മുംബൈ: പ്രമുഖ ഇരുചക്ര വാഹന നിര്‍മ്മാതാക്കളായ ബജാജ് ഓട്ടോയുടെ പുതിയ ചേതക് വേരിയന്റ് ജനുവരി 14ന് വിപണിയില്‍ അവതരിപ്പിക്കും. ടിവിഎസ് ഓര്‍ബിറ്റര്‍ പോലുള്ള വിപണിയിലെ മറ്റ് എന്‍ട്രി ലെവല്‍ ഇലക്ട്രിക് സ്‌കൂട്ടറുകളെ വെല്ലുന്ന തരത്തില്‍ താങ്ങാനാവുന്ന വിലയിലാണ് ചേതകിന്റെ പുതിയ ഇലക്ട്രിക് സ്‌കൂട്ടര്‍ വിപണിയില്‍ എത്തുന്നത്. സ്‌കൂട്ടറിന്റെ പ്രാരംഭ വില ഒരു ലക്ഷം രൂപയില്‍ താഴെയായിരിക്കും. കൂടുതല്‍ സ്ലിം ആയിട്ടുള്ള തിരശ്ചീന എല്‍ഇഡി സ്ട്രിപ്പ് ആണ് ഇതിന്റെ പ്രധാന പ്രത്യേകത.

ചേതക് നിരയിലെ മറ്റ് വേരിയന്റുകളിലെ അതേ നിയോ-റെട്രോ ഡിസൈന്‍ തന്നെയായിരിക്കും ഇതില്‍ ഉണ്ടായിരിക്കുക. പുറത്തുവന്ന ചിത്രങ്ങള്‍ അനുസരിച്ച് ഇതില്‍ ഒരു ഹബ്-മൗണ്ടഡ് മോട്ടോര്‍ ഉണ്ടാകും. അടിസ്ഥാന ഘടകങ്ങളില്‍ ഒരു ടെലിസ്‌കോപ്പിക് ഫോര്‍ക്കും ഡ്യുവല്‍ ഷോക്ക് അബ്‌സോര്‍ബറുകളും ഉള്‍പ്പെടുന്നു. 12 ഇഞ്ച് അലോയ് വീലാണ് മറ്റൊരു പ്രത്യേകത. മുന്‍വശത്ത് ഡിസ്‌കും പിന്നില്‍ ഡ്രമ്മും അടങ്ങുന്ന ബ്രേക്കിങ് സിസ്റ്റമാണ് പ്രതീക്ഷിക്കുന്നത്.

ചെലവ് നിയന്ത്രിക്കാന്‍ ഈ മോഡലില്‍ ഒരു എല്‍സിഡി ഇന്‍സ്ട്രുമെന്റ് ക്ലസ്റ്റര്‍ കൊണ്ടുവന്നിട്ടുണ്ട്. ഈ പുതിയ വേരിയന്റിലൂടെ നിലവില്‍ സാന്നിധ്യമില്ലാത്ത വളര്‍ന്നുവരുന്ന താങ്ങാനാവുന്ന വിലയുള്ള ഇലക്ട്രിക് സ്‌കൂട്ടര്‍ വിഭാഗത്തിലേക്ക് മുന്നേറാനുള്ള ശ്രമത്തിലാണ് ബജാജ്.