വരുംദിവസങ്ങളില്‍ നിരവധി സ്മാര്‍ട്ട്‌ഫോണുകളാണ് വിപണിയില്‍ എത്താന്‍ പോകുന്നത്. ഇക്കൂട്ടത്തില്‍ ആപ്പിളിന്റെ ഐഫോണ്‍ എസ്ഇ 4 അടക്കം നിരവധി പ്രമുഖ കമ്പനികളുടെ ഫോണുകളും ഉള്‍പ്പെടുന്നു. ഉടന്‍ പുറത്തിറങ്ങാന്‍ പോകുന്ന അഞ്ചു സ്മാര്‍ട്ട്‌ഫോണുകള്‍ പരിചയപ്പെടാം.
ടെക് ലോകത്തിലെ മുന്‍നിര ബ്രാന്‍ഡായ ആപ്പിളിന്റെ ഐഫോണ്‍ എസ്ഇ 4 ഉടന്‍ പുറത്തിറങ്ങും. ഇന്ത്യയില്‍ 50000 രൂപയില്‍ താഴെ വില വരുന്ന ബജറ്റ് ഫ്രണ്ട്‌ലി ഫോണ്‍ ആയിരിക്കും ഇത്. ഒഎല്‍ഇഡി ഡിസ്പ്ലേ, ഫേസ് ഐഡി, ആപ്പിള്‍ ഇന്റലിജന്‍സ് സപ്പോര്‍ട്ട് എന്നിങ്ങനെ പ്രധാന ഡിസൈന്‍ അപ്‌ഗ്രേഡുമായാണ് ഫോണ്‍ വരുന്നത്. കോംപാക്റ്റ് ഫോം ഫാക്ടറും ടച്ച് ഐഡി ഹോം ബട്ടണും ഒഴിവാക്കി ഐഫോണ്‍ 14നോട് സാമ്യമുള്ള ഒരു ലുക്കിലായിരിക്കും ഫോണ്‍ എത്തുക. 6.1 ഇഞ്ച് OLED ഡിസ്പ്ലേ, ടച്ച് ഐഡിക്ക് പകരമായി ഫേസ് ഐഡി, ആധുനിക ഐഫോണുകളുടേതിന് സമാനമായി പരന്ന അരികുകളുള്ള ബോക്‌സിയര്‍ ഡിസൈന്‍, വലതുവശത്ത് പവര്‍ ബട്ടണ്‍ പ്ലേസ്‌മെന്റ് തുടങ്ങി നിരവധി ഫീച്ചറുകളോടെയായിരിക്കും ഫോണിന്റെ വരവ്.
പ്രമുഖ സ്മാര്‍ട്ട്ഫോണ്‍ നിര്‍മ്മാതാക്കളായ ഓപ്പോയുടെ പുതുതലമുറ ഫോള്‍ഡബിള്‍ സ്മാര്‍ട്ട്ഫോണ്‍ ആയ ഓപ്പോ ഫൈന്‍ഡ് എന്‍5 ഗ്ലോബല്‍ ലോഞ്ച് ഫെബ്രുവരി 20ന് സിംഗപ്പൂരില്‍. ലോകത്തെ ഏറ്റവും സ്ലിം ആയിട്ടുള്ള ഫോള്‍ഡബിള്‍ സ്മാര്‍ട്ട്‌ഫോണാണിതെന്ന് കമ്പനി അവകാശപ്പെടുന്നു. കൂടാതെ അതിന്റെ ഡിസൈനും കളര്‍ ഓപ്ഷനുകളും കമ്പനി പുറത്തുവിട്ടിട്ടുണ്ട്. ജേഡ് വൈറ്റ്, സാറ്റിന്‍ ബ്ലാക്ക്, ട്വിലൈറ്റ് പര്‍പ്പിള്‍ വേരിയന്റ് എന്നി നിറങ്ങളില്‍ ഫോണ്‍ ലഭ്യമാകും. ജേഡ് വൈറ്റ്, സാറ്റിന്‍ ബ്ലാക്ക് കളറുകളില്‍ വരുന്ന ഫോണിന്റെ പിന്‍വശം ഗ്ലാസിലാണ് രൂപകല്‍പ്പന ചെയ്തിരിക്കുന്നത്. ട്വിലൈറ്റ് പര്‍പ്പിള്‍ വേരിയന്റിന്റെ പിന്‍വശം ലെതര്‍ കവറിലാണ് സംരക്ഷിച്ചിരിക്കുന്നത്. ഓപ്പോ ഫൈന്‍ഡ് എന്‍5, വണ്‍പ്ലസ് ഓപ്പണ്‍ 2 എന്ന പേരില്‍ റീബ്രാന്‍ഡ് ചെയ്ത് ഇന്ത്യയില്‍ പുറത്തിറക്കുമെന്ന് പ്രതീക്ഷിക്കുന്നു. മെച്ചപ്പെട്ട ഈട് ഉറപ്പാക്കാന്‍ 3D പ്രിന്റഡ് ടൈറ്റാനിയം അലോയ് ഹിഞ്ചോട് കൂടിയാണ് ഫോണ്‍ വിപണിയില്‍ എത്തുക.
