ന്യൂഡല്‍ഹി: ഓഹരി വിപണിയില്‍ പത്തുമുന്‍നിര കമ്പനികളില്‍ നാലെണ്ണത്തിന്റെ വിപണി മൂല്യത്തില്‍ വര്‍ധന. കഴിഞ്ഞയാഴ്ച ഈ കമ്പനികളുടെ വിപണി മൂല്യത്തില്‍ ഒന്നടങ്കം 2.20 ലക്ഷം കോടി രൂപയുടെ വര്‍ധനയാണ് രേഖപ്പെടുത്തിയത്. റിലയന്‍സ് ആണ് ഏറ്റവുമധികം നേട്ടം സ്വന്തമാക്കിയത്.

വെള്ളിയാഴ്ച അവസാനിച്ച ആഴ്ചയില്‍ സെന്‍സെക്‌സ് 249 പോയിന്റ് ആണ് മുന്നേറിയത്. എണ്ണവിലയുടെ കുതിച്ചുചാട്ടവും വിദേശ നിക്ഷേപത്തിന്റെ പുറത്തേയ്ക്കുള്ള ഒഴുക്കുമാണ് വിപണിയില്‍ പ്രതിഫലിച്ചത്. റിലയന്‍സിന് പുറമേ ഭാരതി എയര്‍ടെല്‍, ടിസിഎസ്, ബജാജ് ഫിനാന്‍സ് ഓഹരികളാണ് നേട്ടം ഉണ്ടാക്കിയ മറ്റു മുന്‍നിര കമ്പനികള്‍. റിലയന്‍സിന് മാത്രം 1,39,655 കോടിയുടെ നേട്ടമാണ് ഉണ്ടായത്. 19,36,303 കോടിയായാണ് റിലയന്‍സിന്റെ വിപണി മൂല്യം ഉയര്‍ന്നത്. ഭാരതി എയര്‍ടെല്‍ 43,503 കോടി, ടിസിഎസ് 27,569 കോടി, ബജാജ് ഫിനാന്‍സ് 9,432 കോടി എന്നിങ്ങനെയാണ് മറ്റു കമ്പനികളുടെ നേട്ടം.

അതേസമയം ഐസിഐസിഐ ബാങ്കിന്റെ വിപണി മൂല്യത്തില്‍ 45,364 കോടിയുടെ ഇടിവാണ് ഉണ്ടായത്. എസ്ബിഐ 30,922 കോടി, എച്ച്ഡിഎഫ്‌സി ബാങ്ക് 20,951 കോടി എന്നിങ്ങനെയാണ് മറ്റു കമ്പനികളുടെ വിപണി മൂല്യത്തില്‍ ഉണ്ടായ ഇടിവ്. ഹിന്ദുസ്ഥാന്‍ യൂണിലിവര്‍, എല്‍ഐസി, എല്‍ആന്റ്ടി എന്നിവയാണ് നഷ്ടം നേരിട്ട മറ്റു പ്രമുഖ കമ്പനികള്‍. വിപണി മൂല്യത്തില്‍ റിലയന്‍സ് തന്നെയാണ് മുന്നിട്ട് നില്‍ക്കുന്നത്.