഹായിക്കുന്ന കെ കോസ്റ്റ് ടെക് ഫീച്ചറും ഇതിലുണ്ട്. ഈസി ചാര്‍ജ്, റിവേഴ്‌സോടു കൂടിയ പാര്‍ക്ക് അസിസ്റ്റ് എന്നിവയാണ് മറ്റു പ്രത്യേകതകള്‍. റേഞ്ച്, പവര്‍ എന്നി രണ്ട് റൈഡിങ് മോഡുകളിലാണ് ഇവ വിപണിയില്‍ എത്തിയത്.