ബ്രിട്ടീഷ് കണ്‍സ്യൂമര്‍ ഇലക്ട്രോണിക്സ് നിര്‍മ്മാതാക്കളായ നത്തിങ്ങിന്റെ പുതിയ ഫോണ്‍ ആയ നത്തിങ് ഫോണ്‍ 3എ മാര്‍ച്ച് ആദ്യം ലോഞ്ച് ചെയ്യും. ഇന്ത്യയിലും ഫോണ്‍ നിര്‍മ്മിക്കുമെന്ന് കമ്പനി അറിയിച്ചിട്ടുണ്ട്. നിരവധി അപ്‌ഗ്രേഡുകളുമായാണ് ഫോണ്‍ വിപണിയില്‍ എത്തുക. 120hz റിഫ്രഷ് നിരക്കുള്ള 6.8 ഇഞ്ച് ഒഎല്‍ഇഡി ഡിസ്പ്ലേ, സ്‌നാപ്ഡ്രാഗണ്‍ 7s ജെന്‍ 3 ചിപ്പ്‌സെറ്റ് എന്നിവയാണ് ഇതിന്റെ പ്രധാന ഫീച്ചറുകള്‍. ആന്‍ഡ്രോയിഡ് 15നെ അടിസ്ഥാനമാക്കി നത്തിങ് ഓപ്പറേറ്റിങ് സിസ്റ്റം 3.1ലാണ് ഫോണ്‍ പ്രവര്‍ത്തിക്കുക
പ്രമുഖ മൊബൈല്‍ നിര്‍മ്മാതാക്കളായ ഷവോമിയുടെ 15 സീരീസ് ഫോണുകള്‍ ഉടന്‍ വിപണിയില്‍. ആഗോളതലത്തില്‍ ഫോണ്‍ വിപണിയില്‍ അവതരിപ്പിക്കാനാണ് കമ്പനി ലക്ഷ്യമിടുന്നത്. 15 സീരീസില്‍ വരുന്ന ഷവോമി 15, ഷവോമി 15 പ്രോ എന്നിവ ലൈക്ക കാമറ, സ്‌നാപ്ഡ്രാഗണ്‍ 8 എലൈറ്റ് ചിപ്പ്‌സെറ്റ്, 90w ചാര്‍ജിങ് സപ്പോര്‍ട്ടോട് കൂടിയ 5500 എംഎഎച്ച് ബാറ്ററി എന്നി ഫീച്ചറുകളോടെയായിരിക്കും വിപണിയില്‍ എത്തുക.
വിവോ സബ് ബ്രാന്‍ഡായ ഐക്യൂഒഒയുടെ നിയോ സീരീസിലെ പുതിയ ഫോണ്‍ ആയ നിയോ 10ആര്‍ ഉടന്‍ ഇന്ത്യന്‍ വിപണിയില്‍. ക്വാല്‍കോം സ്‌നാപ്ഡ്രാഗണ്‍ 8s ജെന്‍ 3 പ്രോസസറാണ് ഇതിന് കരുത്തുപകരുക. ഏറ്റവും വേഗതയേറിയ പ്രോസസറുകളില്‍ ഒന്നാണിതെന്ന് കമ്പനി അവകാശപ്പെടുന്നു. വില 30,000 രൂപയില്‍ താഴെയായിരിക്കുമെന്നാണ് കരുതുന്നത്. 144Hz റിഫ്രഷ് റേറ്റുള്ള 6.78 ഇഞ്ച് AMOLED ഡിസ്പ്ലേ, 8/12 ജിബി റാമും 256/512 ജിബി സ്റ്റോറേജ് എന്നിവയുമായാണ് ഫോണ്‍ വിപണിയില്‍ എത്തുക. കാമറ വിഭാഗത്തില്‍ ഫോണിന് 50MP സോണി LYT 600 പ്രൈമറി ഷൂട്ടറും 8MP അള്‍ട്രാ-വൈഡ് ആംഗിള്‍ ലെന്‍സും മുന്‍വശത്ത്, 16MP ഷൂട്ടറും ഉണ്ടായിരിക്കാം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates