കേന്ദ്രസര്‍ക്കാരിന്റെ പിന്തുണയോട് കൂടിയ, പോസ്റ്റ് ഓഫീസിന്റെ ലഘു സമ്പാദ്യ പദ്ധതികളില്‍ ഒന്നാണ് മാസം തോറുമുള്ള വരുമാനം പദ്ധതി. നിക്ഷേപ തുകയുടെ പലിശ പ്രതിമാസം ലഭിക്കുന്നതാണ് പദ്ധതിയുടെ ആകര്‍ഷണം. കേന്ദ്രസര്‍ക്കാരിന്റെ പിന്തുണയുള്ളത് കൊണ്ട് നിക്ഷേപം സുരക്ഷിതമാണ്. ജോയിന്റ് അക്കൗണ്ടില്‍ 15 ലക്ഷം രൂപ വരെ നിക്ഷേപിക്കാന്‍ സാധിക്കും. ഇത്തരത്തില്‍ 15 ലക്ഷം രൂപ വരെ നിക്ഷേപിച്ചാല്‍ മാസം 9,250 രൂപ വരുമാനം ഉറപ്പാക്കാന്‍ കഴിയുന്നതാണ് ഈ പദ്ധതിയുടെ പ്രത്യേകത.

അഞ്ചുവര്‍ഷമാണ് കാലാവധി. 7.4 ശതമാനം പലിശയാണ് ലഭിക്കുക. ആയിരം രൂപ ഉണ്ടെങ്കില്‍ പദ്ധതിയില്‍ ചേരാം. സിംഗിള്‍ അക്കൗണ്ടില്‍ പരമാവധി 9 ലക്ഷം വരെ നിക്ഷേപിക്കാം. ജോയിന്റ് അക്കൗണ്ടില്‍ പ്രായപൂര്‍ത്തിയായ മൂന്ന് പേര്‍ക്ക് വരെ ചേരാം. പ്രായപൂര്‍ത്തിയാവാത്ത കുട്ടികള്‍ക്ക് വേണ്ടി രക്ഷിതാക്കള്‍ക്കും പദ്ധതിയില്‍ ചേരാവുന്നതാണ്. കുട്ടിക്ക് പത്തുവയസിന് മുകളില്‍ പ്രായം വേണം. പലിശ നികുതിവിധേയമാണ്.

നിക്ഷേപം നടത്തി ഒരു വര്‍ഷത്തിനു ശേഷം 2 ശതമാനം കിഴിവോടെയും മൂന്നു വര്‍ഷത്തിനു ശേഷം 1 ശതമാനം കിഴിവോടെയും നിക്ഷേപത്തുക പിന്‍വലിക്കാവുന്നതാണ്. പലിശ മാസം തോറും റെക്കറിങ് ഡെപ്പോസിറ്റില്‍ നിക്ഷേപിച്ചാല്‍ കാലാവധി ആകുമ്പോള്‍ നല്ല ഒരു തുക ലഭിക്കും.

നിക്ഷേപം

അഞ്ചുലക്ഷം- പ്രതിമാസം 3,083 രൂപ വരുമാനം

ഒന്‍പതുലക്ഷം- പ്രതിമാസം 5,550 രൂപ വരുമാനം

15 ലക്ഷം രൂപ- പ്രതിമാസം 9,250 രൂപ വരുമാനം

ഈ പദ്ധതി ആര്‍ക്കൊക്കെ അനുയോജ്യം?

