തിരുവനന്തപുരം: ഇന്ധന വിലയിൽ ഇന്നും വർധന. പെട്രോളിനും ഡീസലിനും 48 പൈസ വീതമാണ് ഇന്ന് വർധിച്ചത്. ഒരു മാസത്തിനിടയിലെ ഏറ്റവും ഉയർന്ന പ്രതിദിന വർധനയാണിത്. 

ഇതോടെ കൊച്ചിയിൽ പെട്രോളിന് 109.43 രൂപയായി. ഡീസലിന് 103.28 രൂപയും. തിരുവനന്തപുരത്ത് പെട്രോൾ വില 111.77 രൂപയായി. ഡീസലിന് 105.36 രൂപയും. കോഴിക്കോട് പെട്രോൾ വില 110 രൂപയും ഡീസലിന് 103.42 രൂപയുമായി. 

ഞായറാഴ്ച പെട്രോൾ ലീറ്ററിന് 35 പൈസയും ഡീസലിന് 37 പൈസയും കൂടിയിരുന്നു. അതേസമയം രാജ്യത്ത് ചിലയിടങ്ങളിൽ പെട്രോൾ വില 120 രൂപ കടന്നു. രാജസ്ഥാനിലും മധ്യപ്രദേശിലുമാണ് പെട്രോളിന് വില 121 രൂപയിലെത്തിയത്.