മുംബൈ: തുടര്‍ച്ചയായ രണ്ടാം ദിവസവും ഓഹരി വിപണിയില്‍ മുന്നേറ്റം. രണ്ടു ദിവസത്തിനിടെ ബിഎസ്ഇ സെന്‍സെക്‌സ് 959 പോയിന്റ് ആണ് മുന്നേറിയത്. ഇന്ന് മാത്രം 446 പോയിന്റ് കുതിച്ചാണ് സെന്‍സെക്‌സ് ക്ലോസ് ചെയ്തത്. 85,600 പോയിന്റിന് മുകളിലാണ് സെന്‍സെക്‌സ്. നിഫ്റ്റി 26,100 എന്ന സൈക്കോളജിക്കല്‍ ലെവലിനും മുകളിലാണ്. 52 ആഴ്ചയ്ക്കിടയിലെ ഏറ്റവും ഉയര്‍ന്ന നിലയിലാണ് ഓഹരി വിപണി.

ആഗോള വിപണികളില്‍ നിന്നുള്ള അനുകൂല സൂചനകളാണ് വിപണിക്ക് കരുത്തായത്. കൂടാതെ ഇന്ത്യ- അമേരിക്ക വ്യാപാര കരാര്‍ ഉടന്‍ യാഥാര്‍ഥ്യമാകുമെന്ന പ്രതീക്ഷകളും വിപണിയില്‍ പ്രതിഫലിച്ചു. വിദേശ നിക്ഷേപകര്‍ വീണ്ടും ഓഹരികള്‍ വാങ്ങിക്കൂട്ടാന്‍ തയ്യാറായതാണ് വിപണിക്ക് ഇന്ന് കരുത്തായത്. പ്രധാനമായി ഓട്ടോ, ഫിനാന്‍ഷ്യല്‍സ്, ഐടി അടക്കമുള്ള ലാര്‍ജ് കാപ് സെക്ടറുകളുടെ മുന്നേറ്റമാണ് വിപണിയുടെ മുന്നേറ്റത്തിനെ സഹായിച്ചത്.

കമ്പനികളില്‍ ബജാജ് ഫിനാന്‍സ് ആണ് ഏറ്റവുമധികം നേട്ടം ഉണ്ടാക്കിയത്. 2.37 ശതമാനമാണ് ബജാജ് ഫിനാന്‍സ് മുന്നേറിയത്. റിലയന്‍സ് ഇന്‍ഡസ്ട്രീസ്, ടെക് മഹീന്ദ്ര, എച്ച്ഡിഎഫ്‌സി ബാങ്ക്, ആക്‌സിസ് ബാങ്ക് ഓഹരികളാണ് നേട്ടം ഉണ്ടാക്കിയ മറ്റു ഓഹരികള്‍.