സ്ഥിരവരുമാനം ആഗ്രഹിക്കുന്ന മുതിര്‍ന്ന പൗരന്മാര്‍, അതായത് വിരമിച്ച ശേഷം പെന്‍ഷനോടൊപ്പം മറ്റൊരു കൃത്യമായ വരുമാനം ആഗ്രഹിക്കുന്നവര്‍ക്ക് ഇത് ഏറ്റവും മികച്ചതാണ്. ഓഹരി വിപണിയിലെ ചാഞ്ചാട്ടങ്ങള്‍ പേടിക്കാതെ നിക്ഷേപം സുരക്ഷിതമായിരിക്കണം എന്ന് നിര്‍ബന്ധമുള്ളവര്‍ക്കും ഈ പോസ്റ്റ് ഓഫീസ് സ്‌കീം തെരഞ്ഞെടുക്കാവുന്നതാണ്. മറ്റ് വരുമാന സ്രോതസ്സുകള്‍ ഉള്ളവര്‍ക്കും അനുയോജ്യമാണ്. വീട്ടുചെലവുകള്‍ക്കോ കുട്ടികളുടെ പഠനത്തിനായുള്ള അധിക ചെലവുകള്‍ക്കോ ഈ മാസ വരുമാനം പ്രയോജനപ്പെടുത്താവുന്നതാണ്. കുറഞ്ഞ വരുമാനമുള്ളവര്‍ക്കും നികുതി അടയ്‌ക്കേണ്ടി വരാത്തവര്‍ക്കും ഈ പലിശ വരുമാനം പൂര്‍ണ്ണമായും പ്രയോജനപ്പെടും.

ആര്‍ക്കൊക്കെ ഈ പദ്ധതി ഒഴിവാക്കാം?

ദീര്‍ഘകാലാടിസ്ഥാനത്തില്‍ വലിയ ലാഭം ആഗ്രഹിക്കുന്നവര്‍ക്ക് ഇക്വിറ്റി മ്യൂച്വല്‍ ഫണ്ടുകളായിരിക്കും അനുയോജ്യം. നികുതി ലാഭിക്കാന്‍ നോക്കുന്നവര്‍ക്ക് അനുയോജ്യമല്ല. ഈ പദ്ധതിയിലെ നിക്ഷേപത്തിന് സെക്ഷന്‍ 80സി പ്രകാരം നികുതി ഇളവ് ലഭ്യമല്ല. കൂടാതെ, ലഭിക്കുന്ന പലിശ വരുമാനമായി കണക്കാക്കി സ്ലാബ് അനുസരിച്ച് നികുതി നല്‍കേണ്ടി വരും. ഉയര്‍ന്ന പണപ്പെരുപ്പം മറികടക്കാന്‍ ആഗ്രഹിക്കുന്നവര്‍ക്കും ഒഴിവാക്കാം. 7.4 ശതമാനം പലിശ നിരക്ക് പണപ്പെരുപ്പത്തെ അതിജീവിക്കാന്‍ ചിലപ്പോള്‍ പര്യാപ്തമാകണമെന്നില്ല.

ഒരു വര്‍ഷത്തിന് മുന്‍പ് പണം പിന്‍വലിക്കാന്‍ സാധിക്കില്ല. ഒന്നിനും മൂന്നിനും ഇടയില്‍ വര്‍ഷങ്ങളില്‍ പിന്‍വലിച്ചാല്‍ നിക്ഷേപത്തിന്റെ രണ്ടു ശതമാനവും മൂന്ന് വര്‍ഷത്തിന് ശേഷമാണെങ്കില്‍ ഒരു ശതമാനവും പിഴയായി ഈടാക്കും. 30 ശതമാനം ടാക്‌സ് സ്ലാബില്‍ വരുന്ന ആളാണെങ്കില്‍ നികുതി കഴിച്ചുള്ള ലാഭം വളരെ കുറവായിരിക്കും. ഒരു തുക നിക്ഷേപിച്ച് അതില്‍ നിന്ന് മാസം തോറും കിട്ടുന്ന പലിശ വീണ്ടും നിക്ഷേപിക്കാന്‍ ആഗ്രഹിക്കുന്നുണ്ടെങ്കില്‍, ആ പണം ഒരു റെക്കറിംഗ് ഡെപ്പോസിറ്റിലേക്ക് മാറ്റുന്നത് വഴി കൂടുതല്‍ ലാഭം നേടാന്‍ സാധിക്കും.