മുംബൈ: ഓഹരി വിപണിയില്‍ മുന്നേറ്റം. വ്യാപാരത്തിന്റെ ഒരു ഘട്ടത്തില്‍ ബിഎസ്ഇ സെന്‍സെക്‌സ് ആയിരം പോയിന്റ് ആണ് മുന്നേറിയത്. 107 ദിവസത്തെ യുദ്ധത്തിന് വിരാമമിട്ട് അമേരിക്കയും ഇറാനും തമ്മില്‍ സമാധാന കരാര്‍ യാഥാര്‍ഥ്യമായത് അടക്കമുള്ള വിഷയങ്ങളാണ് വിപണിയില്‍ പ്രതിഫലിച്ചത്.

അമേരിക്കന്‍- ഇറാന്‍ സമാധാന കരാറിനെ തുടര്‍ന്ന് ആഗോള വിപണികള്‍ നേട്ടത്തോടെയാണ് വ്യാപാരം ആരംഭിച്ചത്. ഇത് ഇന്ത്യന്‍ വിപണിയിലും പ്രതിഫലിക്കുകയായിരുന്നു. ഇതിന്റെ തുടര്‍ച്ചയായി എണ്ണവില കുത്തനെ കുറഞ്ഞതും വിപണിയില്‍ പ്രതിഫലിച്ചു. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡിന്റെ വില ബാരലിന് അഞ്ചുശതമാനമാണ് ഇടിഞ്ഞത്. 82 ഡോളറിന് മുകളിലാണ് എണ്ണവില.

ഓഹരി വിപണിയില്‍ എല്ലാ സെക്ടറുകളും മുന്നേറ്റത്തിലാണ്. ഇതിന് പുറമേ എണ്ണവില കുത്തനെ കുറഞ്ഞതിനെ തുടര്‍ന്ന് ഡോളറിനെതിരെ രൂപയുടെ മൂല്യം ഉയര്‍ന്നതും വിപണിയില്‍ പ്രതിഫലിച്ചു. വ്യാപാരത്തിന്റെ ഒരു ഘട്ടത്തില്‍ 58 പൈസയുടെ നേട്ടത്തോടെ 94.60ലേക്കാണ് രൂപയുടെ മൂല്യം ഉയര്‍ന്നത്. എച്ച്ഡിഎഫ്‌സി ബാങ്ക്, റിലയന്‍സ്, എല്‍ ആന്റ് ടി ഓഹരികളാണ് പ്രധാനമായി നേട്ടം സ്വന്തമാക്കിയത്.