ന്യൂഡൽഹി: പതിനായിരം കോടി ഡോളറിൽ കൂടുതൽ ആസ്​തിയുള്ള അതിസമ്പന്നരുടെ പട്ടികയിൽ ഇടംപിടിച്ച്​ മുകേഷ്​ അംബാനി. ആമസോൺ സ്ഥാപകൻ ജെഫ്​ ബെസോസിനും ടെസ്​ല സി ഇ ഒ ഇലോൺ മസ്​കിനുമൊപ്പമാണ് 11 പേരുടെ പട്ടികയിലേക്ക് മുകേഷ് അംബാനിയും എത്തിയത്. ബിൽഗേറ്റ്​സ്​, മാർക്ക്​ സൂക്കർബർഗ്​, വാരൻ ബഫറ്റ്​ എന്നിവരും പട്ടികയിൽ ഉൾപ്പെടും. 

100.6 ബില്യൺ ഡോളർ ആസ്​തിയുമായാണ്​ മുകേഷ്​ അംബാനി അതിസമ്പന്നരുടെ പട്ടികയിൽ സ്ഥാനം നേടിയത്. ഈ വർഷം 23.8 ബില്യൺ ഡോളിൻറെ വർധനയാണ് അദ്ദേഹത്തിന്റെ ആസ്തിയിലുണ്ടായത്. 

2005ൽ​ പിതാവ്​ ധീരുഭായ്​ അംബാനിയുടെ എണ്ണ, പെട്രോകെമിക്കൽ വ്യവസായങ്ങൾ ഏറ്റെടുത്ത മുകേഷ്​ അംബാനി പിന്നീട്​ റീടെയിൽ, ടെക്​നോളജി, ഇ-കോമേഴ്​സ്​ തുടങ്ങിയ മേഖലകളിലേക്കും തന്റെ സാമ്രാജ്യം വ്യാപിപ്പിച്ചു. 2016ൽ ആരംഭിച്ച ടെലികോം വിഭാഗമായ ജിയോ ഇന്ത്യയിലെ പ്രമുഖ കമ്പനികളിലൊന്നായി വളർന്നു.  ഊർജ വ്യവസായത്തിലേക്കും ചുവടുവെക്കാനുള്ള ഒരുക്കത്തിലാണ് ഇപ്പോൾ അംബാനി.